1 Korɛntɛ̀n anmàn-bɔ̀ 1 - Ɛmɛẅi ankà ankrànkràn 2003

Ebinyan

¹ Ebinyan ndɔ lɔ dú Pɔlɛ̀n yri kɛ và, nɛ́n Pɔlɛ̀n léyi Ɔwɔ kɔrɛ̀levriemɛ̀n ye bi nɛ̀n, nɛ̀n srɔ Zhezü Krisì kɔ̀hɔ̀n-wá-wrɔn mán Sostɛnɛ̀n, bɔ́ muan-ẅì.

² Ebinyan lɔ dú Ɔwɔ-fɛcüè léyi dú korɛntɛ̀n anmàn, mán yɔ hɔ̀n léyi yɔ dú nanvrɛn hɩ y'ɛwúvà lɔ fɛn dú Ɔwɔ mɛ̀n, kɩ yɔ dú Ɔwɔ tɛn Zhezü Krisì ankaẅì-bùtan-ẅɛn mɛ̀n, mán anwrɔn hɔ̀n léyi ɛyri lɔ fɛn, Zhezü Krisì bɔ́ Ɛẅɛnwrɔn bɩ́ lɔ dú anmùan mɛ̀n, nɛ́n léyi nɛ̀n dú yɔ mán bɔ́ mɛhi bɔ́ Ɛẅɛnwrɔn nɔn:

³ Ɔwɔ léyi dú bɔ́ Zi mán Ɛẅɛnwrɔn Zhezü Krisì kɛ̀ tán nyɛ̀n nboafɔ̀n mán anwɔwɔ.

Anvrɛn léyi bɔ́ cɔ́ Krisì mɛ̀n nɔn

⁴ Mɛ tán m'Ɔwɔ ɔkùɛn ɛnvra lɔ fɛn ny'ɛkruhú, nboafɔ̀n léyi nɛ̀n tán nyɛ̀n Zhezü Krisì bɩmɛ̀n nɔn.

⁵ Annanwɔrɛ mɛ̀n lɔ, nyɛ́n mán Krisì mɛhi ny'ɔbɔ̀sɔ̀ lɔ mɛ̀n nyɛ́n di ɛnnɛ̀ncüì, anvrɛn lɔ fɛn mɛ̀n, annànnàn le ankà-dɔ̀ mán eci-nyrì lɔ fɛn.

⁶ Dalɛfuɛ léyi nyɛ́n di Krisì tɛ̀sɛ̀n nɔn wá nyɛ̀n ecüì edomɛ̀n,

⁷ hán tán kɩ Ɔwɔ cüì zriɛmɛ́n kè sɩ̀ ẅɛn nyɛ̀n ɛmian, nyɛ́n léyi nyɛ vrá ɛnbì léyi bɔ́ Ɛẅɛnwrɔn Zhezü Krisì kɛ lɛ srɔ nɔn.

⁸ Nɛ́n de nɛ lɛ ẅɛn nyɛ̀n ɛshishiemɛ̀n hàn kɩ kɛ lɛ cɔ́ ɛnkrutrɔ, ô ye bɩ́ cɔ́ eci-gbàngbàn zriɛmɛ́n ny'ɛwú hàn kɩ kɛ̀ krɔn n'ɛvá vra.

⁹ Ɔwɔ dùku bi nyɛ̀n nɛ́n ẅì Zhezü Krisì bɔ́ Ɛẅɛnwrɔn wúvà bɔ̀sɔ̀ lɔ mɛ̀n: ne di ɔmùan-zri n'ɔmùan-wá lɔ mɛ̀n.

Ɛsɔ̀nvoyan Ɔwɔ-fɛcüè-bɔ̀ mɛ̀n

¹⁰ Anwrɔn-nɛ́n-muan-ẅì hɔ̀n, mɛ sɛ́n nyɛ̀n, bɔ́ Ɛẅɛnwrɔn Zhezü Krisì bɩmɛ̀n, ɔmùan kɛ̀ krɔn nyɛ̀n, ɛsɔ̀nvoyan ke bɩ́ dú nyɛ̀n ɛmɛ̀n; nyɛ́n dú ɔbɔ̀sɔ mɛ̀n anvrɛnvrɛn, ô nyɛ́n ẅɛn ɔmùan-krɔn zri mán ankà-tro zri.

¹¹ Annanwɔrɛ mɛ̀n lɔ, nmàn-ẅì hɔ̀n, anwrɔn hɔ̀n léyi dú Kloé mɛ̀n mɛ̀n-bɔ̀ nɔn, dɔ́ mɛ̀n le annankran dú nyɛ̀n ɛmɛ̀n.

