માર્ક 11 - દુબલી નવો કરાર

ઇસુ યરુશાલેમ શેહેરુમે જાહે

¹ જાહાં ઇસુ આને તીયા ચેલા યરુશાલેમ શેહેરુ પાહી આલા, તાંહા તે બેથફગે આને બેથેનિયા બાર્યા ગાંવુ પાહી પોચ્યા, તે ગાંવ જેતુનુ ચાળવાવાલા ડોગુ પાહી હાય આને તીયાહા તીયા ચેલામેને બેન ચેલાહાને ઇ આખીન મોકલ્યા કા,

² “તુમુહુ હુંબર્યા ગાંવુમે જાઅ, આને તીહી વિહતાજ તુમનેહે એક ફુરક્યા બોચાલે બાંદલો હેહા, જીયાપે આમી લુગ કેડોજ નાહા બોઠો, તીયાલે સોળી લી આવા.

³ જો કેડો બી તુમનેહે ફુચે, ‘એહેકી કાહા કેતાહા?’ તાંહા તુમુહુ આખજા, ‘ઇસુ આમા પ્રભુલે તીયા જરુર હાય,’ આને તોઅ તુરુતુજ તીયાલે ઇહી મોકલી દી.”

⁴ ચેલા ગાંવુમે ગીયા આને તીયાહા બારે ચોવઠામે બાંણા પાહી એક ફુરક્યા બોચાલે ખુટા આરી બાંદલો હેયો, આને તે તીયાલે સોળા લાગ્યા.

⁵ તીયામેને જે તીહી ઉબલા આથા તે આખાં લાગ્યા, “ઇ કાય કી રીયાહા, ફુરક્યા બોચાલે કાહા સોળતાહા?”

⁶ આને ચેલાહા જેહકી ઇસુહુ આખલો આથો, તીયાહા તેહકીજ તીયાહાને આખી દેખાવ્યો; તાંહા લોકુહુ તીયા ફુરક્યા બોચાલે તીયાહાને લી જાંઅ દેદો.

⁷ તીયાહા ફુરક્યા બોચાલે ઇસુ પાહી લાવીન તીયાપે પોતળે ટાક્યે, આને ઇસુ તીયાપે બોહી ગીયો આને યેરુશાલેમુ વેલ જાઅ લાગ્યો.

⁸ આને ખુબુજ લોકુહુ ઇસુ આગાળી વાટીપે પોતળે ફાત્યે, આને બીજા લોકુહુ તીયાલે સન્માન દા ખાતુર ખેતુમેને ચાળા ડાગ્યા રોંડી-રોંડી વાટીપે ફેલાવી દેધ્યા.

⁹ થોડાક લોક ઇસુ આગાળી-આગાળી જાતલા આને થોડાક ફાચાળી-ફાચાળી ચાલી આવતલા, તે બાદા ખુશીકી બોમ્બલુતલા, “હોશાના,” “જો દેવું નાવુંકી આવેહે, તીયાપે પરમેહેરુ કૃપા હાય.

¹⁰ આપુ આગલો ડાયો દાઉદુ રાજા હોચ્યો એક રાજા પરમેહેરુ કૃપા આરી રાજ કેરા આવેહે; જો હોરગામ રેહે, તીયા પરમેહેરુ હોશાના કેરા.”

¹¹ આને જાંહા ઇસુ યરુશાલેમ શેહેરુમે પોચ્યો, તાંહા તોઅ દેવળુમે ગીયો, આને તીયાહા ચારુસોમકી બાદીજ વસ્તુહુને ધ્યાનુકી હેયો, આને ફાચે શેહેરુમેને જાતો રીયો, કાહાકા પેલ્લાનેજ વા લાગી ગેહલી, ફાચે પોતા ચેલાહા આરી બેથેનિયા ગાંવુમે જાઅ ખાતુર નીગ્યો.

વગર ફલવા અંજીરુ ચાળ

¹² બીજે દિહ જાહાં તે બેથેનિયા ગાંવુમેને નીગ્યા, તાંહા ઇસુલે પુખ લાગી.

¹³ આને તોઅ દુરને અંજીરુ એક લીલા ચાળવાલ હીને પાહી ગીયો કા, ઇ હેરા ખાતુર કા જાંણે તીયામે કાયક ફલ મીલે; પેન પાને છોડીને કાયજ નાય મીલ્યો; કાહાકા ફલ લાગુલી સમય નાય આથો.

¹⁴ તીયા લીદે ઇસુહુ તીયા ચાળવાલ આખ્યો, “આમીને તુ કીદીહીજ ફલ નાય દી સેકો.” આને તીયા ચેલા ઉનાયજ રેહલા આથા.

મંદિરુમે વેપાર કેનારાહાને ઇસુ ઓળી કાડેહે

¹⁵ ફાચે ઇસુ આને તીયા ચેલા યરુશાલેમુ શેહેરુમ આલા, આને તે દેવળુ ચોવઠામે ગીયા, તાંહા ઇસુહુ તીયા લોકુહુને દેવળુમેને બારે કાડા ચાલુ કેયો, જે બલિદાનુ ખાતુર ઉપયોગ વેનારે જાનવર આને બીજી વસ્તુહુને વેચા આને લાઅ કામ કી રેહલા; તીયાહા પોયસા બોદલુનારા ટેબલ પોલટાવી દેદા, આને કબુતરુ વેચનારા પીન્જરા બી પોલટાવી દેદા.

¹⁶ આને તીયાહા લોકુહુને આદેશ દેદો કા, તે દેવળુ ચોવઠામે વસ્તુહુને લાવુલો આને લી જાવુલો બંદ કે.

