ABALAWI 14 - EBAIBO INZIENUKHU

Okhusiywa inyuma wokhuhona okhurula khubulwaye bwobuchele

¹ OMWAMI yahelesia Musa

² amalako kano khulwo okhurumikhila khumulukha kwokhusiiya omundu ohon'ne okhurula khubulwaye bwobuchele. Litukhu eliokhuribulwa mbu nomusiiyikhu okhwola aleerwe khumwesaalisi,

³ ne omwesaalisi yetsa okhumuhila esioba wekambi ma amuhenjelesie. Nikali mbu obulwaye yibwo buhon'ne,

⁴ omwesaalisi yetsa okhulaka mbu amanyonyi kabili amasiiyikhu kaleerwe khuye halala nende esitonye siomusaala kwomusiita nende omukoye omwakhanyu nende amasafu kolubinu.

⁵ Kho omwesaalisi yetsa okhulaka mbu elala khumanyonyi lir'rwe mundabu elimwo amaatsi akarula musitaho.

⁶ Ma abukule linyonyi lindi halala nesitonye siomusaala kwomusiita, nomukoye omwakhanyu nende olubinu, ma yenikhe mumatsahi kelinyonyi elimal'le okhwirwa.

⁷ Yetsa okhumitsa amatsahi hali khane nakhataru khumundu owenyanga okhusiiywa okhurula khubulwaye bwobuchele bubwe, ma aribule habulafu mbu umal'le okhusiiyikha. Yetsa okhulekha linyonyi elili mwoyo okhupulukha okhutsia halienyele.

⁸ Omundu oba nahon'ne khubulwaye uyo okhwola asaabe tsingubo tsitsie, abeke liswi lilie ma yesinge omubili kho yetsa okhuba niyakhaba omusiiyikhu. Anyala okhwinjila mukambi, nebutswa okhwola amenye esioba weliheema lilie khulwo luhono oluhela amatukhu kane nakataru.

⁹ Khwitukhu liakhane nakhataru khandi yetsa okhubeka omurwekwe, tsindefu, ebikwochibie nende amaswa kandi kosi akali khumubilikwe; ma yetsa okhusaaba tsingubotsie ma yesinge omubili, naye yetsa okhuba omusiiyikhu.

¹⁰ Khwitukhu liamunane yetsa okhuleera ebimeme biamakondi ebisaatsa bibili nende silala esikhasi ebiomuhika mulala ma ebiralikhwo nobulema bwosi tawe, nende etsikilo tsitaru tsiobusie obutsokelwemwo amafura komuseituni nende esitonye silala khubitaru bielita yamafura komuseituni.

¹¹ Omwesaalisi yetsa okhuhila omundu uyo nende emisango yitsio mubwinjil'lo bwe Liheema liokhubaho khwo MWAMI.

¹² Omwesaalisi yetsa okhubukula silala khubimeme bielikondi es'saatsa halala nende esitonye silala khubitaru bielita yamafura komuseituni singa omusango kwokhurunga ebirarungwa. Omwesaalisi yetsa okhusihaana singa esihanwa esichomekhe khu MWAMI sibe esiomwesaalisi.

¹³ Yetsa okhwir'ra esimeme sielikondi habundu hatsienukhu ahemiruko chiomusango kwetsimbi nende omusango kwokhusambwa bir'rwanga. Okhwola akhole mbwo sichila omusango kwokhurunga ebirarungwa kufwana singa omusango kwetsimbi, nakwo nokwomwesaalisi khandi nomutsienukhu okhusila.

¹⁴ Omwesaalisi yetsa okhubukulakhwo amatsahi kesimeme sielikondi ma abakhe khusirwi siokhumukhono musaatsa, nokhusitere esikali siomukhono musaatsa nende khusino sikali siesilenje siokhumukhono musaatsa esiomundu owenyanga akholwe omusiiyikhu.

¹⁵ Omwesaalisi yetsa okhubukulakhwo amafura komuseituni, ma atsukhe khusikalo sisie siomukhono mukhasi,

¹⁶ ma yene esitere siomukhono musaatsa muko ma akamiitse hali khane nakhataru imbeli wo MWAMI.

