Ɔkɔ̀hɔ̀n-wá-bɔ̀ kɔ̀hɔ̀n hán 1 - Ɛmɛẅi ankà ankrànkràn 2003

Ɛnhɛ́n Prɔnprɔn mùan-wá

¹ Brɛ̀su Teofilɛ̀n, Mɛ́n kpàkpà wrú lɔ mɛ̀n, mɛ̀n dɔ́ eci léyi Zhezü bukru hán, hɩ yé

² hàn mán cɔ́ ɛnbì léyi nɛ̀n tɔhú nɛ̀n hɔ́n anhobɩ́ nɔn. Ɛnvra léyi nɛ lɛ tɔhú nɛ̀n hɔ́n anhobɩ́ nɔn, nɛ̀n tán anwrɔn hɔ̀n léyi nɛ̀n mrɛ́n nɛ́n bɩ, dú ɔkɔ̀hɔ̀n-wá-bɔ̀ nɔn, n'ankà-yé Ɛnhɛ́n Prɔnprɔn kɔrɛ̀srɔn mɛ̀n.

³ Annanwɔrɛ mɛ̀n lɔ, n'owù mɛẅi lɔ, nɛ̀n bɩ́ n'edomɛ̀n nɛ̀n yé eci-woroan-ci mɛ̀ntɛ mɛ̀ntɛ mɛ̀n, ô yɔ nyri ɔmu le nɛ̀n dú ɔkɔrɛ-bɔ̀ mɛ̀n: ɛbi ɛkoẅi-anhyrɛ̀ nɛ̀n bɩ́ n'edomɛ̀n nɛ̀n yé yɔ kɩ nɛ̀n dɔ́ yɔ Anhobɩ́ Nɛ̀ncüì-dúyri ankà.

⁴ Ɛnbì tɔ̀n léyi nɛ́n mán yɔ mɛhi yɔ zî ɛci nɔn, nɛ̀n wá tán yɔ le: “Nyɛ́n bɩ́ cɔhɔ́ Zherüzalɛmɛ̀n anmàn, tɛ́n nyɛ́n vrá eci léyi Dade wá ɔmùan nɔn, ecice-ci léyi mɛ̀n dɔ́ nyɛ̀n yi ankà nɔn.

⁵ Ɔmuhi Zhan bɩ́ ɛnshi wá anwrɔn ɛnkru nɔn, tɛ́n nyɛ tɛn, ɛnvra bruemɛ̀n, Ɛnhɛ́n Prɔnprɔn mɛ̀n de yɛ lɛ wá nyɛ̀n ɛnshi ɛnkru nɔn.”

Zhezü kɛ hɔ́n anhobɩ́

⁶ Zɛtɛn anwrɔn hɔ̀n léyi borɛkru Zhezü ɛtɛ̀sɛ̀n nɔn ke yrɛ nɛ̀n le: “Ɛẅɛnwrɔn, ɛnvra ndɔ lɔ mɛ̀n de ɛ lɛ yrɛ́ Izraɛlɛ̀n Wɔ-fɛcüè lɔ nɛ́n?”

⁷ Zhezü mrɛ́n y'ɔmùan le: “Kè sɩ̀ wá tán nyɛ̀n le, nyɛ́n nyri ɛnvra mán ɛnbì, ɔmuhi Dade wá ɛnvra hɔ̀n lɔ nɛ́n zri n'ɛkɔrɛ̀-levriemɛ̀n nɔn.

⁸ Tɛ́n nyɛ lɛ cɔ́ ecüì tɔ̀n ɛnvra léyi Ɛnhɛ́n Prɔnprɔn kɛ lɛ vá ny'ɛwú nɔn. Zɛtɛn, nyɛ lɛ srɔ mɛ́n dalɛfuɛ-di-bɔ̀ Zherüzalɛmɛ̀n anmàn, Zhüde mán Samari kpɔsɔ wú hàn mán ɛnhibù kru trɔ.”

