མེ་ཐིའུ་ལེའུ་ 4 - རྫོང་ཁ་བདུད་ སེ་ཏཱན་གྱིས་ཡེ་ཤུ་ལུ་བར་ཆད་རྐྱབ་པའི་སྐོར། 1 འདིའི་སྐབས་ལུ་བདུད་ཀྱིས་ཡེ་ཤུ་ལུ་ཐུགས་ཚོད་བལྟ་ནིའི་དོན་ལུ་ དམ་པའི་ཐུགས་ཉིད་ཀྱིས་རྒྱུད་བསྐུལ་བརྐྱབས་ཏེ་ ཡར་རི་སྟོང་ནང་ལུ་འཁྱིད་སོང་ནུག 2 དེ་ལས་ཡེ་ཤུ་སྐུ་ཞག་བཞི་བཅུ་ སྨྱུང་གནས་བསྲུངས་ཚར་བའི་ཤུལ་ལས་ ཁོ་གསོལཝ་སྨྱུང་ནུག 3 དེ་ལས་བར་ཆད་རྐྱབ་མི་བདུད་དེ་འོང་སྦེ་ཡེ་ཤུ་ལུ་ ནཱ་དཀོན་མཆོག་གི་སྲས་ཨིན་པ་ཅིན་ ཨ་ནི་རྡོ་ཚུ་ཏད་ཟས་ལུ་འགྱུར་ཟེར་བཀའ་གནང་ཟེར་ཞུཝ་ད། 4 ཡེ་ཤུ་གིས་ལན། མི་དེ་ཚུ་བཞེས་སྒོ་རྐྱངམ་གཅིག་ལུ་བརྟེན་ཏེ་ གསོན་པོ་སྦེ་སྡོདཔ་མེན་ དེ་འབདཝ་ད་ དཀོན་མཆོག་གི་ཞལ་ལས་ གསུང་མིའི་གསུང་རེ་རེ་ལུ་བརྟེན་ཏེ་ གསོན་པོ་སྦེ་སྡོདཔ་ཨིན་ཟེར་ གསུང་རབ་ནང་བྲིས་ཏེ་ཡོད་ཟེར་ཡེ་ཤུ་གིས་གསུངས་ནུག 5 དེ་ལས་བདུད་དེ་གིས་ཡེ་ཤུ་ལུ་ དམ་པའི་རྒྱལ་ས་ ཡེ་རུ་ཤ་ལེམ་ལུ་འཁྱིད་དེ་ མཆོད་ཁང་གི་དབུ་རྩེ་གུ་བཀལ་ཞིནམ་ད། 6 ནཱ་དཀོན་མཆོག་གི་སྲས་འབད་བ་ཅིན་ ནཱ་ལས་མར་མཆོངས་ ག་ཅི་སྨོ་ཟེར་བ་ཅིན་གསུང་རབ་ནང་ལུ། དཀོན་མཆོག་ཁོ་རང་གི་ཕོ་ཉ་ཚུ་ལུ་ བཀའ་གནང་སྟེ་ ཁོང་གིས་ཁྱོད་ལུ་ལག་པར་བཟུང་སྟེ་ རྐངམ་མར་རྡོ་གུ་རྩ་ལས་རང་ ཕོག་མི་བཅུག་ཟེར་ བྲིས་ཏེ་འདུག་ཟེར་ཞུཝ་ད། 7 ད་རུང་ཡེ་ཤུ་གིས། ཁྱོད་ཀྱིས་རང་གི་གཙོ་བོ་དཀོན་མཆོག་ལུ་ ཐུགས་ཚོད་མ་བལྟ་ཟེར་ གསུང་རབ་ནང་བྲིས་ཏེ་ཡོད་ཟེར་གསུངས་ནུག 8 དེ་ལས་བདུད་ཀྱིས་ཡེ་ཤུ་གངས་རི་མཐོ་ས་གཅིག་ཁར་འཁྱིད་དེ་ འཛམ་བུ་གླིང་གི་རྒྱལ་ཁབ་ག་ར་དང་ འདི་ནང་གི་གཟི་བརྗིད་ཚུ་བཏོན་ཏེ། 9 ནཱ་གིས་ང་ལུ་ཕྱག་འཚལ་ཏེ་བསྟོད་པ་ཕུལ་བ་ཅིན་ ཨ་ནི་དེ་ཚུ་ག་ར་ང་གིས་ནཱ་ལུ་བྱིན་ནི་ཨིན་ཟེར་སླབ་ནུག 