પ્રકટીકરણ 3 - દુબલી નવો કરાર

સરદીસ શેહેરુ મંડળી સુવાર્તા

¹ સર્દીસ શેહેરુ મંડળી હોરગા દુતુલે ઇ લેખ, “જીયાપે પરમેહેરુ સાત આત્મા આને સાત તારા હાય, તોઅ ઇ આખેહે કા આંય તોઅ કામુહુને જાહું,” તુ વિશ્વાસ યોગ્યો દેખાહો, પેન ખરેખર તુ ગોઠીલે નાહ માનતો.

² ઈયા ખાતુરે સાવધાન વી જો, આને તોમે જો માઅ ભોરોષો બાકી હાય, તોઅ પુરી રીતીકી પુરો નાય વી જાય ઈયા ખાતુર મજબુત વી જાઆ, કાહાકા માયુહુ તોઅ કામુહુને હયેહે કા તુ પુરી રીતીકી પરમેહેરુ આજ્ઞા પાલન નાહ કેતો.

³ ઈયા ખાતુરે તીયુ શિક્ષાલે યાદ કેજે તુયુહુ પેલ્લા ઉનાલો આને તુયુહુ વિશ્વાસ કેલો. જો તુલે હિક્વામે આલ્લો તીયા અનુસાર ચાળ, આને ગલત કામુકી પાસ્તાવો કે, કાદાચ તુ સાવધાન વીને ગલત કામે કેરા બંદ નાય કીવ્યો તા આંય ચોરુ હોચે આવેહે, આને તુ તીયા સમયુલે જાંય સેકો, જાંહા આંય તુલે દંડ આપા માટે આવેહે.

⁴ પેન હે, સર્દીસ શેહેરુ થોડાક એહેડા લોક હાય જે પાપુમે નાહ પોળ્યા આને પવિત્ર જીવન જીવતાહા, તે પાંડે પોતળે પોવીને માઅ આરી ફિરી, કાહાકા તે ઈયા યોગ્યો હાય.

⁵ જો શૈતાનુ શક્તિપે વિજય મીલવુતાહા, તીયાહાને ઈયુ રીતી પાંડે પોતળે પોવાવામે આવી, આને તીયા નામ જીવનુ ચોપળીમેને કીદીહીજ નાય કાડે, પેન માઅ પરમેહેરુ બાહકા આને તીયા હોરગા દુતુહુને આખેહે કા એ આજ્ઞા પાલન કેનારા લોક હાય.

⁶ “જો માઅ ગોઠ ઉનાયા માગેહે, તે ઉનાય લેઅ કા પરમેહેરુ આત્મા મંડળી લોકુહુને કાય આખેહે.”

ફિલેદેલફીયા શેહેરુ મંડળી સુવાર્તા

⁷ ફિલેદેલફીયા શેહેરુ મંડળી હોરગા દુતુહુને લેખ, “જો પવિત્ર આને સત્ય હાય, આને જીયાપે દાઉદ રાજા રાજ્ય અધિકાર હાય, કાદાચ તોઅ બાંણો ખોલેહે તા કેડો બી તીયાલે બંદ નાહ કી સેકતો, આને કાદાચ તોઅ બંદ કી સેકેહે તા કેડો બી તીયાલે ખોલી નાહ સેકતો, તોઅ આખેહે,

⁸ આંય તોઅ કામુહુને જાંહુ, હેઅ, માયુહુ તોઅ હુંબુર બાંનો ખોલુહુ, જીયાલે કેડોજ નાહ બંદ કી સેકતો, તોઅ સામર્થ થોડોજ હાય, તેબી તુયુહુ વચનુ પાલન કેયોહો આને માઅ નાવુ ઇનકાર નાહ કેયો.

⁹ હેઅ, જે લોક શૈતાનુ ટોલા હાય, આને ઇ બી આખતાહા કા આમુહુ યહુદી હાય, પેન તે ઝુટો ગોગતેહે, હાચા યહુદી નાહ, આંય એહેકી કેહે કા તે માઅ પાહી આવીને તોઅ પાગે પોળીને, આને તે જાંય લીઅ કા આંય તોઅ આરી પ્રેમ કીહુ.

¹⁰ તુયુહુ માઅ વચનુ પાલન કેયોહો, કા તુ દુઃખી સમયુપે તીયાલે સહન કી સેકો, ઈયા ખાતુરે આંય તુલે પરીક્ષા સમયુલે તુયુહુ માઅ ઇ વચન પાલન કેયોહો, કા જાંહા દુ:ખુ સમય તોપે આલો તાંહા તુયુહુ તીયાલે સહન કેયો, જો પરીક્ષા સમય ઈયા જગતુ બાદા લોકુપે આવી.