⁹ Ɛnvra léyi Zhezü dɔ́ ankà ndɔ hɔ̀n lɔ trɔ nɔn, nɛ̀n tɔhú nɛ hɔ́n anhobɩ́, kɩ yɔ lɛ fɛn yɔ nyan nɛ̀n; Zɛtɛn ɛnwì-gbú tɔ̀n wá sɛ́n y'ezì.

¹⁰ Yɔ dú Zhezü ɛnyanmɛ̀n n'anhobɩ́ hɔ́n mɛ̀n, kɩ anwrɔn anhyrɛ̀ cɔ́ ɛceci wosu nyɔn yɔ ɛtɛsɛ̀n

¹¹ kɩ kɛ dɔ́ yɔ le: “Galile-bɔ̀, cɛci kruhú kɛ̂ nyɛ́n nyɔn ɛnu lɔ nyɛ nyán anhobɩ́ɛ? Zhezü ndɔ léyi ye bɩ́ sɔhɔ́ ny'antamɛ̀n kɛ hɔ́n anhobɩ́ nɔn, ke le vru kɛ̀ vá ɔmu zri léyi nyɛ́n kán nɛ̀n nɛ hɔ̀n nɔn.”

Ɔwrɔn léyi bɩ́ Zhüda ɛyri nɔn

¹² Zɛtɛn, ɔkɔ̀hɔ̀n-wá-bɔ̀ lɔ vru ɛmɛẅi hɔ́n Zherüzalɛmɛ̀n kɩ ci “Olivie” pkò cɛ lɔ tɛ̀sɛ̀n. Ɛnpkò ndɔ lɔ dú anmán tɛsɛ̀n wacɛ̀n cá granmɛ̀n sùnàn.

¹³ Ɛnvra léyi yɔ cɔ́ Zherüzalɛmɛ̀n anmàn nɔn, yɔ hɔ́n ɔwɔndà léyi dú ɔwɔn wú, hɩ ɛnbì lɔ fɛn yɔ và yɔ dú ɛmɛ̀n nɔn. Nyàn yɔ léyi yɔ dú nanvrɛn lɔ nɔn: Piɛrɛ̀n, Zhan, Zhakɛ̀n mán Andre, Filipɛ̀n mán Toma, Bartelemi mán Matie, Zhakɛ̀n Alfe ẅì, Simɔn biakpa-wrɔn lɔ mán Zhüdɛ̀n Zhakɛ̀n ẅì.

¹⁴ Yɔ lɔ fɛn yɔ borɛkru frɛfrɛ, yɔ sɛ́n Ɔwɔ, yɔ mán wúyɔ̀ hɔ̀n, mán Mari Zhezü nɛ́n muan mán Zhezü nɛ́n muan-ẅì hɔ̀n mɛhi.

¹⁵ Ɛnbì ndɔ hɔ̀n lɔ ɔtɔ̀n, ankaẅì-bùtan-ẅɛn-bɔ̀ léyi borɛkru nɔn, yɔ dú anwrɔn ɛkoẅi-ɔwole. Piɛrɛ̀n tɔhú y'anwanzi kɩ kɛ dɔ̀ le:

¹⁶ “Anwrɔn-nɛ́n-muan-ẅì hɔ̀n, ke ji le Ɛnhɛ́n Prɔnprɔn anká-dɔ̀ léyi dú Owrú Prɔnprɔn lɔ mɛ̀n nɔn, kɛ̀ sá nmù: n'ankà-dɔ́ mɛ̀n lɔ, nɛ̀n ci Davidɛ̀n mùan mɛ̀n, nɛ́n gɔ̀ dɔ́ Zhüda léyi srɔ anwrɔn hɔ̀n léyi ẅɛn Zhezü nɔn, y'ɛyri-yé-wrɔn.

¹⁷ Zhüda dú ɔwrɔn tɔ̀n léyi dú bɔ̀ ɛmɛ̀n nɔn, kɩ b'ɔkɔ̀hɔ̀n lɔ nɛ́n mán nɛ́n cɔ́ nɛ tɛn.

