પ્રકટીકરણ 8 - દુબલી નવો કરાર

સાતમી મોહર, રણસિંગળો આને લોબાન બાલુલો હોના વાટકો

¹ જાંહા ઘેટાહા સાતમી મોહર ખોલી, તા હોરગામે બાદી સભા આરદો કાલાક લોગુ શાંત વી ગીયી.

² તાંહા માયુહુ તીયા સાત હોરગા દુતુહુને હેયા જે પરમેહેરુ હુંબુર ઉબલા રેતલા, તીયાહાને સાત રણસિંગળા આપવામે આલા.

³ ફાચે આજી બીજો હોરગા દુત લોબાન બાલાં માટે હોના વાટકો લીને આલો, આને વેદી હુંબુર ઉબી રી ગીયો. તીયાલે પવિત્ર લોકુ પ્રાર્થના આરી બાલાં માટે ખુબુજ ધુપ આપવામે આલી. તીયાલે પવિત્ર લોકુ પ્રાર્થના આરી તીયુ હોના વેદીલે દેદી, જે પરમેહેરુ રાજગાદી હુંબુર આથી.

⁴ આને તીયા ધુપુ તુવારો પરમેહેરુ પવિત્ર લોકુ પ્રાર્થના આરી હોરગાદુતુ આથુમેને પરમેહેરુ પાહી પોચી ગીયી.

⁵ ફાચે તીયા હોરગા દુતુહુ વેદીપે બોલતા અંગારાલે ધુપ બાલાં ખાતુરે હોના વાટકામે પોયો, આને તોરતીપે ટાકી દેદો, તાંહા વાદલા ગાજુલો આને વીજળી આને ભુકંપ વેયો.

સાત રણસિંગળા

⁶ તાંહા તે સાતુ હોરગા દુત જીયાપે સાત રણસિંગળા આથા, વાજાવા ખાતુરે તીયાર વેયા.

⁷ તાંહા પેલ્લા હોરગા દુતુહુ રણસિંગળો વાજાવ્યો, તા તુરુતુજ તોરતીપે રોગુતુકી મીલ્લો બરફુ ઓલે આને આગ પાળા લાગ્યો, આને તીયા લીદે તોરતી તીજા ભાગુ, આને ચાળવા તીજા ભાગુ, આને તોરતીપેને બાદો લીલો ચારો બી બોલી ગીયો.

⁸ ફાચે બીજાં હોરગા દુતુહુ રણસિંગળો વાજાવ્યો, તા આગીકી બોલતો એક મોડો ડોગુ સમુદ્રમે ટાકી દેદો, આને સમુદ્રમે તીજા ભાગુ પાંય રોગુત બોની ગીયો.

⁹ તીયા કારણુકી સમુદ્ર તીજા ભાગુ ઓતે જીવતે જાનવરે મોય ગીયે, આને તીજા ભાગુ જાહાજ બી પારવાય ગીયા.

¹⁰ ઈયા બાદ તીજા હોરગા દુતુહુ રણસિંગળો વાજાવ્યો, આને એક મોડો તારો જો મશાલુ હોચે બોલતલો, હોરગામેને ટુટીને ખાડીમે આને જોતા બી પાંયુ ઝરા આને ઝરને હાય તીયામેને તીજા ભાગુમે પોળ્યે.

¹¹ આને તીયા તારા નામ કડવાદોના હાય, તીયા તીજા ભાગુ પાંય કડવો વી ગીયો, આને ખુબુજ લોક કડવા પાંયુકી મોય ગીયા.

¹² ફાચે જાંહા ચોથા હોરગા દુતુહુ રણસિંગળો વાજાવ્યો, તાંહા દિહ, ચાંદ, આને તારામેને તીજા ભાગુમેને થોડાક અથડાયા, તીયા લીદે દિહુ તીજા પારગામે આંદારો વી ગીયો, આને તેહેકીજ રાતી બી તીજા પારગાપે લોગુ ચાંદ આને તારા ઉજાલોં નાય વીયો.

¹³ જાંહા માયુહુ ફાચે હેયો, તા જુગુમેને એક ગરુડ ઉડતો દેખાયો, આને તોઅ મોડા આવાજુકી બોમબ્લીને આખતલો, “જાંહા બાકી તીન હોરગા દુત રણસિંગળો વાજાવી, તાંહા ઈયુ તોરતીપે રેનારા દરેકુપે ભયાનક મુસીબત આવી પોળી.”