ཀོ་རཱིན་ཐི་གཉིས་པ་ལེའུ་ 13 - རྫོང་ཁ་

པའུལ་གྱིས་མཐའན་མཇུག་གི་བསླབ་བྱ་གི་སྐོར།

¹ ད་ ང་ཁྱེད་སྡོད་སར་འོང་ནི་འདི་ ཐེངས་གསུམ་པ་ཨིན། མི་གཉིས་ཡང་ན་གསུམ་འཛོམ་དཔང་འབད་དེ་ སླབ་མི་ལོ་རྒྱུས་བདེན་པ་སྦེ་སྡོད་འོང་ཟེར་ གསུང་རབ་ནང་བྲིས་དོཝ་བཟུམ་སྦེ་ ཁྱེད་ཀྱིས་དྲན་པ་བཏོན་དགོ།

² ང་ཧེ་མ་ཐེངས་གཉིས་པ་ ཁྱེད་སྡོད་སར་འོངས་ཏེ་ ཧེ་མ་སྡིག་པ་ནང་སྡོད་མི་ཚུ་ལུ་ཉེན་བརྡ་འབད་ཡི་ ད་རུང་ཡང་ཧེ་མ་བཟུམ་སྦེ་རང་ ཁོང་ཆ་ཁྱབ་དང་གཞན་ག་ར་ལུ་ ང་གིས་ ད་ལྟོ་ཐག་རིང་ས་ལས་ཉེན་བརྡ་འབད་དོ་ ང་ཐེངས་གསུམ་པ་འོངམ་ད་ ཁོང་ལུ་སྙིང་རྗེ་མི་བསྐྱེད་ཟེར་སླབ་ནི་ཨིན།

³ ཁིརཱིས་ཀྱིས་ ང་ལས་རྒྱུད་དེ་གསུངས་མིའི་ཁུངས་འདི་ ཁྱེད་ཀྱིས་འཚོལཝ་ཨིན་ན་ ཁིརཱིས་ཀྱིས་ ཁྱེད་དང་གཅིག་ཁར་ འབྲེལ་བ་འཐབ་ད་ ཤུགས་མེདཔ་མེན་ ཁོ་ཁྱེད་ཀྱི་སྦུག་ལུ་དབང་ཤུགས་ཅན་གཅིག་ཨིན།

⁴ ག་ཅི་སྨོ་ཟེར་བ་ཅིན་ ཁོ་དོན་ལས་རང་ སྟོབས་ཤུགས་ཞན་པའི་ཐོག་ལས་ ཁྲམ་ཤིང་གུ་བཀྲོངས་ཅི་ དེ་འབདཝ་ད་ དཀོན་མཆོག་གི་དབང་ཤུགས་ཀྱིས་ ཁོ་སྐུ་གསོན་པོ་བཞུགས་ཡོད་ དེ་བཟུམ་སྦེ་ ང་བཅས་ཁོ་གི་ནང་སྟོབས་ཞན་འཁོགས་ཨིན་རུང་ དཀོན་མཆོག་གིས་དབང་ཤུགས་ལས་བརྟེན་ ང་བཅས་ཁོ་དང་གཅིག་ཁར་སྡོད་འོང་ ཨ་ནི་དབང་ཤུགས་དེ་གིས་ ང་བཅས་ཁྱེད་ཀྱི་སྦུག་ལུ་ལཱ་འབད་ནི་ཨིན།

⁵ ད་ ཁྱེད་དད་པ་ནང་ཏན་ཏན་ཡོད་ག་མེད་ ཁྱེད་ཀྱིས་ ཁྱེད་རང་བརྟག་ཞིབ་འབད་དེ་བལྟ་དགོ་ རང་གིས་རང་ལུ་བལྟོ་དགོ་ ཡང་ན་ ག་དེམ་ཅིག་སྦེ་ ཁིརཱིས་ཁྱེད་ཀྱི་ནང་ན་བཞུགས་ཡོདཔ་ མ་དྲན་པ་ཅིན་ ཁྱེད་ཀྱིས་བརྟག་ཞིབ་འབད་ས་ལས་ འཐུས་ཤོརཝ་ཨིན།

⁶ ད་ ང་བཅས་ལུ་བརྟག་ཞིབ་འབད་བལྟཝ་ད་ འཐུས་མ་ཤོར་མི་སྦེ་ ཁྱེད་ཀྱིས་མཐོང་འོང་ཟེར་ ང་ལུ་རེ་བ་ཡོད།

