ཧིབ་རུ་ལེའུ་ 8 - རྫོང་ཁ་

མཁན་ཆེན་གསརཔ་དང་ཞལ་འཆེས་གསརཔ་གི་སྐོར།

¹ ད་ལྟོ་ང་བཅས་ཀྱིས་སླབ་མི་བློ་གི་དོན་དག་ངོ་མ་དེ་ ང་བཅས་ལུ་ཨ་ནི་བཟུམ་གྱི་མཁན་ཆེན་དེ་ ཞིང་ཁམས་ལུ་ བླ་ན་མེད་པའི་དཀོན་མཆོག་གི་ཕྱག་གཡས་ཁ་ཐུག་ ཁྲི་གུ་བཞུགས་ཏེ་ཡོད།

² གཙོ་བོ་གིས་བཞེངས་གནང་མི་གུར་ཁང་ངོ་མ་ ཡང་དག་པའི་ས་གནས་དེ་ནང་ ཁོ་ཞབས་ཏོག་ཞུ་སྟེ་ཡོད་ དེ་མི་གིས་བཟོ་སྟེ་ཡོད་མི་བཞུགས་ས་མེན།

³ མཁན་ཆེན་རེ་རེ་ལུ་ ཕུལ་ཆ་དང་དམར་མཆོད་ཕུལ་ནི་གི་འགན་ཁུར་བཀལ་ཡོདཔ་ཨིན་མས་ འདི་གིས་འབད་ ང་བཅས་ཀྱི་མཁན་ཆེན་གྱིས་ཡང་ དཀོན་མཆོག་ལུ་ག་ཅི་གཅིག་ཕུལ་དགོཔ་ཨིན་མས།

⁴ ག་དེམ་ཅིག་སྦེ་ ཡེ་ཤུ་ནཱ་འཛམ་བུ་གླིང་ནང་བཞུགས་ཏེ་ཡོད་པ་ཅིན་ བཀའ་ཁྲིམས་བཞིན་དུ་ མཆོད་པ་ཕུལ་མིའི་བླམ་དེ་ཚུ་ཡོད་ནི་འདི་གིས་ ཁོ་བླམ་ལུ་རྩ་ལས་རང་ མ་འགྱུརཝ་འོང་།

⁵ ཁོང་མཁན་ཆེན་ཚུ་གིས་ ཞིང་ཁམས་ནང་ཡོད་མི་གུར་ཁང་ངོ་མ་གི་འདྲ་བཟོ་དང་ གྱིབ་མ་བཟུམ་གྱི་ནང་ལུ་རྐྱངམ་གཅིག་ ཞབས་ཏོག་ཞུཝ་ཨིན་ ག་ཅི་སྨོ་ཟེར་བ་ཅིན་ མོ་སཱེས་ཀྱིས་ དམ་པའི་གུར་ཁང་བཞེངས་ནི་འབདཝ་ད་ དཀོན་མཆོག་གིས་ཁོ་ལུ་ ང་གིས་ཁྱོད་ལུ་ཡར་གངས་རི་གུ་སྟོན་མིའི་བཟོ་རྣམ་བཟུམ་སྦེ་ ཁྱོད་ཀྱིས་ག་ར་བཟོ་དགོ་ཟེར་བཀའ་གནང་ནུག

⁶ དེ་འབདཝ་ད་ ཡེ་ཤུ་ལུ་གནང་མི་ བླམ་གྱི་ལཱ་དེ་ བླམ་གཞན་ཚུ་ལས་འཕྱདཔ་ད་ ག་ར་ལས་མཐོ་ ག་ཅི་སྨོ་ཟེར་བ་ཅིན་ མོ་སཱེས་ལས་རྒྱུད་དེ་ ཞལ་འཆེས་རྙིངཔ་གནང་མི་འདི་བ་ལས་ ཡེ་ཤུ་ལས་རྒྱུད་དེ་ དཀོན་མཆོག་དང་མི་གི་བར་ན་འཆམ་ཁ་མཛད་མི་ཞལ་འཆེས་གསརཔ་དེ་ མཐོ་ ཨ་ནི་ཞལ་འཆེས་གསརཔ་དེ་ ཁས་བླངས་མཐོ་ཤོས་གཅིག་གུ་གཞི་བཙུགས་མཛད་ནུག

⁷ ད་འགོ་དང་པ་གི་ཞལ་འཆེས་དེ་ ནོར་འཁྲུལ་དང་སྐྱོན་མེད་མི་གཅིག་ཨིན་པ་ཅིན་ ཞལ་འཆེས་གཉིས་པ་དེ་བཟོ་དགོཔ་རང་མིན་འདུག

