ABALAWI 16 - EBAIBO INZIENUKHU

Litukhu liokhulekhelwa tsimbi

¹ OMWAMI yal'loma khu Musa inyuma wokhufwa khwabasiani ba Haruni babili abali okhwirwa olwa bahaana omul'lo okurali omutsienukhu khu MWAMI.

² Yaboola mbu, “Bool'la omusiani wenywe Haruni mbu khunyinga injomekhe yonyene nilwo olwa anyala okhwinjila emukongo wepasia eya Habundu Hatsienukhu Okhusila, sichila habwene yaho niho aha ndebisulanga nindi mwilumbesi ikulu wesifuunikho sie Lisanduku lie Indakano. Naba niyekala amarwi khwing'ana yili aleerwa.

³ Anyala okhwinjila Habundu Hatsienukhu Okhusila olwa yakhaba naleer'ra esimoosi esichulukhi singa omusango kwetsimbi nende limiiku singa omusango kwokhusambwa.”

⁴ Ma OMWAMI nahaana amebaalo kano mbu: Haruni nasili okhwinjila Habundu Hatsienukhu Okhusila okhwola arange okhwesinga omubili ma yebiikhe tsingubo tsiobwesaalisi mbu natsio nzietsino ekanzo, esinyasa, olukhoba, nende esilemba.

⁵ Abandu ba Isiraeli balahelesia Haruni tsimbusi etsikhole tsibili khulwo omusango kwetsimbi nende limiiku elala khulwo omusango kwokhusambwa.

⁶ Alahaana echulukhi singa omusango kwokhuhiinia tsimbi tsitsie omwene nende tsimbi tsia abeinyumba yiye.

⁷ Ma alabukula tsimbusi tsibili atsihile habwinjil'lo bwe Liheema liokhubaho khwo MWAMI.

⁸ Habwene yaho alakhupilaho imbulu narumikhilanga amachina kabili, elala eliahandikwakhwo “Khu MWAMI” ne elindi “Khu Asaseli.”

⁹ Haruni alahaana imbusi yeimbulu ebukuye khulwokhuhaana khu MWAMI ma achihaane singa omusango kwetsimbi.

¹⁰ Imbusi eyeimbulu ebukuye khulwa Asaseli elahanwa khu MWAMI nesili mwoyo ma ekhungwe nehengibubwe musitsiimi khu Asaseli khulwo okhuhiinia tsimbi tsiabandu.

¹¹ Olwa Haruni aba nahaananga echulukhi singa omusango kwetsimbi khulwaye omwene nende khulwa abeinyumba yiye,

¹² abukule olusalilo lietsahabu nilwitsuyekhwo amanda komul'lo akang'alaye okhurula khulusambwa nende obwali obulahi amakhono kabili ma ahile Habundu Hatsienukhu Okhusila.

¹³ Habwene yaho imbeli wokhubaho khwo MWAMI alara obwali mumul'lo ne omwosi kwobwali yibwo kulabisa esifuunikho sie Lisanduku lie Indakano kho alekhe okhulilola ma afwe tawe.

¹⁴ Alabukula khumatsahi kechulukhi ma anyul'lusie nesiteresie imbeli wesifuunikho ma anyul'lusie akandi hali khane nakhataru imbeli we Lisanduku lie Indakano.

¹⁵ Inyuma we yako, aleera imbusi khulwo omusango kwokhuhiinia tsimbi tsiabandu, ma aleere amatsahi kayo Habundu Hatsienukhu Okhusila ne akanyul'lusie khusifuunikho nende imbeli we Lisanduku lie Indakano, singa obwa akhol'le namatsahi kechulukhi.

¹⁶ Munjila yiyi alakhola omulukha kwokhusiiya Habundu Hatsienukhu Okhusila okhurula khumisilo chiabandu ba Isiraeli nende khutsimbi tsiabwe. Okhwola akhole yaka Khwiheema, sichila lisinjilanga hakari wekambi ebetsanga eyomusilo.

¹⁷ Okhurula khusaa eya Haruni yenjilanga Habundu Hatsienukhu Okhusila okhukhola omulukha kwokhusiiya okhwola olwa yakharulamwo, omundu wosi arakhabakhwo Mwiheema tawe. Olwa aba namal'le okhuhesia omulukha yikwo khuye omwene, nende khubeinyumbaye ma nende khubandu bosi,

¹⁸ kho okhwola atsie khulusambwa lwemisango chiokhusambwa ma alutsienule. Okhwola abukulekhwo khumatsahi kechulukhi nende khumatsahi keimbusi ma akabakhe buli habundu hosi khutsinjika tsiomutsikona tsiolusambwa.