¹² Nyàn ankà léyi me ji mɛ̀n dɔ̀ nɔn: ny'ɛmɛ̀n lɔ ɔwrɔn tɔ̀n kɛ dɔ̀ le: “Mɛ̀n, mɛ̀n dú Pɔlɛ̀n tɛn”; ɔwrɔn ndɔ lɔ: “Mɛ̀n dú Apolɔsɛ̀n tɛn”; ɔwrɔn nyantɛn: “Mɛ̀n, mɛ̀n dú Piɛrɛ̀n tɛn”; kɩ ɔwrɔn nyantɛn tɔ̀n: “Kɩ mɛ tɛn mɛ̀n dú Krisì tɛn.”

¹³ Nye tro le yɛ lɛ sɔ̀nvɔyan Krisì tɛ̀a? Pɔlɛ̀n de wú ɛgbàn-hán-tɛ̀ wú ny'ɛkruhú nɛ́n? Pɔlɛ̀n bɩmɛ̀n de yɛ wá nyɛ̀n ɛnshi ɛnkru nɛ́n?

¹⁴ Mɛ tán Ɔwɔ ɔkùɛn, ny'ɛmɛ̀n lɔ, mɛ̀n sɩ̀ wà ɔwrɔn zriɛmɛ́n ɛnshi ɛnkru, ke dú kɛ kè sɩ̀ dù Kripüsɛ̀n mán Gahiüsɛ̀n.

¹⁵ Ɔmu lɔ de, ye sɩ̀ dɔ̀ le yɛ wá nyɛ̀n ɛnshi ɛnkru m'ebɩmɛ̀n.

¹⁶ Ankaẅì tɛ̀, mɛ̀n vru mɛ́n wá Stefanasɛ̀n mɛ̀n mɛ̀n-bɔ̀ ɛnshi ɛnkru, tɛ́n mɛ́n sɩ́ bútan le mɛ̀n wá ɔwrɔn nyàntɛn tɔ̀n ɛnshi ɛnkru.

¹⁷ Krisì kè sɩ̀ wá mɛ̀n ɔkɔ̀hɔ̀n mɛ̀n wá anwrɔn ɛnshi ɛnkru: nɛ̀n wá mɛ̀n ɔkɔ̀hɔ̀n mɛ̀n dɔ́ Ɛmɛẅi ankà Ankrankran lɔ, kɩ ndɔ lɔ, mɛ̀n sɩ̀ vrà anwrɔnẅì ankà-nyri-brɛ̀ lɔ, ô ɔmu lɔ, Krisì kɔrɛ̀srɔn-wù ɛgbàn-hán-tɛ̀ wú, ke bɩ́ srɔ eci kora.

Zhezü Krisì dú Ɔwɔ kɔrɛ̀srɔn mán Ɔwɔ ankà-nyrì

¹⁸ Annanwɔrɛ mɛ̀n lɔ, anwrɔn hɔ̀n léyi dú ɛzrɛ́n mɛ̀n nɔn, ke tro le, yɛ dɔ́ Krisì wú ankà ɛgbàn-hán-tɛ̀ wú hô, ndɔ lɔ dú nmù ci-hán; tɛ́n bɔ́ léyi bɔ̀ dú ɛnkrukɔrɛ̀ levri wú nɔn, bɔ́ kán Ɔwɔ kɔrɛ̀srɔn owù ndɔ lɔ mɛ̀n.

¹⁹ Nyàn ankà léyi Owrú Prɔnprɔn kɛ dɔ̀ nɔn: “Mɛ lɛ jrɛ́ ankà-nyri-bɔ̀ ankà-nyrì lɔ, mɛ lɛ kɔ́n ɛnkruemɛ̀n-ẅɛn-bɔ̀ ci-nyrì lɔ mɛ̀n cüe.”

²⁰ Zɛtɛn, ankà tán de ankà-nyri-bɔ̀ ke le vru kɛ̀ dɔ̀ nɛ́n? Kale ɛnkruemɛ̀n-ẅɛn-bɔ̀ lɔà? Kale ɛnvra ndɔ lɔ mɛ̀n ankà-bobrebe-dɔ́-bɔ̀ lɔa? Ɔwɔ yé tán le ɛnu ɛnhibù wú ankà-nyrì lɔ dú nmù ci-hán!

