રોમન પત્રો 3 - દુબલી નવો કરાર

¹ તા ફાચે યહુદી માંહુ વેરુલો કાય ફાયદો, આને સુન્નત કરુલો કાય ફાયદો?

² એક યહુદી માંહુ વેરુલો ખુબુજ લાભ હાય, બાદા કેતા વાદારે ખાશ ગોઠ એ હાય કા પરમેહેરુ વચન તીયાહાને હોપવામે આલોહો.

³ કાદાચ થોડાક યહુદી લોકુહુ પરમેહેરુ આરી વિશ્વાસઘાત કેયો તા કાય વીયો? કાય તીયાં વિશ્વાસઘાત કેરુલોકી પરમેહેર તીયાં વાયદાલે પુરો કેરા ખાતુરે લોકુ આરી વિશ્વાસઘાત કેરી.

⁴ નાય કીદીહીજ નાય? પરમેહેર હાચો ગોગેહે આને દરેક માંહુ ઝુટો ઠેરેહે, જેહેકી પવિત્રશાસ્ત્રમે પરમેહેરુ વિશે લેખલો હાય, “જીયાકી તુ પોતા આખલી ગોઠીમે ધર્મી ઠેહરો આને ન્યાય કેરુલો સમયુલે તુ જાય પામો.”

^5-6 પેન કાદાચ આપુ ખોટા કામે પરમેહેરુ ધાર્મિકતાલે જાહેર કેહે, તા આમુહુ કાય આખજી? કાય ઇ કા પરમેહેરુ ક્રોધ કેરુલો આને આપનેહે દંડ દેવુલો ગલત હાય. નાહ કીદીહીજ નાહ, ઇ તા માંહા રીતી અનુસાર આખુહુ. કાદાચ પરમેહેર ગલત હાય તા તોઅ જગતુ લોકુ ન્યાય કેહેકી કેરી.

⁷ થોડાક લોક આખી સેક્તાહા, કાદાચ માઅ ઝુટો ગોગાકી પરમેહેરુ સત્યલે વાદારે મહિમા મીલેહે, તા આંય પરમેહેરુ નજરીમે એક પાપી માંહા સારકો કાહા ગોણામે આવુ?

⁸ આમુહુ આખી સેક્તાહા, “આવા આપુહુ ખોટે કામે કેજી કા ઇયાકી ભલાય નીંગે,” જેહેકી કા આમાપે ઓ દોષ લાગવામે આવેહે, કા આમુહુ એહેકી માનતાહા. પેન જે લોક માઅ વિશે એહેડી ગોઠ કેહે તે દંડુ લાયક હાય.

કેડોજ ધર્મી નાહ

⁹ તા ફાચે આમુહુ કાય આખી સેક્તાહા? કાય આમુહુ યહુદી લોક અન્યજાતિ લોકુસે હારા હાય? નાહ બિલકુલ નાહ, કાહાકા આમુહુ ઓ દોષ લાગવી ચુક્યાહા કા લાગે યહુદી લોક નેતા અન્યજાતિ વેરી, બાદાજ પાપુજ શક્તિ વશુમે હાય.

¹⁰ જેહેકી પવિત્રશાસ્ત્રમે લેખલો હાય, “પરમેહેરુ નજરીમે કેડો બી ધર્મી નાહ એક બી નાહ.

¹¹ એહેડો કેલ્લોજ માંહુ નાહ જો ખરેખર સત્ય કાય હાય તીયાલે હોમજેહે, કેડોજ બી પરમેહેરુલે જાંણા નાહ માગતો.

¹² બાદાહાજ પરમેહેરુપે વિશ્વાસ કેરા છોડી દેદોહો, બાદાજ પરમેહેરુ માટે નક્કામા બોની ગીયાહા, કેડો બી ભલાય કેનારો નાહ, એક બી નાહ.”

¹³ તીયાં ગોઠયા ખુલ્લી કબરુમેને આવનારી ગંદકી હોચે હાય, તે હમેશા ઝુટો ગોગતાહા, તીયાં ગોગુલો હાપળા જેરુ હોચે હાય, જે લોકુ નુકશાન કેતાહા, આને મોતુ કારણ બોનતાહા.

¹⁴ તીયાં મુયુમેને સાદા શ્રાપ આને કોળવ્યા ગોઠયા નીગત્યાહા.

¹⁵ તે લોક નુકશાન કેરા આને ખુન કેરા ઉતવાલ કેતાહા.

¹⁶ તે જીહી બી જાતાહા, તીહી નુકશાન કી ટાકતાહા, આને દુઃખ લાવતાહા.

