રોમન પત્રો 16 - દુબલી નવો કરાર

વ્યક્તિગત રીતીકી નમસ્કાર

¹ આંય પોતા આરી વિશ્વાસી બોય ફેબી વિશે જાણકારી આપુહુ, જે કિંખ્રીયા શેહેરુ મંડળીમે સેવા કેહે, આને માઅ ઈચ્છા હાય કા તુમુહુ તીયુ આદર આપા.

² પ્રભુ લોકુ વિશે જોજે, ઈયુ રીતી તુમુહુ પ્રભુ નામુકી તીયા સ્વાગત કેજા. આને કેલ્લીજ ગોઠીમે તીયુલે તુમા જરુરત પોળે તા તીયુ મદદ કેજા, કાહાકા તીયુહુ ખુબુજ લોકુ આને માઅ મદદ કેયીહી.

³ ઇસુ ખ્રિસ્તુ સેવા વિશે માઅ મદદ કેનારે પ્રિસ્કીલા આને તીયુ કોઅવાલો અકિલાલે માઅ વેલેને નમસ્કાર.

⁴ તીયાહા માઅ જીવન વાચાવા ખાતુરે પોતાજ જીવન જોખિમુમે ટાકી દેદો, ઈયા ખાતુરે આંય આને અન્યજાતિ બાદી મંડળી લોક તીયાં ધન્યવાદ કેતાહા.

⁵ આને તીયાં કોમે ચાલનારી મંડળીલે બી નમસ્કાર. આને આસિયા વિસ્તારુમે બાદા પેલ્લા ઇસુ ખ્રિસ્તુપે વિશ્વાસ કેનારા, માઅ મેરાલા ઇપેનીતુસુલે નમસ્કાર.

⁶ મરિયમુલે બી નમસ્કાર કેજે, જીયુ માઅ ભલાયુ માટે ખુબુજ મેહનત કેયીહી.

⁷ આને અન્દ્રિનીકુસુલે આને યુનાસુલે માઅ નમસ્કાર જે માઅ કુટુંબુ હાય, આને માઅ આરી જેલુમે બી ટાકવામે આલ્લા, આને હારી સુવાર્તા પ્રચાર કેરા મોક્લુલામેને સન્માનિત માંહે હાય આને માસે પેલ્લા ખ્રિસ્તુપે ચેલા રુપુમે વિશ્વાસ કેયોહો.

⁸ પ્રભુમે માઅ મેરાલો આંપ્લીયાતસુલે માઅ નમસ્કાર.

⁹ ખ્રિસ્તુમે આમા આરી કામ કેનારો ઉર્બાનુસુલે, આને માઅ મેરાલો દોસ્દાર ઇસ્તખુસુલે નમસ્કાર.

¹⁰ અપુલ્લોસુલે જો ખ્રિસ્તુમે ઈમાનદાર નીગ્યોહો તીયાલે નમસ્કાર, અરીસ્તુબુખુસુ પરિવારુલે નમસ્કાર.

¹¹ માઅ કટુબુમે હેરોદીયોન આને નર્કીસુસ્સુ પરિવારુલે જે માઅ પોતા ઇસ્રાએલી જાતિ હાય. પાવુહુ હેરોદીયોનુલે પ્રભુમે નમસ્કાર.

¹² ત્રેફુના આને ત્રોફાસા બેનું બોયુહુને જે પ્રભુ માટે મેહનત કેત્યાહા, આને મેરાલી બોય પીરસીસુલે, જીયુહુ પ્રભુમે પેલ્લા ખુબુજ મેહનત કેયીહી, નમસ્કાર.

¹³ રુફુસુલે જે પ્રભુમે પરમેહેરુ મારફતે પ્રભુ સેવા માટે પસંદ કેયોહો, આને તીયુ યાહકી જે માઅ યાહકી સમાન હાય, બેનુ યાહકીલે આને પોયરાહાને નમસ્કાર.

¹⁴ આને અસુક્રીતુસ, ફીલગોન, હીર્મસ, પત્રુબાસ આને તીયા આર્યા વિશ્વાસી પાવુહુને નમસ્કાર.

