માથ્થી 23 - દુબલી નવો કરાર

મુસા નિયમ હિક્વુનારા આને ફોરોશી લોકુકી હોશિયાર.

¹ તાંહા ઇસુહુ લોકુ ગોરદીલે આને પોતા ચેલાહાને આખ્યો.

² “મુસા નિયમ હિક્વુનારા આને ફોરોશી લોકુહુને મુસા નિયમુલ ઉંડાયુકી હોમજાવુલો અધિકાર હાય.”

³ ઈયા ખાતુર તે તુમનેહે જો કાય આખે, તોઅ કેરુલો, આને માનુલો, પેને તે જો કેતાહા તેહેડો કામ માંઅ કેહા, કાહાકા તે ઉપદેશ દેતાહા પેન તીયાં પાલન નાહ કેતા.

⁴ તે હેરેક પ્રકારુ નિયમ બોનાવતાહા, તે બીજા લોકુહુને ઈયા નિયમુ જબરજસ્તી પાલન કેરાવતાહા, પેન તે પોતે બી તે નિયમ પાલા લોકુહુને મદદ નાહ કેતા.

⁵ તે બાદે કામે લોકુહુન દેખાવા ખાતુર કેતાહા, તે તીયા માંદલ્યાહાન પોલો કેતાહા, આને પોતા પોતળા કોરુલે લામ્બા રાખતાહા.

⁶ ખાવુલુ સમયુલ હારામ-હારા જાગાપે બોહા પસંદ કેતાહા, આને સભાસ્થાનુમ આગાળીજ કુળચીપે બોહતાહા.

⁷ આને બાજારુમે લોકુહુન નમસ્કાર કેરાવતાહા, આને માંહામે ગુરુજી આખાવા તીયાહાને હારો લાગેહે.

⁸ પેન તુમુહુ ગુરુજી માંઅ આખાહા, કાહાકા તુમા એકુજ ગુરુજી હાય: આને તુમુહુ બાદે પાવુ-બોયુ સારકે હાય.

⁹ આને દુનિયામે તુમુહુ કેડાલુજ આત્મિક બાહકો નાય આખુલો, કાહાકા તુમા એકુજ બાહકો હાય, જો હોરગામ હાય.

¹⁰ આને માલિક બી નાય આખુલો, કાહા તુમા એકુજ માલિક હાય, મતલબ ખ્રિસ્ત ઓતોજ.

¹¹ જો તુમાહામે મોડો વેરા માગેહે, તોઅ તુમા સેવક બોને.

¹² જો કેડો પોતાલ મોડો કેરી, તીયાલે હાનો કેરામે આવી: આને જો કેડો પોતાલ હાનો કેરી, તીયાલે મોડો કેરામે આવી.

મુસા નિયમ હિક્વુનારા આને ફોરોશી ઢોંગી જીવનુ વિશે

¹³ “ઓ ઢોંગી મુસા નિયમ હિક્વુનારા આને ફોરોશી લોકુહુ તુમાહાપે હાય! તુમુહુ લોકુહુને હોરગા રાજ્યામે જાવુલો અનુમતિ નાહ દેતા, નાહ પોતેજ તીયામે જાય સેકતા, આને જે જાનારે હાય, તીયાહાને બી નાહ જાંઅ દેતા.

¹⁴ (ઓ ઢોંગી મુસા નિયમ હિકવુનારાહા આને ફોરીશીહી તુમાપે હાય! તુમુહુ વિધવા બાયુને છેતરીને કોઅ બા આને માલ-મિલકત પાળાવી લેતાહા, ઇ દેખાવા ખાતુર કા તુમુહુ ન્યાયી હાય, તુમુહુ વાદારે સમય લુગુ પ્રાર્થના કેતાહા: ઈયા ખાતુર તુમનેહે વાદારે દંડ મીલી.)”

¹⁵ “ઓ ઢોંગી મુસા નિયમ હિક્વુનારાહા આને ફોરોશી લોક, તુમાપે હાય! તુમુહુ એક માંહાલે પોતા ચેલો બોનાવા ખાતુરે, બાદી જાગે મુસાફરી કેતા ફીરતાહા, આને જાંહા તોઅ વિશ્વાસ કેહે જે તુમુહુ હિકવુતાહા, જેહકી તુમુહુ પોતે હાય તીયાસે વાદારે નોરકુમે જાવુલો યોગ્ય બોનાવી દેતાહા.”

