ཏི་ཏུས་ལེའུ་ 2 - རྫོང་ཁ་

ཆོས་གཞི་བརྟན་ཏོག་ཏོ་སྟོན་དགོ་པའི་སྐོར།

¹ དབའེ་ ཏི་ཏུས་ ཁྱོད་ཀྱིས་དདཔ་ཅན་ཚུ་ལུ་ ཆོས་གཞི་བརྟན་ཏོག་ཏོ་དང་མཐུན་མི་འདི་ཚུ་སྟོན་བྱིན་དགོ།

² ཁག་ཆེ་བ་རང་ ཕོ་སྐྱེས་རྒས་ཤོས་འདི་ཚུ་ལུ་ ཚད་ལས་མ་བརྒལ་ནི་དང་ ཞེ་ས་ཐོབ་ནི་འོས་འབབ་ཡོདཔ་སྦེ་སྡོད་ནི་དང་ མཚམས་ཚོད་ཤེས་ནི་དང་ དད་པ་སྒྲིང་སྒྲིང་སྦེ་བསྐྱེད་ནི་དང་ བྱམས་སེམས་བསྐྱེད་ནི་ དེ་ལས་བཟོད་པ་བསྒོམ་སྡོད་ནི་དེ་ཚུ་སྟོན་བྱིན།

³ འདི་བཟུམ་སྦེ་རང་ ཨམ་སྲུ་རྒས་ཤོས་འདི་ཚུ་ལུ་ སྤྱོད་ལམ་ལེགསཔ་སྒྲིགས་ནི་དང་ རོགས་ཀྱི་སེམས་ཁར་ཕོག་པའི་གཏམ་ཚུ་མ་སླབ་ནི་དང་ ཆང་མ་འགྲངས་ནི་ དེ་ལས་རོགས་ལུ་ལེགས་ཤོམ་ཚུ་སྟོན་ཟེར་སྟོན་བྱིན།

⁴ དེ་ལས་ཨམ་སྲུ་རྒས་ཤོས་འདི་ཚུ་གིས་ཨམ་སྲུ་གཞོནམ་ཚུ་ལུ་འདི་ཚུ་སྟོན་བྱིན་ ཁོང་རང་གི་རྨགཔ་དང་བུ་དང་བུམོ་ཚུ་ལུ་བྱམས་སེམས་བསྐྱེད་ནི་དང་།

⁵ མཚམས་ཚོད་ཤེས་ནི་དང་ སྐྱོན་ག་ནི་ཡང་མེདཔ་སྦེ་སྡོད་ནི་དང་ རང་གི་ཁྱིམ་ལེགས་ཤོམ་སྦེ་བདག་འཛིན་འཐབ་ནི་ དེ་ལས་རང་གི་རྨགཔ་གི་ ཁ་ལུ་ཉན་ཟེར་སྟོན་བྱིན་ ཁོང་ཆ་ཁྱབ་ཀྱིས་དེ་སྦེ་འབད་བ་ཅིན་ མི་ག་གིས་ཡང་ དཀོན་མཆོག་གི་གསུང་ལུ་ངན་པ་སྦེ་བརྩིས་ཏེ་ དམའ་ཕབ་མི་བརྐྱབ།

⁶ འདི་བཟུམ་སྦེ་རང་ཕོ་སྐྱེས་གཞོནམ་ཚུ་ལུ་ མཚམས་ཚོད་ཤེས་དགོ་ཟེར་སྟོན་བྱིན།།

ཏི་ཏུས་དཔེ་གཅིག་ལུ་འགྱུར་སྡོད་དགོ་པའི་སྐོར།

⁷ ཁྱོད་ཀྱིས་ག་ཅི་ནང་འབད་རུང་ བྱ་བ་སྤྱོད་ལམ་ལེགས་ཤོམ་གྱི་ དཔེ་གཅིག་ལུ་འགྱུར་དགོ་ དེ་ལས་ཁྱོད་ཀྱི་སྟོན་ཐངས་དེ་ གནད་དོན་ཕྲངམ་དང་ རོགས་ལས་ཞེ་ས་ཐོབ་ནི་འོས་འབབ་ཡོདཔ་དང་།

⁸ རོགས་ཀྱིས་སྐྱོན་བཏག་མ་ཚུགས་མི་ ཆོས་བདེན་པ་སྟོན་མི་ཅིག་དགོཔ་ཨིན་ དེ་འབདཝ་ལས་ བྱང་ཕྱད་ཚུ་གིས་ང་བཅས་ལུ་ ག་ནི་ཡང་སླབ་མ་ཚུགས་པར་ ངོ་ཚ་རིལ་རི་སྦེ་འགྱོ་འོང་།།

