રોમન પત્રો 10 - દુબલી નવો કરાર

¹ ઓ વિશ્વાસી પાવુહુ, માઅ મનુ ઈચ્છા આને પરમેહેરુહુલે વિનંતી એ હાય કા, પરમેહેર ઇસ્રાએલ દેશુ લોકુ ઉદ્ધાર કેરી.

² કાહાકા આંય તીયાં સાક્ષી આપુહુ, કા તીયાહાને પરમેહેરુહુલે જાંણુલો ખુબુજ ઈચ્છા હાય, પેન તે નાહ હોમજુતે કા કેહેકી હારી રીતીકી તીયાલે ઓખે.

³ કાહાકા તીયાહાને ઇ ધ્યાન કા પરમેહેર લોકુહુને ધર્મી ઠેરવેહે, પેન તે પોતા પરમાણે ધર્મી બોના કોશિશ કેતા રેતાહા, ઈયા ખાતુરે તે પરમેહેરુ નજરીમે ધર્મી નાહ બોની સેકતા.

⁴ કાહાકા ઇસુ ખ્રિસ્તુ આવુલો પેલ્લા મુસા નિયમુ મકસદ પુરો વી ગીયો, ઈયા ખાતુરે આમી જો કેડો ઇસુ ખ્રિસ્તુપે વિશ્વાસ કેહે, તીયાલે પરમેહેર ધર્મી ઠેરવેહે.

ઉદ્ધાર બાદા લોકુ માટે હાય

⁵ પવિત્રશાસ્ત્રમે મુસા નિયમુ આધારુપે ધર્મી બોનુલો વિશે લેખેહે કા જો કેડો બી માંહુ તીયા નિયમુ પાલન કેહે તોઅ તીયા મારફતે જીવતો રીઅ.

⁶ પેન પવિત્રશાસ્ત્રમે લેખલો હાય કા જો કેડો બી માંહુ વિશ્વાસુમે ધર્મી ઠેરવામે આવેહે. તોઅ પોતા મનુમે વિચાર કે કા “ઇસુ ખ્રિસ્તુલે નીચે લાવા ખાતુરે હોરગામે કેડો ચોળી?”

⁷ કા ફાચે “ઇસુ ખ્રિસ્તુલે મોલામેને જીવતો કીને ઉપે લાવા ખાતુરે અધોલોકુમે કેડો ઉતી?”

⁸ ઈયા મતલબ ઓ હાય કા વચન તોઅ પાહી હાય, તોઅ મુયુમે આને તોઅ મનુમે હાય, “ઇ તીયાજ વિશ્વાસુ વચન હાય, જો પ્રચાર કેતાહા.

⁹ કા કાદાચ તુ પોતા મુયુકી ઇસુ ખ્રિસ્તુ વચન માનીને કબુલ કી લેઅ, આને પોતા રદયુપે વિશ્વાસ કે, કા પરમેહેરુહુ ઇસુલે મોલામેને ફાચો જીવતો કેલો, તા નક્કીજ પરમેહેર તોઅ ઉદ્ધાર કેરી.”

¹⁰ કાહાકા ધર્મી બોના ખાતુરે રદયુકી વિશ્વાસ કેરામે આવેહે, આને ઉદ્ધાર પામા માટે પોતા મુયુકી કબુલ કેરા પોળેહે.

¹¹ કાહાકા યશાયા ભવિષ્યવક્તાહા પવિત્રશાસ્ત્રમે ઇસુ ખ્રિસ્તુ વિશે લેખ્યોહો, “જો કેડો બી માંહુ તીયાપે વિશ્વાસ કેરી તોઅ કીદીહીજ નાય નાજવાયા પોળે.

¹² કાદાચ તોઅ માંહુ યહુદી વેરી કા ગ્રીક વેરી, ઈયા ખાતુરે કા પરમેહેર બાદા પ્રભુ હાય, આને તીયાપે મદદ માગનારાલે તોઅ વાચાવેહે.”

¹³ કાહાકા પવિત્રશાસ્ત્રમે લેખલો હાય, “જો કેડો પ્રભુ મદદ મિલવા ખાતુરે બોમબ્લુતેહે, તે ઉદ્ધાર પામી.

¹⁴ પેન જીયાહા તીયાપે વિશ્વાસ નાહ કેયો, તે તીયાપેને મદદ કેહેકી માગે? આને જીયાહા તીયા વિશે નાહ ઉનાયે તે તીયાપે કેહેકી વિશ્વાસ કે? આને પ્રચાર કેનારોજ નાય વેઅ કેહેકી ઉનાય?”

¹⁵ આને કાદાચ પ્રચાર કેરા મોક્લામે નાય આવે તા પ્રચાર કેહેકી કે? જેહેકી પવિત્રશાસ્ત્રમે લેખલો હાય, “હારી સુવાર્તા ઉનાવનારા આવુલો કોતી હારી ગોઠ હાય.”

¹⁶ પેન બાદા લોકુહુ તીયુ હારી સુવાર્તાલે સ્વીકાર નાહ કેયી, યશાયા ભવિષ્યવક્તાહા આખેહે, “ઓ પ્રભુ, કેડાહા આમા હારી સુવાર્તાપે વિશ્વાસ કેયોહો?”

¹⁷ ઈયા ખાતુરે પ્રચાર ઉનાયુલોકી વિશ્વાસ ઉત્પન્ન વેહે, આને સંદેશ ઇસુ ખ્રિસ્તુ વચનુકી વેહે.

¹⁸ ઈયા મતલબ ઓ નાહ કા તે નાહ ઉનાયા, ઉનાયા તા જરુરી હાય, કાહાકા પવિત્રશાસ્ત્રમે લેખલો હાય, “તીયાં પ્રચાર કેરા આવાજ તોરતીપે દરેક માંહા પાહી હાય, આને તીયા વચન જગતુ દરેક જાગામે પોચવી દેઅ.

¹⁹ આને આંય ઇ બી આખુહુ કા ઇસ્રાએલુ લોક બી ઉનાયાહા, પેલ્લા પરમેહેરુહુ આને મુસા મારફતે ઇ આખવામે આલો, આંય અન્યજાતિ લોકુ મારફતે તુમા મનુમે જલન ઉપજાવેહે, આંય અન્યજાતિ મુર્ખ લોકુ મારફતે ક્રોધ ચોળવેહે.”

²⁰ ફાચે યશાયા ભવિષ્યવક્તાહા હિંમતુકી આખેહે, “જે લોક માને હોદતલા નાય, તીયાહા માને હોદી લેદા, આને જે લોક માઅ વિશે ફુચતલા બી નાય તીયાં વોચ્ચે આંય હાજર વીયોહો.”

²¹ પેન ઇસ્રાએલ દેશુ લોકુહુ માઅ વિશે પરમેહેર યશાયા ભવિષ્યવક્તા મારફતે ઇ આખાતાહા, “માયુહુ આખા દિહ માઅ આજ્ઞા નાય માનનારા આને હુમલા કેનારા લોકુહુને પોતા પાહી ફાચે વોલા ખાતુરે હાદી રીયોહો.”