¹⁷ આને તીયાહા ઉપદેશ કીને આખ્યો, “પવિત્રશાસ્ત્રમે ઇ લેખલો કા, માંઅ દેવળ બાદી જાતિ લોકુ ખાતુર પ્રાર્થના પોંગો આખાય; પેન તુમુહુ ઇયાલ ડાખુ ગુફા હોચે જાગો બોનાવી દેદોહો.”

¹⁸ જાહાં મુખ્યો યાજક આને મુસા નિયમ હિક્વુનારા ઉનાયા કા, ઇસુહુ કાય કેયો આને કાય આખ્યો, તાંહા તે તીયાલે મારા ખાતુર મોકો હોદા લાગ્યા, પેન કાહાકા જો કાય બી તીયાહા હિક્વ્યો લોકુહુ તીયાલે પુરી રીતીકી સ્વીકાર કી લેદો, ઈયા લીદે તે તીયા વાદતી લોક પ્રિયતાકી બીતલા.

¹⁹ આને વાઅતો વીયો, તાંહા ઇસુ આને તીયા ચેલા શેહેરુલ છોડીને બેથેનિયા ગાંવુ વેલ જાતા રીયા.

હુકલા અંજીરુ ચાળાપેને હિકામણ

²⁰ બીજા દિહુલે વેગીવેલ, જાહાં ઇસુ આને તીયા ચેલા ફાચે યેરુશાલેમુ વેલ જાતલા, તાંહા તીયાહા અંજીરુ ચાળાલે હેયો; તોઅ પુરી રીતીકી મુલાહીને હુકાય ગેહલો આથો.

²¹ પિત્તરુલે તે ગોઠ ઇત આલી, જે ઇસુહુ તીયાલે આખલી; તાંહા પિત્તરુહુ આખ્યો, “ઓ ગુરુજી, હેઅ, ઇ અંજીરુ ચાળ જીયાલે તુયુહુ હારાપ દેદલો, તોઅ મુલાહીને હુકાય ગીયોહો.”

²² ઇસુહુ તીયાલે જવાબ દેદો, “વિશ્વાસ કેરા જો તુમુહુ માગ્યોહો, પરમેહેર તુમનેહે દી.

²³ આંય તુમનેહે ખેરોજ આખુહુ કા, જો કેડો ઈયા ડોગુલે આખે, ‘ઉપટાય જો, આને સમુદ્રમે જાયને પોળી જો,’ આને તોઅ મનુમે શોક માઅ કેહો, પેન ભોરુચો કે કા, જો તીયાહા માગ્યોહો પરમેહેર તીયા માટે કેરી, તાંહા પરમેહેર તીયા માટે તેહકીજ કેરી.

²⁴ ઈયા ખાતુર આંય તુમનેહે આખુહુ કા, જો કાય બી તુમુહુ પ્રાર્થના કીને માંગાહા, તાંહા વિશ્વાસ કેરા કા પરમેહેરુહુ પેલ્લાનેજ તુમા પ્રાર્થના સ્વીકાર કી લેદીહી, આને પરમેહેર તુમા માટે તોઅ કેરી.

²⁵ આને જાહાં તુમુહુ ઉબારીને પ્રાર્થના કેતાહા, તાંહા જો કેડો બી તુમા ગુનેગાર વેરી, તીયાલે માફ કેરા તાંહા હોરગામેને બાહકો બી તુમા પાપ માફ કેરી.

²⁶ પેન કાદાચે તુમુહુ માફ નાય કેરા તા તુમા બાહકો જો હોરગામ હાય, તોબી તુમા પાપ માફ નાય કેરી.”

ઇસુ અધિકારુ રુપુમ સવાલ

²⁷ ફાચે ઇસુ આને તીયા ચેલા યરુશાલેમ શેહેરુમ ફાચા આલા, આને જાહાં ઇસુ દેવળુમે ફિરતલો, તાંહા મુખ્યો યાજકે આને મુસા નિયમ હિક્વુનારા આને યહુદી લોકુ વડીલ તીયા પાહી આવીને ફુચ્ચા લાગ્યા.

²⁸ “જે કામે તુયુહુ કેયેહે, તીયાહાને કેરા ખાતુર તોપે કાય અધિકાર હાય? એહકી કેરુલો અધિકાર તુલ કેડાહા દેદોહો?”

²⁹ ઇસુહુ તીયાલે આખ્યો, “આંય બી તુલ એક ગોઠ ફુચુહુ; જો તુ માન જવાબ દેહો તા આંય તુમનેહે આખેહે, કા ઇ કામ કેલ્લા અધિકારુકી કીહુ.

³⁰ યોહાનુલ બાપ્તીસ્મો આપા ખાતુર કેડાહા મોકલ્યોહો? કાય તોઅ પરમેહેરુ વેલને આથો કા, માંહા હીંને આથો? માન જવાબ ધ્યા.”

³¹ તાંહા તે એકબીજા આરી ચર્ચા કેરાં લાગ્યા કા, જો આપુહુ આખજી હોરગામેને પરમેહેરુ વેલને, તા તોઅ આપનેહે ફુચી કા, ફાચે તુમુહુ તીયાપે વિશ્વાસ કાહા નાહા કેયો?

³² આને જો આપુહુ આખજી, માંહા વેલને હાય, તા લોકુ બીખ હાય, કાહાકા બાદે જાંઅતેહે કા યોહાન પરમેહેરુ વેલને હાચો ભવિષ્યવક્તા આથો.

³³ આને તીયાહા ઇસુલે જવાબ દેદો કા, “આમુહુ નાહા જાંઅતા કા યોહાનુલે બાપ્તીસ્મો દા ખાતુર કેડાહા મોકલ્યો,” ઇસુહુ તીયાહાને આખ્યો, “આંય બી તુમુનેહે નાહ આખતો કા, ઇ કામ આંય કેલ્લા અધિકારુકી કીહુ.”