¹⁹ Anyul'lusie amalala khumatsahi tsana nesitere sisie khulusambwa hali kane nakhataru. Munjila yiyi alalusiiya okhurula khutsimbi tsiabandu ba Isiraeli ma alutsienule.

Esitiso

²⁰ Olwa Haruni aba namal'le okhukhola omulukha kwokhusiiya Habundu Hatsienukhu okhusila, Liheema lindi liosi, nende olusambwa, alahaana khu MWAMI imbusi esili mwoyo eyeimbulu eba nebukuye khulwa okhuchihaana khu Asaseli.

²¹ Alabiikha amakhono kaake kosi khumurwe kwayo ma yeyamile khuyo obubi bwabandu ba Isiraeli bwosi, netsimbi tsiabwe tsiosi nende indiri yabwe yosi, ma khulwako ahiinie obubi yibu khubandu nabura khumurwe kweimbusi. Ma nilwo olweimbusi elatabibwa nehengibubwe musitsiimi nomundu oba niyahuywe okhuchitabia.

²² Imbusi elachinga tsimbi tsiabwe tsiosi netsia n'natsio musitsiimi.

²³ Nilwo olwa Haruni alenjila Mwiheema, ne alahinia tsingubo tsiobwesaalisi etsia yali okhwebiikha nasili okhwinjila Habundu Hatsienukhu Okhusila, ma atsilekhe habwene yaho.

²⁴ Okhwola yesingile omubili habundu hatsienukhu ma yebiikhe tsingubo tsitsie omwene. Inyuma we yako alarula esioba ma ahaane omusango kwokhusambwa khulwo okhuhiinia tsimbi tsitsie omwene nende tsimbi tsiabandu.

²⁵ Alasambila khulusambwa esinya yosi yomuruko okuhan'nwe khulwo omusango kwetsimbi.

²⁶ Omundu owatabia imbusi nachihengisie musitsiimi okhutsia khu Asaseli okhwola asaabe tsingubo tsitsie ma yesinge omubili kwosi nasili okhukalukha mukambi.

²⁷ Echulukhi nende imbusi ebirumikhiywe khulwo omusango kwetsimbi ebia amatsahi kabio kaleerwa Habundu Hatsienukhu Okhusila khulwo okhuhiinia tsimbi, bilahilwa esioba wekambi ma bisambilwe ebwene yiyo. Liseelo, inyama nende ebiomunda biosi bilasambwa.

²⁸ Omundu owokhubisamba okhwola asaabe tsingubo tsitsie ma yesinge omubili nasili okhukalukha mukambi.

Okhwitsusia litukhu liokhulekhelwa tsimbi

²⁹ Amalako kano okhwola ketsul'lwe amatukhu kosi aketsanga. Khwitukhu lielikhumi mumwesi kwakhane nakhataru, Abaisiraeli nende abacheni bosi abamenyibwa, okhwola bahonge okhulia khandi barakhakholakhwo omulimo kwosi tawe.

³⁰ Litukhu liene yilwo omulukha kulombwe okwokhubatsienula okhurula mutsimbi tsiabwe kho baabe abatsienukhu.

³¹ Litukhu liene yilio likholwe litsienukhu okhusila, eliokhuhonga okhulia nende oburakhola omulimo kwosi. Amalako kano kalondwe mumatukhu kosi aketsanga.

³² Omwesaalisi Omukhongo, owemekhwa munjila yahabwene khandi owahulwa okhubukula obukono bwa samwana niye okwana okhukhola omulukha kwokhutsienula. Okhwola yebiikhe tsingubo tsiobwesaalisi,

³³ ma akhole omulukha kwokhusiiya Habundu Hatsienukhu Okhusila, nende Liheema liosi eliokhubaho khwo MWAMI, olusambwa, abesaalisi, nende abandu bosi Abaisiraeli.

³⁴ Amalako yaka okhwola kalondwe amatukhu kosi aketsanga. Omulukha kuno kukholwe khumuhika l'lala khulwo okhutsienula Abaisiraeli okhurula mutsimbi tsiabwe tsiosi. Kho Musa yali okhukhola singa obwo MWAMI yali namulachile.