མཐོང་སྣང་ལེའུ་ 14 - རྫོང་ཁ་

མིའི་གྱངས་ཁ་འབུམ་གཅིག་དང་བཞི་ཁྲི་བཞི་སྟོང་གིས་མགུར་མ་ཕུལ་བའི་སྐོར།

¹ ད་རུང་ང་གིས་བལྟཝ་ད་ ངེ་གི་གདོང་ཁར་གངས་རི་ ཟི་ཨཱོན་གྱི་གུ་ལུ་ ལུག་གི་ཕྱུག་ཀུ་བཞེངས་བཞུགས་ནུག་ ཁོ་དང་གཅིག་ཁར་ མི་འབུམ་གཅིག་དང་བཞི་ཁྲི་བཞི་སྟོང་གི་དཔྱལཝ་གུ་ལུ་ ཁོ་གི་མཚན་དང་ ཁོང་རང་གི་ཡབ་ཀྱི་མཚན་བྲིས་ཏེ་ཡོདཔ་ང་གིས་མཐོང་ཅི།

² དེ་ལས་ཞིང་ཁམས་ལས་ཆུ་སྐད་སྦོམ་གཅིག་དང་ འབྲུག་སྦོམ་གཅིག་འུར་སྒྲ་ལྡིརཝ་ང་གིས་གོ་ཡི་ ད་རུང་ཨ་ནི་གསུང་སྐད་འདི་ པྱི་ཝང་སྐྲོག་པའི་སྐད་བཟུམ་སྦེ་གོཝ་མས།

³ ཨ་ནི་ཁོང་མི་ཚུ་གིས་ དཀོན་མཆོག་གི་ཁྲི་དང་ སེམས་ཅན་བཞི་ རྒས་ཤོས་ཉི་ཤུ་རྩ་བཞི་གི་སྐུ་མདུན་ལུ་ མགུར་མ་གསརཔ་ཕུལཝ་ཨིན་མས་ ཨ་ནི་མགུར་མ་འདི་ ཁོང་འཛམ་བུ་གླིང་ནང་ལས་ སྲོག་བླུས་མི་ འབུམ་གཅིག་དང་བཞི་ཁྲི་བཞི་སྟོང་གིས་མ་གཏོགས་ གཞན་ག་གིས་ཡང་ འཐེན་ནི་ལྷབ་མ་ཚུགསཔ་ཨིན་མས།

⁴ ཨ་ནི་དེ་ཚུ་དམ་ཚིག་ཅན་ གཙང་ཏོག་ཏོ་སྦེ་ ན་ཆུང་མ་བཟུམ་སྦེ་ ལུག་གི་ཕྱུག་ཀུ་ག་ཏེ་བྱོན་སར་ཕྱག་ཞུ་འགྱོ་མི་ཚུ་ཨིན་ ཁོང་ཆ་ཁྱབ་དཀོན་མཆོག་དང་ལུག་གི་ཕྱུག་ཀུ་གི་དོན་ལུ་ མིའི་གྲལ་ཁ་ལས་ ལོ་ཐོག་གསར་ཕུད་བཟུམ་སྦེ་ཨིན་མས།

⁵ ཁོང་ལུ་སྐྱོན་ག་ནི་ཡང་མེདཔ་མ་ཚད་ ཁོང་གིས་ཤོབ་མ་རྐྱབ་པར་སྡོདཔ་ཨིན་མས།།

ཕོ་ཉ་གསུམ་གྱི་ཁ་འཐེན་གྱི་སྐོར།

⁶ ད་རུང་ཕོ་ཉ་གཅིག་གིས་ འཛམ་བུ་གླིང་ནང་སྡོད་མི་ཆ་ཁྱབ་ རིགས་ཚན་མ་འདྲཝ་དང་ སྐད་རིགས་མ་འདྲཝ་ མི་བརྒྱུད་མ་འདྲཝ་ མི་རིགས་མ་འདྲཝ་ ག་ར་ལུ་ མཐའ་མེད་པའི་གཏམ་བཟང་ཁྱབ་སྒྲགས་འབད་བ་ ནམ་མཁའ་ལས་འཕུར་ཏེ་འགྱོ་ས་ང་གིས་མཐོང་ཅི།