⁷ ད་ ང་བཅས་ཀྱིས་དཀོན་མཆོག་ལུ་སྨོན་ལམ་ཞུཝ་ཨིན་ ཁྱེད་ཀྱི་སྦུག་ལུ་དབང་ཤུགས་དེ་ ཕྱི་ཁར་གཞན་གྱི་མཐོང་སར་ སྟོན་ནི་གི་ཚབ་ལུ་ ང་བཅས་འཐུས་ཤོར་སོངམ་བཟུམ་སྦེ་མཐོང་རུང་ ཁྱེད་ཀྱིས་འཛོལ་བ་ག་ནི་ཡང་འབད་མ་བཅུག་པར་ ག་ཀྲིག་ཀྲི་ཨིན་མི་འདི་ འབད་བཅུག་ཟེར་ ཞུཝ་ཨིན།

⁸ ག་ཅི་སྨོ་ཟེར་བ་ཅིན་ ང་བཅས་ཀྱིས་ བདེན་པ་འདི་ལུ་རྒོལ་ཏེ་ ག་ནི་ཡང་འབད་མི་ཚུགས་ དེ་འབདཝ་ད་ བདེན་པ་གི་ཁ་ཐུག་ལས་རྐྱངམ་གཅིག་ ལཱ་འབད་ཚུགསཔ་ཨིན།

⁹ ང་བཅས་ སྟོབས་ཤུགས་མེད་པར་ཞན་འཁོགས་སྦེ་སྡོདཔ་ད་ ཁྱེད་ཀྱི་སྟོབས་ཤུགས་སྒྲིང་སྒྲིང་སྦེ་འགྱོ་བ་ཅིན་ ང་བཅས་སེམས་དགའཝ་ཨིན་ མ་པ་ཁྱེད་དདཔ་ནང་ཚངམ་སྦེ་ འགྱོ་བཅུག་ཟེར་ ང་བཅས་ཀྱིས་སྨོན་ལམ་ཞུཝ་ཨིན།

¹⁰ དེ་གིས་འབད་ ང་ཁྱེད་ལས་ཐག་རིང་སར་འབདཝ་ད་ ལོ་རྒྱུས་འདི་ཚུ་ ཡི་གུ་ནང་བྲིས་དགོ་མི་དོན་དག་དེ་ ང་ཕར་ཁྱེད་སྡོད་སར་ལྷོདཔ་ད་ འདི་བཟུམ་མའི་ སེམས་ཁར་ཕོག་ནི་གི་བློ་ཚུ་སླབ་མི་དགོ་ ཡང་ན་ གཙོ་བོ་གིས་ང་ལུ་གནང་མི་དབང་ཚད་ འདི་བཏོན་ཏེ་ ཁྱེད་ལུ་ཉེས་ཁྲིམས་བཀལ་མི་དགོ་ ག་ཅི་སྨོ་ཟེར་བ་ཅིན་ དབང་ཚད་འདི་གིས་ཁྱེད་ལུ་ ཡར་རྒྱས་གཏང་ནི་མ་གཏོགས་ ཁྱེད་མེདཔ་ཐལ་བཅུག་ནི་གི་དོན་ལུ་མེན།།

མཐའན་མཇུག་གི་བཀྲིས་ལེགས་སྨོན་གྱི་སྐོར།

¹¹ ངེ་གི་བྱམས་པའི་སྤུན་ཆ་ཚུ་ ཨ་ནི་ཡི་གུ་ནང་ ངེ་གི་མཐའན་མཇུག་གི་ བསླབ་བྱ་འདི་མཇུག་བསྡུ་ནི་ཨིན་ ད་ སེམས་དགའ་སྤྲོ་འགྱུར་དགོ་ ཁྱེད་རང་གི་སྤྱོད་ལམ་ཚུ་འགྱུར་དགོ་ གཅིག་གིས་གཅིག་ལུ་སེམས་གསོ་འབད་དགོ་ སེམས་གཅིག་གི་ཐོག་ལས་ཞི་བདེ་ནང་སྡོད་དགོ་ དེ་ལས་བྱམས་དང་ཞི་བདེ་ཨིན་མི་དཀོན་མཆོག་ ཁྱེད་དང་གཅིག་ཁར་བཞུགས་འོང་།

¹² དམ་ཚིག་གཙང་མིའི་སྒོ་ལས་ གཅིག་གིས་གཅིག་ལུ་ སྐུ་གཟུགས་བཟང་པོ་ཟེར་ཞུ་ ནཱ་ལུ་ཡོད་མི་ དཀོན་མཆོག་ཁོ་རའི་དམ་པའི་མི་ག་ར་གིས་ ཁྱེད་ལུ་སྐུ་གཟུགས་བཟང་པོ་ཟེར་སླབ་དེས།

¹³ ད་ གཙོ་བོ་ཡེ་ཤུ་ཁིརཱིས་ཀྱི་ཐུགས་རྗེ་དང་ དཀོན་མཆོག་གི་བྱམས་པ་དང་ དམ་པའི་ཐུགས་ཉིད་ཀྱི་མཐུན་ལམ་ ཁྱེད་ག་ར་དང་གཅིག་ཁར་ བཞུགས་པར་ཤོག། །།