¹¹ આંય માહરીજ ફાચો આવનારો હાય, ઈયા ખાતુરે તુ વિશ્વાસુમે મજબુત બોની રેઅ, કા કેડો બી તોઅ ઇનામુલે છીનવી નાય સેકે.

¹² જો શૈતાનુ શક્તિપે વિજય મિલવુતેહે, તે પરમેહેરુ પવિત્રસ્થાનુ મંદિરુ ખાંબલા હોચે વેરી, આને આંય તીયાં શરીરુપે પરમેહેરુ નામ આને શેહેરુ નામ લેખેહે, ઇ શેહેર તોજ હાય જીયાલે નવો યરુશાલેમ આખેહે. ઇ શેહેર તોજ હાય જો હોરગામેને એટલે પરમેહેરુ વેલેને નીચે આવી, આંય તીયાં શરીરુપે માઅ નામ લેખેહે.

¹³ જો માઅ ઉનાયા માગેહે, તે ઉનાય લેઅ કા પરમેહેરુ આત્મા મંડળી લોકુહુને કાય આખેહે.”

લોદીકીયા શેહેરુ મંડળીલે સદેશ

¹⁴ લાઓદોકિયા શેહેરુ મંડળી હોરગા દુતુલે લેખ, જો આમીન આખેહે આને ભોરોષા યોગ્યો હાય આને હાચી સાક્ષી હાય, આને જીયા મારફતે પરમેહેરુહુ બાદી વસ્તુ રચના કેયીહી, તોઅ ઇ આખેહે,

¹⁵ આંય તોઅ કામુહુને જાંહુ, હેઅ તુ તીયા પાંયુ હોચે હાય જો હેલો હાય આને તોઅ ગરમ નાહ, આંય ઇચ્છુહુ કા તુ માઅ ગોઠીલે માનોહો તા ખેરોજ તીયુ ગોઠીહીને માને, કાદાચ નાહ તા બિલકુલ માઅ માનોહો.

¹⁶ પેન તુ બોફનો પાંયુ હોચે હાય, એટલે નાય તા હેલો, આને નાહ ગરમ, ઈયા ખાતુરે આંય તુલે પુરી રીતીકી છોડી દેહે.

¹⁷ આંય માલદાર હાય, ભરપુર હાય આને જો જોજે બાદો માપે હાય. પેન તુ ઇ નાહ જાંતો કા તોપે દયા આવેહે એહેડો હાય, તુચ્છ, ગરીબ, આંદલો હાય આને તોપે પોવા માટે પોતળે બી નાહ.

¹⁸ ઈયા ખાતુરે આંય તુલે સલાહ આપુહુ કા તુ માપેને શુદ્ધ હોનો વેચાતો લેઅ કા તુ માલદાર વી જાંવ, આને તુ પોવા માટે માપેને પાંડે પોતળે વેચાતે લીઅ કા તોઅ શરીર બુજલો રેઅ આને તુલે શરમ નાય લાગે, આને તુ તોઅ ડોંઆ ઈલાજુ માટે માપે દવા બી વેચાતી લીહો કા તુ હીઅ સેકો.

¹⁹ જીયાહાને આંય પ્રેમ કીહુ, તીયાલે આંય હિક્વુહુ આને દંડ બી આપુહુ, કા તે હાચા બોની જાય, ઈયા ખાતુરે સાદા ભલો કેરુલોમે લાગા આને પાપી જીવન જીવા બંદ કી ધ્યા.

²⁰ ઉના, આંય બાંણાહી ઉબી રીને ખોકળાવુહુ, કાદાચ એગો માઅ આવાજ ઉનાયને બાંણો ખોલેહે, તા આંય તીયા કોમે આવીને તીયા આરી બોહીને માંડો ખાહે.

²¹ જે શૈતાન શક્તિપે વિજય મીલવુતાહા, આંય તીયાહાને માઅ આરી રાજગાદીપે બોહા અધિકાર આપેહે, જેહેકી આંય બી વિજય મીલવીને માઅ બાહકા આરી તીયા રાજગાદીપે બોહી ગીયો.

²² “જો માઅ ગોઠ ઉનાયા માગેહે, તે ઉનાય લેઅ કા પરમેહેરુ આત્મા મંડળી લોકુહુને કાય આખેહે.”