¹⁸ Ɔkùa léyi ye di nɛ̀n ɔwɔɛ̀n ɛnvra léyi nɛ̀n hɛ́ Zhezü nɔn, ɔwrɔn ndɔ lɔ bɩ́ ɔkùa lɔ wɔ́ ɛkɛ̀tɛ̀ tɔ̀n; ɛkɛ̀tɛ̀ lɔ mɛ̀n, nɛ̀n sɔ́n ɛnkru ɛnhi, kɩ n'edùwrú lɔ gbɛ́ ɔmùan anwanzi mán anwanzi, kɩ ɛcòkò cüe nɛ̀n ɛntrɛa.

¹⁹ Zherüzalɛmɛ̀n anmàn-bɔ̀ yá ankà ndɔ lɔ, hán tán kɩ ye bi ɛkɛ̀tɛ̀ ndɔ lɔ ‘ɛnkrɛ̀ kɛ̀tɛ̀’.

²⁰ Tɛ́n, nyàn ankà léyi ye merɛ́n Ɔwɔ-mrɛ́n wrú lɔ mɛ̀n nɔn: ‘Ke ji le ye teze n'ɔwɔn lɔ, ô ɔwrɔn zriɛmɛ́n ke bɩ́ dú nɛ̀n ɛmɛ̀n.’ Kɩ ye vru ye merɛ́n le: ‘Ke ji le ɔwrɔn nyàntɛn ke bɩ́ n'ɔkɔ̀hɔ̀n lɔ.’

²¹ Ke ji le ɔwrɔn tɔ̀n ke dú bɔ̀ ɛmɛ̀n, ô kè di Ɛẅɛnwrɔn Zhezü wúemɛ̀n-dùfrɔ́ lɔ nɛ́n dalɛfuɛ.

²² Ɔwrɔn ndɔ lɔ, ke ji le nɛ̀n dú anwrɔn hɔ̀n léyi hɔ́n sɩ́ bɔ̀ ɛyri lɔ fɛn léyi Ɛẅɛnwrɔn Zhezü mɛhi bɔ́ cì nɔn ɔtɔ̀n, ɛnvra léyi Zhan wá nɛ̀n ɛnshi ɛnkru hàn kɩ cɔ́ ɛnbì léyi ye bɩ́ nɛ̀n yɛ sɔhɔ́ b'antamɛ̀n, ô nɛ̀n hɔ́n anhobɩ́ nɔn.”

²³ Zɛtɛn, yɛ wá anwrɔn anhyrɛ̀ ɔmùan: Zhozɛfɛ̀n, léyi ye bi Barabasɛ̀n, hɩ ye vru ye bi Zhüstüsɛ̀n, mán Matiasɛ̀n.

²⁴ Zɛtɛn fɛcüè hán Ɔwɔ-sɛ̀n ndɔ lɔ: “Ɛẅɛnwrɔn, vɛ́n léyi e nyri anwrɔn lɔ fɛn bɔrɛmɛ̀n, è yé bɔ̀ anwrɔn anhyrɛ̀ ndɔ hɔ̀n lɔ, hɩ le ɛ̀ mrɛ́n e bɩ

²⁵ ô, ɔkɔ̀hɔ̀n-wá-bɔ̀ kɔ̀hɔ̀n ndɔ lɔ mɛ̀n, kè bɩ́ ɛyri léyi Zhüda teze hɔ́n ɔkɔ̀hɔ̀n léyi nɛ̀n mrɛ́n nɛ́n bɩ̀ nɔn mɛ̀n.”

²⁶ Yɔ wá ɛnsànse kɩ ɛnsànse mrɛ́n Matiasɛ̀n nbɩ̀, kɩ ye bɩ́ nɛ̀n yɛ srɛ́n ɔkɔ̀hɔ̀n-wá-bɔ̀ ɛvá-ɔtɔ̀n ndɔ hɔ̀n lɔ.