¹⁵ ફીલુગુસ, યુલિયા, નેર્યુસ, આને તીયા બોયુ, આને ઉલુમ્પાસ આને તીયા આરી-આરી પરમેહેરુ ભકતુહુંને બી નમસ્કાર.

¹⁶ તુમુહુ એક-બીજા આરી ગલે મીલીને તુમુહુ નમસ્કાર કેજા. તુમનેહે ઇસુ ખ્રિસ્તુ બાદી મંડળીવેલેને નમસ્કાર.

છેલ્લો નમસ્કાર

¹⁷ આમી ઓ મેરાલાહા આંય તુમનેહે વિનંતી કીહુ, કા તુમુહુ જે ખેરી શિક્ષણ મીલવ્યોહો, તીયા વિરુધુમે ફુટ ટાકતાહા, આને તુમા વિશ્વાસુમે શંકા પેદા કેતાહા, આને એહેડો કામ કેતાહા જીયાકી વિશ્વાસી લોક ઠોકર ખાતાહા. તીયાપે ધ્યાન રાખા આને તીયાકી દુર રેજા.

¹⁸ કાહાકા એહેડા લોક આપુ પ્રભુ ઇસુ ખ્રિસ્તુ નાહ, પેન શારીરિક જરુરતુ માટે સેવા કેતાહા, આને મીઠી-મીઠી ભોલી ગોઠીકી લોકુહુને ધોકો દેતાહા.

¹⁹ બાદા લોક જાંતાહા કા તુમુહુ પરમેહેરુ આજ્ઞા માનતાહા, ઈયા ખાતુરે આંય તુમા વિશે ખુશ હાય, પેન આંય ઈચ્છા રાખુહુ તુમુહુ ભલાય કેરા માટે બુદ્ધિમાન બોના આને ખોટાય કેરામે નિર્દોષ બોની રેજા.

²⁰ શાંતિ આપનારા પરમેહેર શૈતાનુ શક્તિલે નાશકીને તુમા આધિન કેરી. આને પ્રભુ ઇસુ કૃપા તુમાપે બની રેઅ.

આપુ પ્રભુ ઇસુ કૃપા બોની રેઅ

²¹ માઅ આરી સેવા કેનારા તિમોથીલે, આને માઅ યહુદી પાવુહુ લુકીયસ, યાસોન આને સોસીપત્રુસુ વેલેને તુમનેહે નમસ્કાર.

²² ઓ પત્ર લેખનારો તીર્તીયુસુ વેલેને પ્રભુમે તુમનેહે નમસ્કાર.

²³ ગાયસુ વેલેને બી નમસ્કાર, જીયા કોમે આંય આમી રીહુ આને મંડળી બી ઇહી ચાલેહે, આને ઈરાસ્તુસ જો શેહેરુ ખજાંસી હાય, તીયા પાવુહુ ક્વાર્તુસુ વેલેને તુમનેહે નમસ્કાર.

²⁴ આંય પ્રાર્થના કીહુ કા આપુ પ્રભુ ખ્રિસ્તુ કૃપા તુમા આરી બોની રેઅ.

પરમેહેરુ સ્તુતિ

²⁵ આમી જો માયુહુ તુમનેહે ઇસુ ખ્રિસ્તુ હારી સુવાર્તા પ્રચાર કેયોહો, તોજ તુમનેહે વિશ્વાસુમે મજબુત કી સેકેહે, તીયુ દોબલી હાચાયુ અનુસાર જગતુ બોના પેલ્લા દોબલી આથી.

²⁶ પેન જાહેર વીને સાદા રેનારા પરમેહેરુ આજ્ઞા જે ભવિષ્યવક્તાં મારફતે પવિત્રશાસ્ત્ર લેખવામે આલો, બાદી જાતિ લોકુહુને સુવાર્તા આખવામે આલી, કા બાદા વિશ્વાસ કે આને તીયા આજ્ઞાલે માને.

²⁷ ખાલી તીયાજ સમયુલે બાદા કેતા બુદ્ધિમાન પરમેહેરુ મહિમા ઇસુ ખ્રિસ્તુ મારફતે યુગા-યુગ વેતી રેઅ. આમીન.