²¹ Annanwɔrɛ mɛ̀n, anwrɔnẅì mán y'ankà-nyrì lɔ fɛn mɛhi kè sɩ̀ cɔ̀ nyrì ɛyri léyi Ɔwɔ ke yé tán n'ankà-nyrì lɔ nɔn. Hɩ le kruhú de anwrɔn hɔ̀n léyi ẅɛn ankàẅì-bùtan, nmù ankà-dɔ̀ ci-hán ndɔ lɔ wú nɔn, Ɔwɔ wá kè bɩ̀ yɔ kè die.

²² Zhüifɛ̀n-bɔ̀ ke ji kɛ̀ kán anvɛmɛ̀n-frɛ́n-ci hɔ̀n léyi kɛ tán ankaẅì-bùtan ndɔ lɔ, kɩ Grɛkɛ̀n-bɔ̀ tɛn ke ji ankà-nyrì.

²³ Bɔ́ tɛn, bɔ́ dɔ́ Krisì léyi yɛ gɔ́n-brɛ́ ɛgbàn-hán-tɛ̀ wú nɔn n'ankà: ndɔ lɔ dú anvɛvrà-ankà tán Zhüifɛ̀n-bɔ̀ kɩ vru dú nmù ankà tán anwrɔn hɔ̀n léyi kè sɩ̀ dù Zhüifɛ̀n-bɔ̀ nɔn;

²⁴ tɛ́n anwrɔn hɔ̀n léyi Ɔwɔ bi nɔn, Zhüifɛ̀n-bɔ̀ mán yɔ léyi yɔ sɩ̀ dù Zhüifɛ̀n-bɔ̀ nɔn, Krisì dú Ɔwɔ kɔrɛ̀-srɔn mán n'ankà-nyrì.

²⁵ Ɔmuhi Ɔwɔ mù-ci-hán ẅɛn ankà-nyrì vrán anwrɔnẅì ankà-nyrì, kɩ Ɔwɔ jɛ̀-ci-hán ẅɛn ecüì vrán anwrɔnẅì cüì-ẅɛ̀n.

²⁶ Nyɛ́n tro, anwrɔn-nɛ́n-muan-ẅì hɔ̀n, eci léyi dú nyɛ̀n nɔn, nyɛ́n léyi Ɔwɔ bi nyɛ̀n nɔn: anwrɔnẅìemɛ̀n lɔ, ny'ɛmɛ̀n lɔ, ankà-nyri-bɔ̀ ẅiɛ, ɛkɔrɛ̀-srɔn-bɔ̀ ẅiɛ, ɛmɛ̀n-anvrɛnvrɛn-bɔ̀ ẅiɛ kɩ dù.

²⁷ Tɛ́n, Ɔwɔ mrɛ́n eci léyi dú nmù-ci nɔn, bɩ́ ɛnhibù zìwú, ô kɛ̀ tán ankà-nyri-bɔ̀ anvɛvrà; nɛ̀n mrɛ́n eci léyi dú ɛjɛ-ci ɛnhibù zìwú nɛ́n bɩ, ô kɛ̀ tán ecüì-bɔ̀ anvɛvrà;

²⁸ nɛ̀n mrɛ́n eci léyi dú ɛnhi, dú egbri-ci, hɩ kè sɩ̀ ẅɛ̀n vɔ̀nshɛ́ ɛnhibù zìwú nɔn nɛ́n bɩ, ô kɛ̀ jrɛ́ eci léyi ẅɛn anhàn n'ezìwú nɔn.

²⁹ Ɔmu lɔ de ɔwrɔnẅì zriɛmɛ́n ke sɩ̀ mrɛ́n n'edomɛ̀n Ɔwɔ zìwú rɔ́.

³⁰ Tɛ́n Ɔwɔ bɔsɔ nyɛ́n mán Krisì mɛhi kɩ, nɛ̀n srɔ Krisì bɔ́ ankà-nyrì: Krisì de kɛ srɔ bɔ̀ ɛnyrɔnnan-bɔ̀ Ɔwɔ zìwú kɩ kɛ mrɛ́n bɔ̀ ɛgbàn mɛ̀n kɛ sɔhɔ́.

³¹ Zɛtɛn, hán ɔmu le Owrú Prɔnprɔn kɛ dɔ̀ nɔn: “Ke dú kɛ ɔwrɔn tɔ̀n ke ji kè gbú ɔmùan hô, nɛ̀n gbú ɔmùan Ɛẅɛnwrɔn kɔrɛ̀-ci-hán wú.”