¹⁶ “ઓ આંદલા આગેવાનુહુ, તુમાપે હાય! જો આખતાહા કા એગુહુ દેવળુ કસમ ખાય તા કાયજ ફરક નાહ, પેન કાદાચ એગુહુ દેવળુ હોના કસમ ખાય, તોઅ તીયાકી ફરક પોળેહે.”

¹⁷ ઓ મુરખાહા, આને આંદલાહા, બેનુમેને કેડો મોડો હાય; હોનો કા તોઅ દેવળ જીયાકી હોનો પવિત્ર વેહે?

¹⁸ તુમુહુ ઇ બી હિકુવુતાહા કા કાદાચ એગુહુ, વેદી કસમ ખાય તા કાયજ ફરક નાહ, પેન જે અર્પણ તીયુ વેદીપે હાય, કાદાચ એગુહુ તીયા અર્પણુ કસમ ખાય તા તીયાકી, ફરક પોળેહે.

¹⁹ ઓ આંદલાહા, કેડો મોડો હાય; અર્પણ કા વેદી, જીયાકી અર્પણ પવિત્ર વેહે?

²⁰ ઈયા ખાતુર જો વેદી કસમ ખાહે, તોઅ તીયા આને જો કાય તીયાપે હાય, તીયા બી કસમ ખાહે.

²¹ આને જો દેવળુ કસમ ખાહે, તોઅ પોતા આને તીયામે રેનારા પરમેહેરુ બી કસમ ખાહે.

²² આને જો હોરગા કસમ ખાહે, તોઅ પરમેહેરુ રાજગાદી આને તીયાપે બોહનારા બી કસમ ખાહે.

²³ “ઓ ઢોંગી મુસા નિયમ હિક્વુનારાહા, આને ફોરોશી લોક તુમાપે હાય! તુમુહુ, ફુદીના આને, વારાલી આને જીરા દશમો ભાગ દેતાહા, પેન તુમુહુ નિયમ શાસ્ત્રમેને ગંભીર ગોઠીહીને એટલે ન્યાય આને દયા, આને વિશ્વાસ યોગ્ય” વેરા છોડી દેદોહો; પેન તુમુહુ તીયાહાને બી કેતા રેતા આને તીયાલે બી નાય છોડતા.

²⁴ ઓ આંદલા આગેવાનુહુ, તુમુહુ હાના નિયમુ પાલન કેરા વિશે ખુબ હુશિયાર હાય, જેહકી કા તુમુહુ જો પિતાહા, તીયાસે માંખાહાને દુર રાખુલો, પેન ફાચે તુમુહુ પરમેહેરુ ખુબ કિંમતી આજ્ઞાલે ઉલંઘન કેતાહા! તોઅ ઉટુલે ગીઇ જાવુલો હોચે હાય!

²⁵ “ઓ ઢોંગી મુસા નિયમ હિક્વુનારાહા, આને ફોરોશી લોકુહુ તુમાપે હાય! તુમુહુ એહેડા બાસના હોચે હાય, જે બારી વેલેને ચોખ્ખે કેલે દેખાતેહે, પેન માજમેને આજી બી ગંદે હાય, તોઅ ઇ હાય કા તુમુહુ પોતાલુજ હારા લોકુ હોચે દેખાવતાહા, પેન તુમા દિલુમે તુમુહુ લોભી આને સ્વાર્થુકી પોરાલા હાય.”

²⁶ ઓ આંદલા ફોરોશી લોકુહુ, પેલ્લા પોતાલે લાલચી આને સ્વાર્થી વેરા બંદ કેરા, તાંહા તુમુહુ તોંજ કી સેકાહા જે ન્યાયી હાય, ઇ એક એહેડી થાલી હોચે વેરી, જે બારે આને માજ બેનુ વેલ ચોખ્ખે વેઅ, તાંહા તુમુહુ તોંજ કી સેકોહા, જો પવિત્ર હાય, ઇ એક એહેડી થાલી હોચે વેરી, જે બારે આને માજ બેનુ વેલ સાફ વેઅ.