¹⁷ તે શાંતિકી રેવુલો નાહ જાંતા.

¹⁸ તીયા ડોંઆમે પરમેહેરુ પ્રેમ આને ભય હાયજ નાહ.

¹⁹ આમુહુ જાંતાહા કા જે મુસા નિયમ હિકવુનારા આખતાહા, તોઅ તીયાહાનુજ આખેહે, તીયા નિયમુલે માનતાહા, ઈયા ખાતુરે કા દરેક માંહુ બાંનો કેરા કી રોકી સેકે, આને જગતુ બાદા લોક પરમેહેરુ દંડુ યોગ્યો ઠેહરે.

²⁰ કાહાકા કા ખાલી મુસા નિયમુ પાલન કેરા કી કેલ્લો બી માંહુ ધર્મી નાહ ઠેહરુતો, ઇયાં ખાતુરે કા મુસા નિયમુકી ખબર પોળેહે કા આપુહુ પાપી હાય.

વિશ્વાસુ મારફતે ધાર્મિકતા

²¹ પેન આમી મુસા નિયમશાસ્ત્ર પાલન કેયા વગર આમુહુ પરમેહેરુ મારફતે ધર્મી બોનાવામે આલાહા, ઇ ખુબુજ પેલ્લા મુસા નિયમુમે આને ભવિષ્યવક્તા ચોપળીમે ઇ બાદો લેખલો હાય, કા પરમેહેરુહુ આપનેહે કેહેકી ધર્મી બોનાવ્યા.

²² એટલે જાંહા આપુહુ પ્રભુ ઇસુ ખ્રિસ્તુપે વિશ્વાસ કેતાહા, તાંહા પરમેહેરુ મારફતે ધર્મી બોનાવામે આવેહે.

²³ ઈયા ખાતુરે કા બાદા લોકુહુ પાપ કેયોહો, આને પરમેહેરુ મહિમાકી દુર હાય.

²⁴ પેન પરમેહેરુ કૃપાકી આપુહુ ઇસુ ખ્રિસ્તુ મારફતે આપુ પાપુ દંડુકી છોડાવ્યાહા, મફતુમે પરમેહેરુ મારફતે ધર્મી ઠેરવામે આલાહા.

²⁵ ઇસુ ખ્રિસ્તુલે પરમેહેરુહુ તીયા રોગુતુ પેર્યા વિશ્વાસુ મારફતે લોકુ માટે બલિદાનુ રુપુમે આપી દેદોહો, કી જો પાપ માંહા મારફતે વિતલા સમયુમે કેરામે આલોહો, આને જીયાપે પરમેહેરુહુ પોતા સહનસીલતાકી ધ્યાન નાહ આપ્યો, તીયા વિશે તે પોતા ધાર્મિકતા જાહેર કે.

²⁶ કા ઈયા સમયુલે પોતા ધાર્મિકતા જાહેર કે, કા જીયાકી તોઅ પોતે ધર્મી ઠેહરે, આને જો ઇસુ ખ્રિસ્તુપે વિશ્વાસ કે તીયાહાને બી ધર્મી ઠેરવુનારો બોને.

²⁷ તા એહેડો કાંવીહી હાય જીયા વિશે આપુહુ ઘમંડ કી સેક્જી? એહેડો કાયજ નાહ. કાદાચ હાય તા કેલ્લા નિયમુ લીદે? કાય ઇ કારણ હાય આપુહુ મુસા નિયમુ પાલન કેતાહા? નાહ બિલકુલ નાહ, પેન ખ્રિસ્તુપે આપુ વિશ્વાસુ આધારુપે હાય.

²⁸ ઈયા ખાતુરે આમુહુ જાંતાહા, કા માંહુ મુસા નિયમુ પાલન કેરુલો મારફતે નાહ, પેન આમા વિશ્વાસુ મારફતે પરમેહેર ધર્મી ઠેરવેહે.

²⁹ પરમેહેર ખાલી યહુદી લોકુ ઓતોજ નાહ, પેન અન્યજાતિ લોકુ બી પરમેહેર હાય.

³⁰ કાહાકા કા એકુજ પરમેહેર હાય, જો સુન્નત કેલાહાને વિશ્વાસ કેરુલોકી આને સુન્નત કેયા વોગર્યાહાને બી વિશ્વાસ કેરુલોકી ધર્મી ઠેરવેહે.

³¹ તા કાય આમુહુ મુસા નિયમુલે વિશ્વાસુ મારફતે મીટવી દેતાહા? નાહ બિલકુલ નાહ, પેન આપુહુ મુસા નિયમુલે સ્થાપિત કેતાહા.