ABALAWI 10 - EBAIBO INZIENUKHU

Tsimbi tsia Nadabu nende Abihu

¹ Abasiani ba Haruni babili abalangwa Nadabu nende Abihu buli mulala khubo yabukula esifuria sisie nibarakhwo amanda komul'lo okwatukhanga ma nibaramwo obwali ma nibabuhaana khu MWAMI singa omusango. Nebutswa omul'lo yikwo sikwali omutsienukhu tawe sichila OMWAMI siyaali nabalachile okhukuhaana tawe.

² Ne matetekhana OMWAMI naruma omul'lo nikubasamba ma nibafwila habwene yaho imbeli wo MWAMI.

³ Ma Musa nabool'la Haruni “Kano niko ako MWAMI yal'lomangakhwo olwa yaboola mbu, ‘Yabo bosi abaarumikhilanga okhwola bahaane oluyali khubutsienukhu bwanje; nambisule obukhongo bwanje khubandu banje.’ ” Nebutswa Haruni nabuna tsi.

⁴ Musa nalanga Mishaeli nende Elisafani abasiani ba Usieli owali samwana Haruni omutu nababool'la mbu, “Mwitse hano muchinge emibili tsiabasiani benywe okhurula Mwiheema litsienukhu ma mutsire esioba wekambi.”

⁵ Kho nibetsa nibatila tsingubo tsiali khumibili chiabwe ma nibachinga okhuchihila esioba wekambi singa obwa Musa yali nabalachile okhukhola.

⁶ Ma Musa nabool'la Haruni nende abasiani baabe bandi babili Eliasa nende Itsamari mbu, “Murakhalekha okhuchanula liswi lienywe tawe nohomba murakharandula tsingubo tsienywe okhumanyia mbu mwekhuulanga tawe. Nimwakhakhola mbwo mwakhafwa ne OMWAMI yakhaba nelirima khu Baisiraeli bosi. Nebutswa Abaisiraeli basienywe bosi bahuchiliywe okhwekhuula okhufwa yikhu okhurulana khumul'lo okwo MWAMI aleer're.

⁷ Murakharulakhwo mubwinjil'lo bwe Liheema inyinga yino tawe, nimukhola mbwo mwakhafwa sichila mwatsienulwa khulwo khutsukhil'lwakhwo amafura ko MWAMI.” Kho nibakhola singa Musa yali nababooleye.

Amalako kabesaalisi okhulonda

⁸ OMWAMI yabool'la Haruni mbu,

⁹ “Ibe nende abasiani baabo murakhenjilakhwo Mwiheema liokhubaho khwanje nimunyweye ewaini nohomba amalwa kosi tawe; nimwakhakhola mbwo, mwakhafwa. Lino nelilako liokhulondwa nende abolwibulo lulwo bosi.

¹⁰ Okhwola mube abanyala khwabukhania esili esia Nyasaye nende esiokhurumikhilwa nende abandu bosi, khandi okhwabukhania esiatsienulwa okhurula khusirali esitsienukhu.

¹¹ Okhwola wechesie Abaisiraeli amalako kosi akandakhuhelesia okhubir'ra mu Musa.”

¹² Musa nabool'la Haruni nende abasiani baabe babili basili mwoyo, Eliasa nende Itsamari mbu, “Bukule omusango kwobuswache kusikalanga khubiokhulia bihanwanga khu MWAMI, mubulombekhwo omukaati okuralimwo amamela ma mukuliile halusambwa sichila omusango yiku nomutsienukhu okhusila.

¹³ Muliile omukaati yiku habundu hatsienukhu, nisio esitonye siesiokhulia esisikalanga khuibe nende abasiani baabo okhurula khubiokhulia ebihanwanga khu MWAMI. Yako niko ako MWAMI yandaka kakholwe.

¹⁴ Nebutswa ibe nende abeinyumba yiyo munyala okhulia inyama yokhusilifu nende esinama sieinyuma esihanwanga singa esihanwa esichomekhe khandi omukabwa omuchomekhe khu MWAMI khulwo okhuhebwa abesaalisi. Munyala okhuchiliila habundu hosi hatsienukhu. Ebihanwa yibi nebienywe nende abaana benywe singa esitonye esiahanwa khwinywe okhurula khumusango kwobuhambani okwa Baisiraeli bahaananga.

¹⁵ Nabaleere esinama sieinyuma nende inyama yokhusilifu olwesinya nebe nehanwanga khu MWAMI singa omusango kwebiokhulia. Ebitonye yibi nebibio nende abaana baabo khulwe inziayo, singa obwo MWAMI yalaka kakholwe.”

¹⁶ Musa yareeba okhumanyilisia heimbusi yomusango kwetsimbi eba neli ma nabool'lwa mbu imal'le okhusambwa. Yaka nikachila naba nelirima khu Eliasa nende Itsamari ma nareeba khandi,

¹⁷ “Busina muraliliye omusango kwetsimbi ahembi ne Liheema? Nomutienukhu okhusila ne OMWAMI wamala okhumuhelesia kho kube okunyala okhuhiniaho tsimbi tsia Baisiraeli.

¹⁸ Sichila amatsahi kayo sikaler'rwe Mwiheema Litsienukhu tawe, khane mwakhaliliye omusango yikwo habwene yaho singa obwa ndamulaka.”

¹⁹ Haruni nakalusia Musa naboola mbu, “Abandu baali okhuhaana omusango kwetsimbi nende omusango kwokhusambwa olwaleelo, nebutswa amang'ana amabi yaka kangwiliye. Mbula OMWAMI yakhasangaye ndaba nindiyekhwo omusango kwetsimbi noho?”

²⁰ Olwa Musa yahulila aka Haruni yali nabooye, kamusangasia.