⁷ ཁོ་གིས་གསུང་སྐད་སྦོམ་སྦེ་ དཀོན་མཆོག་བལྟ་འདྲོགས་ཏེ་ ཁོ་ལུ་བསྟོད་པ་ཕུལ་དགོ་ ག་ཅི་སྨོ་ཟེར་བ་ཅིན་ ཁོ་གི་ཁྲིམས་ཕྱེ་བའི་དུས་ཚོད་འདི་ལྷོད་ཅི་ ཞིང་ཁམས་དང་འཛམ་བུ་གླིང་ རྒྱ་མཚོ་དང་ཆུ་མིག་ ག་ར་མཛད་གནང་མི་དེ་ལུ་ ཕྱག་འཚལ་ཏེ་བསྟོད་པ་ཕུལ་ཟེར་གསུངས་ཡི།

⁸ དེ་གི་ཤུལ་ལས་ ཕོ་ཉ་གཉིས་པ་འདི་འཕུར་འོངས་ཏེ་ ཁོ་གིས་ བ་བི་ལཱོན་ཁྲོམ་སྦོམ་དེ་མར་རམ་སོང་ཡི་ སེམས་ཚོར་དྲག་པོའི་སྒོ་ལས་ འདོད་ཆགས་ངན་པ་བསྐྱེད་པའི་ཆང་བཟུམ་ མི་རིགས་ག་ར་ལུ་འཐུང་བཅུག་མི་ ཁྲོམ་ བ་བི་ལཱོན་དེ་ མར་རམ་སོང་ཡི་ཟེར་གསུངས་ཡི།

⁹ དེ་ལས་ ཕོ་ཉ་གསུམ་པ་འདི་འཕུར་འོངས་ཏེ་ ཁོ་གིས་ཡང་གསུང་སྐད་སྦོམ་སྦེ་ ག་གིས་གཅན་གཟན་དང་ ཁོ་གི་སྐུ་འདྲ་འདི་ལུ་ ཕྱག་འཚལ་ཏེ་བསྟོད་པ་ཕུལ་ དེ་ལས་རང་གི་དཔྱལ་བ་ཡང་ན་ལག་པར་རྟགས་བཀལ་བཅུག་པ་ཅིན།

¹⁰ ཁོ་གིས་དཀོན་མཆོག་གི་ཐུགས་ཁྲོ་བོའི་ཆང་འདི་འཐུང་ནི་ཨིན་ འདི་ཁོ་གི་བཞེས་ཕྱག་ནང་ ཐུགས་ཁྲོ་བོའི་ཆང་གར་དྲགས་འདི་ བཀང་ཡི་ དེ་ལས་ལུག་གི་ཕྱུག་ཀུ་དང་དམ་པའི་ཕོ་ཉ་གི་གདོང་ཁར་ལུ་ ཁོ་མེ་དང་མུ་ཟི་གིས་འཚིག་སྟེ་ སྡུག་བསྔལ་མྱོང་དགོ་ཟེར་གསུངས་ཡི།

¹¹ དེ་ལས་ཨ་ནི་དེ་ཚུ་འཚིག་པའི་དུ་པ་འདི་ཨ་རྟག་རང་ཐོན་ཏེ་དྲིམ་མནམ་འོང་ ཨ་ནི་གཅན་གཟན་དང་ ཁོ་གི་སྐུ་འདྲ་ལུ་ཕྱག་འཚལ་ཏེ་བསྟོད་པ་ཕུལ་མི་དང་ ཁོ་གི་མིང་གི་རྟགས་བཀལ་བཅུག་མི་དེ་ཚུ་ བདེཝ་རྩ་ལས་རང་མེད་པར་ ཉིན་མ་དང་ནུབ་མོ་སྡུག་བསྔལ་མྱོང་དགོ།

¹² དཀོན་མཆོག་ཁོ་རའི་དམ་པའི་མི་ཚུ་ ཁོ་གི་བཀའ་ལུ་ཉན་མི་ཚུ་ ཡེ་ཤུ་ལུ་དད་པ་བསྐྱེད་དེ་སྡོད་མི་ཚུ་ བཟོད་པ་བསྒོམ་ནི་དེ་ ཁག་ཆེཝ་ཨིན།

¹³ ད་རུང་ཡང་ཞིང་ཁམས་ལས་གསུང་སྐད་གཅིག་གིས་ང་ལུ་ ད་རེས་ལས་འགོ་བཟུང་སྟེ་ གཙོ་བོ་ནང་དད་པ་བསྐྱེད་དེ་ཤི་མི་ཚུ་ བྱིན་རླབས་ཅན་ཨིན་ཟེར་ཨ་ནི་འདི་བྲི་དགོ་ཟེར་གསུངས་ཡི་ ད་རུང་ཐུགས་ཉིད་ཀྱིས་ དོན་ལས་རང་ཁོང་བྱིན་རླབས་ཅན་ཨིན་ ག་ཅི་སྨོ་ཟེར་བ་ཅིན་ ཁོང་དཀའཝ་སྤྱད་ས་ལས་ངལ་འཚོ་ཐོབ་སྟེ་ ཁོང་གིས་འབད་མི་ལཱ་ལེགས་ཤོམ་ ཁོང་རང་གི་ཤུལ་ལས་འོངམ་ཨིན་ཟེར་གསུངས་ཡི།།