རྒྱོབོ་རྒྱམོ་ཚུ་གི་དོན་ལུ་བཀའ་རྒྱ།

⁹ རྒྱོབོ་རྒྱམོ་ཚུ་ཁོང་རའི་སྦྱིན་བདག་ཚུ་གི་དབང་ཚད་འོག་ལུ་སྡོད་དེ་ ཁོང་གི་ཁ་ལུ་ཉན་ནི་དང་ སྦྱིན་བདག་ལུ་སེམས་དགའ་བཅུག་ནི་དང་ སྦྱིན་བདག་ལུ་བརྒོལ་ནི་མེདཔ་དང་།

¹⁰ སྦྱིན་བདག་ནང་ལས་ཨརཝ་རྐུ་ནི་མེདཔ་གཅིག་དགོཔ་ཨིན་ དེ་གི་ཚབ་མ་ལུ་ སྦྱིན་བདག་གི་བློ་གཏད་ཚུགསཔ་སྦེ་སྡོད་མི་གཅིག་དགོཔ་ཨིན་ དེ་ལས་ང་བཅས་ཀྱི་སྐྱབས་མགོན་དཀོན་མཆོག་གི་སྐོར་ལས་ སྟོན་མིའི་ཆོས་ལུ་ མི་ག་ར་གིས་ སེམས་ཤོར་སི་སི་སྦེ་མཐོང་འོང་།།

དཀོན་མཆོག་གི་ཐུགས་རྗེ་གི་སྐོར།

¹¹ ག་ཅི་སྨོ་ཟེར་བ་ཅིན་ དཀོན་མཆོག་གིས་ ཁོ་རའི་ཐུགས་རྗེ་ མི་ག་ར་ལུ་ ཐར་པ་གནང་ནིའི་དོན་ལུ་ ཕྱི་ཁར་བཏོན་གནང་སྟེ།

¹² ཨ་ནི་ཐུགས་རྗེ་དེ་གིས་འབད་ དཀོན་མཆོག་གིས་ ཐུགས་མ་དགྱེས་མི་ལཱ་ཚུ་དང་ འཇིག་རྟེན་གྱི་འདོད་ཆགས་ཚུ་སྤང་དགོཔ་ཨིནམ་མ་ཚད་ ད་རེས་ཀྱི་དུས་སྐབས་ནང་ལུ་ མཚམས་ཚོད་ཤེས་ནི་དང་ ཕྲང་འབད་ནི་དང་ ཆོས་སེམས་བསྐྱེད་ནི་ཟེར་ ང་བཅས་ཀྱིས་ཧ་གོ།

¹³ ད་རུང་བྱིན་རླབས་ཅན་གྱི་ཉིནམ་ལུ་ཐེ་ཚོམ་མེད་པར་ ང་བཅས་རེ་བ་བསྐྱེད་སྡོད་དེ་ཡོད་ ཉིནམ་དེ་ལུ་སྐྱབས་མགོན་ཡེ་ཤུ་ཁིརཱིས་ ང་བཅས་ཀྱི་དཀོན་མཆོག་མཐོ་ཤོས་འདི་ ད་རུང་འཛམ་བུ་གླིང་ལུ་འབྱོནམ་ད་ ཁོ་གི་གཟི་བརྗིད་འདི་གནམ་མེད་ས་མེད་ འོད་ཆེམ་ཆེ་སྦེ་མཐོང་ནི་ཟེར་ང་བཅས་ཀྱིས་ཧ་གོ།

¹⁴ དཀོན་མཆོག་གིས་ང་བཅས་ལུ་ ཁོ་རའི་མི་ཚུ་དང་ལཱ་ལེགས་ཤོམ་ལུ་ སེམས་བཙུག་མིའི་མི་ཚུ་མཛད་ནི་གི་དོན་ལུ་ ལཱ་ངན་པ་ཚུ་ལས་སྐྱབས་མཛདཔ་མ་ཚད་ གཙངམ་བཟོ་ནི་གི་དོན་ལུ་ཡེ་ཤུ་ཁིརཱིས་ ཁོ་རང་ང་བཅས་ཀྱི་དོན་ལུ་གཤགས་ཅི།

¹⁵ ཨ་ནི་ལོ་རྒྱུས་དེ་ཚུ་སྟོན་བྱིན་ ཁྱོད་ཀྱི་བཀའ་རྒྱ་ལྟར་དུ་འབད་ཟེར་ཨུ་ཚུགས་རྐྱབས་ དེ་ལས་ཁྱོད་ཀྱི་བཀའ་རྒྱ་ལུ་མ་ཉན་མི་ཚུ་ལུ་ སྐྱོན་བཏོན་ནི་ནང་ སྐུ་ཚབ་ཀྱི་དབང་ཚད་ལག་ལེན་འཐབ་དགོཔ་ཨིནམ་མ་ཚད་ མི་ག་གིས་ཡང་ ཁྱོད་ལུ་ཁུངས་མེདཔ་བཟོ་མ་བཅུག།