²⁷ ઓ ઢોંગી મુસા નિયમ હિક્વુનારાહા, આને ફોરોશી લોકુહુ, તુમાપે હાય! તુમુહુ ચુનો લાગવુલા કબરુ હોચે હાય, જે બારેને સુંદર દેખાહે, પેન માજામને મોલાં માંહા આટકે આને બાદી જાતિ ગંદગી પોરાલો હાય.

²⁸ ઈયુ રીતીકી તુમુહુ બી બારેને માંહાહાને ન્યાયી દેખાતાહા, પેને માજમે ઢોંગ આને પાપુકી પોરાલા હાય.

મુસા નિયમ હિક્વુનારા આને ફોરોશીને મીલનારી સજા ભવિષ્યવાણી

²⁹ “ઓ ઢોંગી મુસા નિયમ હિક્વુનારાહા, આને ફોરોશી લોકુહુ, તુમાપે હાય! તુમા આગલા ડાયાહા જીયા ભવિષ્યવક્તાહાને માય ટાક્લા, આને ન્યાયી લોકુ કબરુહુને સન્માનિત કેતાહા.”

³⁰ આને આખતાહા, કાદાચ આપુ આગલા ડાયા દિહુમે રેતા તા ભવિષ્યવક્તાં ખુનુમે તીયાં આરી ભાગીદાર નાય રેતા.

³¹ ઈયા લીદે તે પોતા વિરુધ સાક્ષી દેતાહા, કા તુમુહુ ભવિષ્યવક્તાહાને માંય ટાકનારાજ વંશુ મેર્યા હાય.

³² માને ખબર હાય, કા તુમુહુ તીયુ ખોટાયુલે પુરો કેનારા હાય, જીયાલે તુમા આગલા ડાયાહા શુરુ કેલો આથો,

³³ ઓ હાપળા હોચ્યા જેરુવાલા લોકુહુ, આને તીયાં પોયરાંહા, તુમુહુ નોરકુ દંડુકી બોચી નાય સેકાહા.

³⁴ ઈયા ખાતુર હેરા, આંય તુમા પાહી ભવિષ્યવક્તાહાને આને બુદ્ધિમાનુહુને આને મુસા નિયમ હિક્વુનારાહાને મોકલુહુ; આને તુમુહુ ઇયામેને થોળાકુહુને માંય ટાકાહા, આને થોળાકુહુને ક્રુસુપે ચોળવાહા; આને થોળાકુહુને સભાસ્થાનુમે ચાપકા ઠોકાહા, આને એક ગાંવુમેને બીજા ગાંવુમે તાંગાળતા ફીરાહા.

³⁵ જેહેકી ન્યાયી હાબેલુહીને લીન બિરીકયાહ પોયરો ઝખાર્યાહી લુગુ, જીયાહાને તુમુહુ “દેવળુ આને વેદી” વચ્ચે માય ટાકલા, આને જોતા બી ન્યાયી લોકુહુને માય ટાક્યા, તીયાં રોગુત તોરતીપે વેરાવલો, તોઅ બાદો તુમાપે પોળી.

³⁶ આંય તુમનેહે ખેરોજ આખુહુ, ઈયા બાદા મોતુ સજા ઈયુ પીઢી લોકુહુપે આવી પોળી.

યેરુશાલેમુ લીદે વિનંતી

³⁷ “ઓ યરુશાલેમ શેહેરુ લોકુહુ, ઓ યરુશાલેમ શેહેરુ લોકુહુ! તુ જે ભવિષ્યવક્તાહાને માંય ટાકતોહો, આને જોઅ તોઅ પાહી મોકલ્યાહા, તીયાહાને ડોગળમાર કેતોહો, કોતા વાર માયુહ ઈચ્છા કેયી કા, જેહેકી કુકડી તીયા પીચલાહાને પોતા ફાકડાહા એઠાં રાખવાલી કેહે, તેહેકી આંય બી તોઅ પોયરાહાને રાખવાલી કેરા ઈચ્છા કેલી, પેન તુમુહુ નાહ ઈચ્છયો.

³⁸ હેરા, તુમા કોઅ તુમા ખાતુર ઉજાળ કેરામે આવી.

³⁹ કાહાકા આંય તુમનેહે આખુહુ કા, આમીને જાવ લુગ તુમુહુ નાય આખાહા, ‘ધન્ય હાય તોઅ, પ્રભુ અધિકારુકી આવેહે,’ તામ લુગ તુમુહુ માન ફાચે કીદીહ નાય હેહા.”