ས་གཞི་ནང་གི་ལོ་ཐོག་བསྡུ་བའི་སྐོར།

¹⁴ ད་རུང་ཡང་ང་གིས་བལྟཝ་ད་ ངེ་གི་གདོང་ཁར་ལུ་ མིའི་བུ་བཟུམ་ཅིག་ ས་སྨུག་དཀརཔོ་གཅིག་གི་གུ་བཞུགས་ཏེ་ དབུ་ལུ་གསེར་གྱི་གཙུག་རྒྱན་བཞེས་ ཕྱག་ལུ་ཟོརཝ་རྣོས་ཡོད་མི་བསྣམས་མི་གཅིག་ང་གིས་མཇལ་ཡི།

¹⁵ དེ་ལས་མཆོད་ཁང་ནང་ལས་ ཕོ་ཉ་གཞན་གཅིག་ཐོན་འོངས་ཏེ་ ས་སྨུག་གི་གུ་ལུ་བཞུགས་མི་དེ་ལུ་ གསུང་སྐད་སྦོམ་སྦེ་ ས་གཞི་ནང་གི་ལོ་ཐོག་འཚོ་བའི་དུས་ཚོད་རན་ཆེ་ཡི་ ལོ་ཐོག་གནམ་མེད་ས་མེད་འཚོ་སོང་ནུག་ ད་ཟོརཝ་གིས་བརྔ་དགོ་ཟེར་གསུངས་ཡི།

¹⁶ དེ་ལས་ས་སྨུག་གུ་ལུ་བཞུགས་མི་དེ་གིས་ ཟོརཝ་བརྐྱབས་ཏེ་ས་གཞི་ནང་གི་ཐོག་བརྔ་ཡི།

¹⁷ ད་རུང་ཞིང་ཁམས་ཀྱི་མཆོད་ཁང་ནང་ལས་ ཕོ་ཉ་ལག་པ་ལུ་ཟོརཝ་རྣོས་ཅན་འབག་མི་གཞན་གཅིག་ཐོན་འོང་ཡི།

¹⁸ དེ་ལས་མཆོད་ཁྲི་ནང་ལས་ ཕོ་ཉ་གཞན་ མེའི་དབང་ཚད་ཡོད་མི་འདི་འོང་ཞིནམ་ད་ ཁོ་གིས་སྐད་སྦོམ་སྦེ་ ཟོརཝ་རྣོས་ཅན་ཡོད་མི་ཕོ་ཉ་དེ་ལུ་ ཁྱོད་ཀྱིས་ཟོརཝ་རྣོས་ཅན་བརྐྱབས་ཏེ་ ས་གཞི་ནང་གི་རྒུན་འབྲུམ་ཚུ་གཅིག་ཁར་སྤུངས་ ག་ཅི་སྨོ་ཟེར་བ་ཅིན་ འདི་གནམ་མེད་ས་མེད་འཚོ་སོང་ནུག་ཟེར་གསུངས་ཡི།

¹⁹ དེ་ལས་ ཕོ་ཉ་འདི་གིས་ཟོརཝ་བརྐྱབས་ཏེ་ ས་གཞི་ནང་གི་རྒུན་འབྲུམ་བརྔ་སྟེ་ ག་ར་གཅིག་ཁར་ཆང་བཟོ་ཁང་སྦོམ་ནང་བླུགས་ཅི་ བཟོ་ཁང་དེ་ དཀོན་མཆོག་གི་ཐུགས་ཁྲོ་བོ་གི་དཔེ་ཨིན་མས།

²⁰ དེ་ལས་ཁྲོམ་གྱི་ཕྱི་ཁར་ ཆང་བཟོ་ཁང་ནང་རྒུན་འབྲུམ་ཚུ་བཙིརཝ་ད་ ཁྲག་བཟུམ་སྦེ་ཐོན་ཏེ་ མཐོ་ཚད་རྟའི་མཐུར་གུ་ཚུན་ཚོད་དང་ ཐག་རིང་ཐུང་དཔག་ཚད་བཞི་བཅུ་དེ་ཅིག་ཚུན་ཚོད་སོང་ནུག།