10 ཡེ་ཤུ་གིས་བདུད་ སེ་ཏཱན་ ང་ལས་ཐག་རིང་སར་སོང་ ག་ཅི་སྨོ་ཟེར་བ་ཅིན་གསུང་རབ་ནང་ལུ། ཁྱོད་རང་གི་གཙོ་བོ་དཀོན་མཆོག་རྐྱངམ་གཅིག་ལུ་ བསྟོད་པ་ཕུལ་ཏེ་ཁོ་ལུ་ཕྱག་ཞུ་ཟེར་ བྲིས་ཏེ་ཡོད་ཟེར་གསུངས་ནུག 11 དེ་ལས་བདུད་དེ་གིས་ཡེ་ཤུ་ལུ་བཞག་སྦེ་ཡར་སོངམ་ད་ ཕོ་ཉ་ཚུ་འོངས་ཏེ་ཁོ་ལུ་ཕྱག་ཞུ་ནུག། ཡེ་ཤུ་གིས་ཆོས་གསུངས་ནི་འགོ་བཙུགས་པའི་སྐོར། 12 ད་ ཡོ་ཧ་ནཱན་བཙོན་ནང་བཙུགས་ནུག་ཟེར་བའི་ལོ་རྒྱུས་འདི་ ཡེ་ཤུ་གིས་སྙན་གསནམ་ད་ ཁོ་ལུང་ཕྱོགས་ ག་ལི་ལི་ལུ་ལོག་བྱོན་ནུག 13 ཡེ་ཤུ་ཁྲོམ་ ན་ཟ་རཱེད་བཞག་སྦེ་ ཧེ་མ་ ཟེ་བུ་ལཱོན་དང་ ནཱཕ་ཏ་ལི་ཟེར་མི་ ཡ་ཧུ་ད་པའི་རིགས་བརྒྱུད་སྡོད་མི་ས་གནས་ ག་ལི་ལི་མཚོའི་ཁ་ཐུག་གི་ཁྲོམ་ ཀ་ཕཱར་ནུམ་ལུ་བྱོན་ཏེ་བཞུགས་ནུག 14 དེ་སྦེ་བྱུང་མི་འདི་ ལུང་སྟོན་པ་ ཨའི་ཟ་ཡ་གིས་གསུངསམ་བཞིན་དུ། 15 ས་ཕྱོགས་ ཟེ་བུ་ལཱོན་དང་ ནཱཕ་ཏ་ལི་དང་ མཚོའི་ཁ་ཐུག་གི་གཙང་ཆུ་ ཡཱོར་དཱན་གྱི་ཕ་ཁར་ ཕྱིའི་མི་རིགས་སྡོད་སའི་ ག་ལི་ལི་ལུ། 16 ས་ཆ་གནག་དུང་དུ་ནང་སྡོད་མི་ཚུ་གིས་ འོད་སྦོམ་གཅིག་མཐོང་འོང་ ས་ཆ་གནག་དུང་དུ་སྦེ་འཆི་བའི་གྱིབ་མ་ནང་ སྡོད་མི་ཚུ་ལུ་འོད་གཅིག་ཤར་དོ་ཟེར་ གསུངས་མི་དེ་ཚུ་གྲུབ་ནུག 17 དེའི་སྐབས་ལས་ཡེ་ཤུ་གིས་མི་ཚུ་ལུ་ སྡིག་པའི་ལཱ་སྤངས་ཏེ་སེམས་འགྱུར་ ག་ཅི་སྨོ་ཟེར་བ་ཅིན་ ཞིང་ཁམས་ཀྱི་རྒྱལ་སྲིད་ ནཱ་སྦོ་ལོགས་ཁར་ལྷོད་ཅི་ཟེར་ཆོས་གསུངས་ནི་འགོ་བཙུགས་ནུག། ཡེ་ཤུ་གིས་སློབ་མ་འགོ་དང་པ་འབོ་པའི་སྐོར། 18 ཉིནམ་གཅིག་གི་ཚེ་ ཡེ་ཤུ་ ག་ལི་ལི་མཚོའི་མཐའམ་བདའ་འབྱོནམ་ད་ པེ་ཏྲོ་ཟེར་སླབ་མི་ སི་མཱོན་དང་ ཁོ་གི་ནུ་གཅུང་ ཨཱན་དྲུ་ཟེར་མི་སྤུན་གཉིས་ ཁོང་ཉ་རོགསཔ་ཨིནམ་ལས་མཚོ་ནང་དྲྭཝ་རྐྱབ་སྡོདཔ་ཡེ་ཤུ་གིས་གཟིགས་ནུག 19 ཡེ་ཤུ་གིས་ཁོང་ལུ་ ཁྱེད་ང་དང་གཅིག་ཁར་ཤོག་ ང་གིས་ཁྱེད་ལུ་མི་བཟུང་ནི་སྟོན་བྱིན་འོང་ཟེར་གསུངས་ནུག 20 དེ་འཕྲོ་ལས་ ཁོང་རང་གི་དྲྭཝ་བཀོག་བཞག་སྦེ་ཡེ་ཤུ་གི་སློབ་མ་སྦེ་སོང་ནུག 21 དེ་ལས་ཨ་ཙི་ཕར་འབྱོནམ་ད་ ཟེ་བེ་དི་གི་བུ་ ཡ་ཀོབ་དང་ཁོ་གི་སྤུན་ཆ་ ཡོ་ཧ་ནཱན་གཉིས་ ཁོང་རང་གི་ཨ་པ་དང་གཅིག་ཁར་གྲུ་ནང་ལུ་དྲྭཝ་ གྲ་སྒྲིག་རྐྱབ་སྡོད་ས་གཟིགས་ཏེ་ ཡེ་ཤུ་གིས་ཁོང་ལུ་ཤོག་ཟེར་གསུངསམ་ད། 22 དེ་འཕྲོ་ལས་ ཁོང་རང་གི་ཨ་པ་དང་གྲུ་བཀོག་བཞག་སྦེ་ ཡེ་ཤུ་གི་སློབ་མ་སྦེ་སོང་ནུག། ཡེ་ཤུ་གིས་ ག་ལི་ལི་གི་གཡུས་ཚན་ནང་ཕྱག་ལཱ་མཛད་པའི་སྐོར། 23 ཡེ་ཤུ་ ག་ལི་ལི་གི་གཡུས་ཚན་ག་ར་དང་ སི་ན་གོག་ཚུ་ནང་བྱོན་ཏེ་ཆོས་སྟོན་གནང་ནི་དང་ རྒྱལ་སྲིད་ཀྱི་སྐོར་ལས་གཏམ་བཟང་གསུངསམ་མ་ཚད་ ནད་རིགས་ལྷམ་པ་སྣ་ཚོགས་ ན་མི་ཚུ་ག་ར་ལུ་ཁོ་གིས་དྲགཔ་མཛད་གནང་ནུག 24 ཁོ་གིས་མཛད་མི་ཧ་ལས་པའི་ཕྱག་ལཱ་ཚུ་གི་སྐོར་ལས་ སི་རི་ཡ་གི་ལུང་ཕྱོགས་ག་ར་ནང་ཁྱབ་སོང་ནུག་ དེ་ལས་མི་ཚུ་གིས་མི་ནད་སྣ་ཚོགས་ན་མི་དང་ ན་ཟུག་རྐྱབ་མི་ འདྲེ་གདོན་འཛུལ་མི་ བརྒྱལ་ནད་ལོང་མི་ གཟུགས་ཞར་སོང་མི་ག་ར་ལུ་ ཡེ་ཤུ་བཞུགས་སར་འབག་འོངས་ཏེ་ ཁོ་གིས་ཁོང་ག་ར་དྲགཔ་མཛད་ནུག 25 དེ་ལས་ ག་ལི་ལི་གི་ལུང་ཕྱོགས་དང་ དེ་ཀ་པོ་ལཱིས་ཟེར་མི་ཁྲོམ་བཅུ་ཐམ་ རྒྱལ་ས་ ཡེ་རུ་ཤ་ལེམ་ ཡུ་དེ་ཡ་ལུང་ཕྱོགས་ གཙང་ཆུ་ ཡཱོར་དཱན་གྱི་ཕ་ཁར་ལས་ མི་ཚོགས་ལེ་ཤ་གིས་ཡེ་ཤུ་གི་རྟིང་བདའ་སྟེ་འོངས་ནུག། |
© 2012, Wycliffe Bible Translators, Inc. All rights reserved
Wycliffe Bible Translators, Inc.