2 ABARUCHI 1 - EBAIBO INZIENUKHU

Omuroobi Eliya nende omuruchi Ahasia

¹ Inyuma wokhufwa khwa Ahabu omuruchi wa Isiraeli, esibala sia Moabu siakhol'la Isiraeli induli.

² Ahasia, omuruchi wa Isiraeli yarulila nakwa hasi okhurula khusilama sie inyumbaye yoburuchi eli mwitookho lia Samaria ma nasal'la butinyu mubulwaye. Kho yamala naruma abarumwa nababool'la mbu, “Mutsie khu Baali Sebubu, nyasaye wa Ekironi, ma m'mureebe nikakhaba mbu nambone okhurula mubutekhele bwanje.”

³ Nebutswa om'malaika wo MWAMI yalaka Eliya okhurula Tishibe namubool'la atsie okhwakan'na abarume abarumilwe okhurula khumuruchi Ahasia wa Samaria ma abareebe, mbu, “Esichilanga nimutsia okhureeba Baali Sebubu, nyasaye wa Ekironi amang'ana nisina? Sikali mbu inywe mupaalanga Nyasaye abulakhwo musibala sia Isiraeli?

⁴ Tsie mubool'le omuruchi Ahasia mbu Omwami aboolanga mbu, ‘Siolahona mubulwaye bubwo tawe, nebutswa nofwe.’ ” Kho Eliya yakhola singa OMWAMI yamulaka,

⁵ ma bakalukha khumuruchi. Omuruchi nabareeba mbu, “Busina mukalukhiye khunjila?”

⁶ Nabo nibamukalusia nibaboola mbu, “Omundu nalebe yaitsile okhukhwakan'na, ma nakhubool'la khukalukhe khuibe ma khukhubool'le mbu, OMWAMI aboola mbu, ‘Busina orumanga abasumba okhutsia okhurunilisia amang'ana khu Baali Sebubu, nyasaye wa Ekironi? Sikali mbu ibe opaalanga Nyasaye abulakhwo mu Isiraeli? Khulwe yako, siolahona mubulwayebwo tawe siahene olafwa.’ ”

⁷ Omuruchi Ahasia nabareeba mbu “Omundu omubooleye amang'ana yaka yali nafwana mbwena?”

⁸ Nabo nibamukalusia mbaboola mbu, “Omundu tsana yali niyebikhile ingubo yobwoya, niyebohele olukhoba lweliseelo mus'sienjesie.” Omuruchi naboola mbu “Uyo ni Eliya okhurula Tishibe.”

⁹ Omuruchi yamala naruma okhukhongo nabasikaribe amakhumi karano khu Eliya mbu bamutiile. Kho batsia nibamunyoola niyekhaye hasikulu ma omukhongo uyo namubool'la mbu “Ibe Omundu wa Nyasaye, omuruchi alakanga witse khuye bwangu.”

¹⁰ Nebutswa Eliya yakalusia naboola mbu, “Nimba nindi omundu wa Nyasaye, lekha omul'lo kwikhe okhurula mwikulu ma kusambe ma ibe nende abasikaribo!” Nilwo olwomul'lo kwekha okhurula mwikulu ma nikusamba omukhongo tsana halala nende abasikari amakhumi karano.

¹¹ Kho khandi omuruchi yaruma omukhongo undi nabasikaribe amakhumi karano. Naye yatsia khu Eliya namubool'la. “Ibe omundu wa Nyasaye, omuruchi alakanga witse khuye bwangu.”

¹² Naye yakalusia naboola mbu, “Nimba nindi omundu wa Nyasaye, kho omul'lo kwikhe okhurula mwikulu ma kukhusambe ibe nende abasikaribo!” Ma omul'lo kwa Nyasaye nikwikha okhurula mwikulu ma nikusamba omukhongo uyo nende abasikaribe amakhumi karano.

¹³ Khandi omuruchi yaruma omukhongo wesituma siakhataru nende abasikaribe amakhumi karano. Ne omukhongo wakhataru uyo nabasikaribe amakhumi karano niyanikila hasikulu ma nakhupa amasikamoke imbeli wa Eliya, namusaaya naboola mbu, “Omundu wa Nyasaye, mbela tsimbabasi halala nabandu banje. Orakhwira tawe.

¹⁴ Lolako, omul'lo kwekha okhurula mwikulu ma nikwira abakhongo bokhuranga babili halala nabandu babwe; nebutswa khusaayanga umbeele tsimbabasi!”

¹⁵ Kho om'malaika wo MWAMI yabool'la Eliya mbu, “Yikha otsie n'naye, ne oraria tawe.” Eliya yamala niyekha ma natsia n'naye khumuruchi owa yamala nabool'la mbu,

¹⁶ “Nyasaye aboolanga amang'ana yaka: Sichila orumile abasumba okhutsia okhureeba amang'ana khu Baali Sebubu, nyasaye wa Ekironi – ol'la Nyasaye sialikho mu Isiraeli owawakharebele tawe – khulwe yako siolahona tawe, nebutswa olafwa.”

¹⁷ Kho Ahasia yafwa singa obwo OMWAMI yali nabooye okhubiisa mu Eliya. Sichila Ahasia siyalikhwo nomusiani tawe, Yoramu, omusiani wabwe yamala abe omuruchi musilenjesie mumuyika kwakhabili okwoburuchi bwa Yehoramu omwana wa Yehoshafati owali omuruchi wa Yuda.

¹⁸ Ne akandi kosi aka Ahasia yakhola kahandiikwa musitapu sia Ketsinyinga tsiabaruchi ba Isiraeli.