¹⁷ Yetsa okhubukulakhwo khumafura kali musikalo siokhumukhono kukwe nende khumatsahi kesimeme sielikondi ma akabakhe isi wesirwi esili khumukhono musaatsa, nokhusitere esikali siokhumukhono musaatsa nende khusino esikali siesilenje siomukhono musaatsa siomundu owenyanga okhukholwa omusiiyikhu.

¹⁸ Yetsa okhubukula amafura kosi akasikaye musikalo sisie abakhe m'murwe kwomundu uyo. Munjila yiyi yetsa okhuba nakholanga omulukha kwokhumusiiya.

¹⁹ Kho omwesaalisi yetsa okhuhaana omusango kwetsimbi ma akhole omulukha kwokhumusiiya. Olweinyuma yetsa okhwira omuruko kwomusango kwokhusambwa

²⁰ ma akuhaane nende omusango kwobuswache khulusambwa. Munjila yino omwesaalisi yetsa okhuba nahaananga omusango kwomulukha kwokhusiiywa, ne omundu uyo yetsa okhuba omusiiyikhu.

²¹ Ne nikakhaba omundu uyo nomutakha ne siali onyala okhunyoola ebienyekhanga tawe, kahel'le aleere esimeme sielikondi es'saatsa silala singa omusango kwomurungo kwebindu ebiararunga, nende esihanwa esichomekhe khu MWAMI sibe esiomwesaalisi. Yetsa okhuleera ekilo ndala yobusie netsokan'nemwo amafura komuseituni khulwo omusango kwobuswache nende esitonye silala khubitaru esielita siamafura komuseituni.

²² Khandi okhwola aleere amakhulwi kabili nohomba ebituka b'bili silala khubio khulwo omusango kwetsimbi ne esindi khulwo omusango kwokhusambwa.

²³ Khwitukhu liamunane liokhusiiywa, omundu uyo yetsa okhubileera khumwesaalisi mubwinjil'lo bwe Liheema.

²⁴ Omwesaalisi yetsa okhubukula esimeme sielikondi nende amafura komuseituni ma abihaane khu MWAMI singa esihanwa esichomekhe khulwo omwesaalisi.

²⁵ Omwesaalisi yetsa okhwira esimeme sielikondi ma abukulekhwo amatsahi kasio ma abakhe isi wesirwi siomukhono musaatsa siomundu uyo, nende khusitere esikali siomukhono musaatsa nende esino esikali siesilenje siokhumukhono musaatsa.

²⁶ Omwesaalisi yetsa okhutsukhakhwo amafura musikalo siomukhono kukwe omukhasi,

²⁷ ne narumikhilanga esitere sisie siomukhono musaatsa, yetsa okhumiitsa amatsahi kandi hali khane nakhataru imbeli wo MWAMI.

²⁸ Yetsa okhura amafura malala habundu hosi ha yali okhura amatsahi: Isi wesirwi siomukhono musaatsa siomundu uyo, khusitere sikali siokhumukhono musaatsa, nende khusino esikali siesilenje siomukhono musaatsa.

²⁹ Amafura kosi akasikaye musikalo sisie yetsa okhukabakha khumurwe kwomundu uyo, ne munjila yiyi yetsa khuba nakholanga omulukha kwokhusiiya omundu uyo.

³⁰ Ma yetsa okhuhaana silala khubituka nohomba elala khumakhulwi

³¹ singa omusango kwetsimbi ne esindi singa omusango kwokhusambwa. Munjila yiyi omwesaalisi yetsa khuba nakholanga omulukha kwokhusiiywa.

³² Lino nilio lilako eliomundu oli nobulwaye obubi bwekhwikhoba oranyala okhunyoola nohomba okhukula ebihanwa ebienyekhanga khulwo khusiiywa khukhwe.

Obukukhu mutsinyumba

³³ OMWAMI yahelesia Musa nende Haruni

³⁴ amalako kano khulwe tsinyumba etsilibwanga nende obukukhu. Amalako kano kenyanga kalondwe olwa Baisiraeli nababe nibool'le musibala sia Kanaani, esio MWAMI nabe nabahelesisie singa esibala siabwe.

³⁵ Omundu niyakhanyoola mbu obukukhu buli khunyumba yiye, okhwola omundu uyo atsie okhubool'la omwesaalisi akobukukhu yibwo.