⁸ ག་ཅི་སྨོ་ཟེར་བ་ཅིན་ གཙོ་བོ་དཀོན་མཆོག་གིས་མི་དེ་ཚུ་གི་སྐྱོན་གཟིགས་ཏེ་ ལུང་སྟོན་པ་ལས་རྒྱུད་དེ་ དེ་སྦེ་གསུངས་ནུག གཙོ་བོ་གིས་གསུངས་དོ་ ཨཱིས་ར་ཨཱེལ་དང་ ཡུ་ད་ ཁོང་མི་ཚན་གཉིས་ དང་གཅིག་ཁར་ ཞལ་འཆེས་གསརཔ་གཅིག་བཟོ་ནི་གི་དུས་ཚོད་འོང་དོ།

⁹ ཨ་ནི་ཞལ་འཆེས་དེ་ ང་གིས་ཁོང་གི་ཕ་བརྒྱུད་ཚུ་ལུ་ ཨི་ཇིབ་རྒྱལ་ཁབ་ནང་ལས་ ལགཔ་བཤེད་དེ་འཁྱིད་འོངམ་ད་ ཁོང་དང་གཅིག་ཁར་བཟོ་མི་ཞལ་འཆེས་བཟུམ་སྦེ་མི་འབྱུང་ ག་ཅི་སྨོ་ཟེར་བ་ཅིན་ ཁོང་ངེ་གི་ཞལ་འཆེས་ནང་བརྟན་ཏོག་ཏོ་སྦེ་མ་སྡོད་ འདི་གིས་འབད་ ང་གིས་ཁོང་ལུ་སྣང་བདག་མ་བསྐྱེད་པར་བཞག་ཅི།

¹⁰ དེ་འབདཝ་ད་ གཙོ་བོ་གིས་ དུས་ཚོད་དེའི་ཤུལ་ལས་ ངེ་གི་མི་རིགས་ ཨཱིས་ར་ཨཱེལ་པ་དང་གཅིག་ཁར་ཨ་ནི་ཞལ་འཆེས་གསརཔ་བཟོ་ནི་ཨིན་ ཁོང་གི་སེམས་ནང་ལུ་ ངེ་གི་བཀའ་ཁྲིམས་བཙུག་བྱིན་ནི་ཨིན་ དེ་ལས་ངེ་གི་བཀའ་དེ་ ཁོང་གི་ཧིང་ནང་ལུ་ འབྲི་བྱིན་ནི་ཨིན་ ང་ཁོང་གི་དཀོན་མཆོག་དང་ ཁོང་ངེ་གི་མི་སྦེ་འགྱུར་ནི་ཨིན།

¹¹ ད་ནཱ་ལས་ཕར་ མི་ག་གིས་ཡང་ རང་གི་ཁྱིམ་ཚང་ ཡང་ན་ རང་གི་ཕོ་རྒནམ་དང་ནུ་གཅུང་ཚུ་ལུ་ གཙོ་བོ་ངོ་ཤེས་དགོ་ཟེར་ ད་རུང་ཡང་སྟོན་བྱིན་མི་དགོ་ ག་ཅི་སྨོ་ཟེར་བ་ཅིན་ ཆུང་ཀུ་ཚུ་ལས་འགོ་བཟུང་སྟེ་ སྦོམ་ཚུན་ཚོད་ཀྱིས་ ང་ངོ་ཤེས་འོང་།

¹² ང་གིས་ ཁོང་གི་ཉེས་པ་ཚུ་ བཀའ་དྲིན་བསྐྱང་ནི་ཨིན་ དེ་ལས་ཁོང་གི་སྡིག་པ་ཚུ་ ང་གིས་ལོག་སྟེ་ ནམ་ཡང་སེམས་ཁར་མི་དྲན་ཟེར་གསུངས་ནུག

¹³ གཙོ་བོ་དཀོན་མཆོག་གིས་ ཨ་ནི་ཞལ་འཆེས་དེ་ལུ་ གསརཔ་ཟེར་བཏགས་གནང་ཞིནམ་ད་ ཧེ་མ་གི་ཞལ་འཆེས་དེ་ དགོས་མཁོ་མེདཔ་སྦེ་མཛད་གནང་ནུག་ དེ་ལས་དགོས་མཁོ་མེད་མི་དང་རྙིངམ་ཐལ་མི་དེ་ མགྱོགས་པ་རང་ཡལ་འགྱོ་ནི་ཨིན།།