³⁶ Omwesaalisi yetsa okhulaka mbu ebindu biosi bihiinibwe munyumba imwo nasili okhutsia okhuhenjelesia obukukhu yibwo; ne narakhahinia ebindu tawe, kho ebindu biosi ebili munzu yimwo bitsa okhuba ebiomusilo. Kho omwesaalisi yetsa okhutsia munyumba iyo

³⁷ ma ahenjelesie obukukhu yibwo. Nibiakhabamwo ebipala ebifwana obulimo noho ebiakhanyu ebiba nibilitsanga lisisi,

³⁸ yetsa okhurula munyumba iyo ma achiikale khulwa amatukhu kane nakataru.

³⁹ Khwitukhu liakhane nakhataru omwesaalisi alakalukha okhuhenjelesia obukukhu yibwo. Nanyoola obukukhu yibwo nibumeet'te okhulia lisisi,

⁴⁰ ne alalaka mbu amachina akalikhwo obukukhu kahinibwe ma kafubwe habundu homusilo esioba welitookho.

⁴¹ Olunyuma okhwola amasisi komunyumba mukari kakhurwe ne olukhuukhi olurulangakhwo lufubwe habundu homusilo esioba welitookho.

⁴² Ma amachina kandi ketsa okhurumikhilwa mubukono bwamachina akali okhuhiinibwa ma kalaswe obuhia.

⁴³ Nikakhaba olukukhu lwakhachiaka okhulia amasisi keinyumba inyuma wokhuhinia amachina akalikhwo obukukhu nende inyuma weinyumba okhukhurwa khandi nemal'le okhulaswa obuhia,

⁴⁴ omwesaalisi yetsa okhutsia ochihenjelesia. Nikali amasisi kametekhele okhulibwa nobukukhu, kho nobukukhu obusalananga, khulwako, inyumba iyo neyomusilo.

⁴⁵ Okhwola esambul'lwe ne amachina kayo kachingwe okhuhilwa esioba welitookho habundu homusilo.

⁴⁶ Omundu wosi owakhenjila munyumba yimwo olweba nefungilwe yetsa okhuba owomusilo okhwola mukolooba kwelitukhu yilio.

⁴⁷ Omundu wosi owakheyalisia hasi munyumba iyo nohomba niyakhalila munyumba yimwo okhwola asaabe tsingubo tsitsie.

⁴⁸ Ne omwesaalisi niyakhetsa okhuchihenjelesia ma anyoole obukukhu sibuliiye amasisi khandi tawe okhurula inyumba y'yo nelaswa obuhia, yetsa okhuribula habulafu mbu inyumba yiyo neyisiyikhu, sichila obukukhu bwosi bwamala okhuhinibwakhwo kupu.

⁴⁹ Khulwo okhusiiya inyumba iyo omwesaalisi yetsa okhubukula amanyonyi kabili amatititi, esitonye siomusaala kwomusiita, omukoye omwakhanyu nende amasafu kolubinu.

⁵⁰ Yetsa okhwir'ra elala khumanyonyi yako mundabu eyalombwa khwitohi elimwo amaatsi akarula musitaho.

⁵¹ Ma yetsa okhubukula esitonye siomusaala kwomusiita, olubinu, omukoye omwakhanyu, nende linyonyi elisili mwoyo ma abiinikhe mumatsahi kelinyonyi elimal'le okhwirwa nende mumaatsi komusitaho. Ma yetsa okhumiitsa amatsahi munyumba yimwo hali khane nakhataru.

⁵² Munjila yiyi yetsa okhusiiya inyumba iyo nende amatsahi kelinyonyi nende amaatsi komusitaho nende linyonyi elili mwoyo, nende esipande siolubaho olululu, nende omusaala kwomusiita, nende olubinu nende omukoye omwakhanyu.

⁵³ Ma yetsa okhulekha linyonyi elili mwoyo lipulukhe okhurula mwitookho yilio okhutsia hosi halienyele. Munjila yiyi yetsa okhuba nakhol'le omulukha kwokhusiiya inyumba iyo ma yitsa okhuba isiyikhu.

⁵⁴ Kano niko amalako kobulwaye bwobuchele;

⁵⁵ Obulwaye bwamabondo, obukukhu bwetsingubo, nohomba obukukhu bwetsinyumba,

⁵⁶ nende obulwaye bwamasunguri, nohomba ebikhomba.

⁵⁷ Amalako kano kamanyianga olwe esindu sili esiomusilo nende olwa sili esisiyikhu.