લુક.ની સુવાર્તા 12 - દુબલી નવો કરાર

મુસા નિયમ હિક્વુનારા આને ફોરોશી લોકુ હોચ્યા માઅ બોનાહા

¹ તોતામુજ હાજારુ લોકુ ટોલો ઇસુહી એકઠો વી ગીયો, ઇહી લુગુ કા લોક એકબીજાપે પોળા-પોળી કેતલે, તાંહા ખાશકીને ઇસુહુ પોતા ચેલાહાને આખ્યો, કા “ઢોંગી ફોરોશી લોકુ ખમીરુકી તીયાં જો કપટ હાય તીયાકી સાવધાન રેવુલો.

² દોબાવી રાખલી દરેક ગોઠ ખુલ્લી વી જાય; આને દરેક ભેદ જાહેર વી જાય.

³ ઈયા ખાતુર જે બી ગોઠ તુમુહુ આંદારામે આખતાહા, તે ગોઠ ઉજવાળામે ઉનાવાંય; આને જે બી ગોઠયા તુમુહુ ખોલીમે રીને કાનુમે આખતાહા તે પોંગા ધાબાપેને જાહેર કેરાય.”

કેડાલે બીયુલો?

⁴ “પેન માઅ દોસતાહા, આંય તુમનેહે આખુહુ, જે માંહે તુમા શરીરુલે માય ટાકેહે, પેન ઈયા સિવાય બીજો કાયજ બી કી નાહ સેકતે, તેહેડા માંહાને બીયાહા માઅ!”

⁵ આંય તુમનેહે ચેતવણી દિહુ, કા તુમુહુ કેડાકી બીયા જોજે, માય ટાકીને નોરકામે ટાકુલો જીયાલે અધિકાર હાય, તીયા પરમેહેરુલે બીયા; આને આંય તુમનેહે આખુહુ કા તીયાજ પરમેહેરુકી બીયા.

⁶ “કાય બેન પોયસામે પાંચ ચીળે નાહ વેચાતે? તેબી પરમેહેર તીયા ચીળામેને એકાલે બી નાહ વિહરાતો.”

⁷ આને તુમા મુનકામેને બાદે ચોટયે પરમેહેરુહુ ગોંલે હાય, ઈયા ખાતુર બીયાહા માઅ, તુમુહુ બાદા ચીળા કેતા બી ખુબ કિંમતી હાય.

ઇસુલે નકાર કેરુલો મતલબ

⁸ “આંય તુમનેહે આખુહુ કા જો કેડો બી લોકુ હુંબુર ઇસુલે માઅ માલિક હાય, એહેકી માની લી તીયાલે આંય, માંહા પોયરો બી પરમેહેરુ હોરગાદુતુ આગલા માની લેહે, કા તોઅ માઅ ચેલો હાય.”

⁹ પેન જો કેડો બી લોકુ હુંબુર આંય ઇસુ ચેલો નાહ એહેકી આખે, તીયાલે પરમેહેરુ હોરગાદુતુ આગલા આખેહે, કા તોઅ માઅ ચેલો નાહ.

¹⁰ “જો કેડો બી માંહા પોયરા વિરુધુમે એગીહી ગોઠ આખે, તીયાલે પરમેહેર માફ કેરી, પેન જો કેડો બી પવિત્રઆત્મા વિરુધુમે નિંદા કેરી, તીયાલે પરમેહેર માફ નાય કે.

¹¹ જાંહા લોક તુમુહુ માંઅ ચેલા હાય, તીયા લીદે તુમા દુશ્મન તુમનેહે તીને સભાસ્થાનુ અધિપતિ આને અધિકારી આગલા લી જાય, તાંહા ચિંતા નાય કેરુલો કા આમુહુ કેહકી ગોગુહુ આને કેહકી જવાબ આપુહુ.

¹² કાહાકા પવિત્રઆત્મા તીયુજ ઘેળી તુમનેહે હિકવી દી કા તીયાં આગાળી કાય ગોગુલી.”

એક માલદાર માંહા દાખલો

¹³ ફાચે ટોલામેને એક માંહાહ ઇસુલે આખ્યો, “ઓ ગુરુજી, માઅ પાવુલે આખ, કા આમા બાહકા માલ-મિલકત માઅ આરી વાટે.”

¹⁴ ઇસુહુ તીયાહાને આખ્યો, “ઓ પાવુહુ, કેડાહા માને તુમા ન્યાય કેરા, આને માલ-મિલકત વાટા ખાતુર નીમ્યોહો?”

¹⁵ ફાચે ઇસુહુ તીયાહાને આખ્યો, “સાવધાન રેજા, આને દરેક જાતિ લોભુકી પોતાલે વાચવી રાખા; કાહાકા કેડા બી જીવન તીયા માલ-મિલકત એકઠી કેરા કી નાહ ચાલતો.”

¹⁶ તાંહા ઇસુહુ તીયાહાને એક દાખલો આખ્યો, “એક માલદાર માંહા ખેતુમે ખુબ પાક આલો.”

¹⁷ તાંહા તોઅ તીયા મનુમે વિચાર કેરા લાગ્યો, કા ઓ બાદો પાક કોમે પોય થોવુલો માપે પુરતો જાગો નાહ, આમી આંય કાય કીવ્યુ?

¹⁸ “આને તીયાહા આખ્યો, ‘માન ખબર હાય કા માન કાય કેરા પોળી: આંય માઅ હાની ગોદામુલે તોળી ટાકીને તીયા કેતા બી મોડી ગોદામ બોનાવેહે; આને તીહી આંય માઅ બાદો અનાજ આને માઅ બાદી માલ-મિલકત થોવેહે.’

¹⁹ તાંહા આંય પોતા જીવુલે આખેહે, ઓ જીવ, ખુબ વોર્ષા ખાતુર ખુબુજ માલ-મિલકત તોઅ ખાતુર થોવી રાખલી હાય; આમી આરામ કે, ખાયા કે, પીયા કે, આને આનંદ કે.”

²⁰ પેન પરમેહેરુહુ તીયાલે આખ્યો, ઓ મુર્ખ! આજ રાતીજ તુ મોય જાહો; તાંહા જો કાય તુયુહુ માલ-મિલકત તોઅ ખાતુર એકઠો કી થોવ્યોહો, તીયાલે કેડો લી?

²¹ ફાચે ઇસુહુ આખ્યો, “એહેકીજ તે માંહે બી હાય, જે પોતા ખાતુર માલ-મિલકત એકઠી કેતેહે, પેન પરમેહેરુ સેવા કેરા ખાતુર પોતા માલ-મિલકત નાહ વાપુરેતે, એહેડે માંહે પરમેહેરુ નજરુમે માલદાર નાહ.”

કેલ્લીજ ગોઠી ચિંતા નાય કેરુલો

²² ફાચે ઇસુહુ તીયા ચેલાહાને આખ્યો, “ઈયા ખાતુર આંય તુમનેહે આખુહુ, કા પોતા જીવનુ ચિંતા નાય કેરુલો, કા આમુહુ કાય ખાહુ, આને તેહકીજ પોતા શરીરુ ચિંતા બી નાય કેરુલો, કા આમુહુ કાય પોવુહુ.”

²³ કાહાકા માંડો કેતા જીવ, આને પોતળા કેતા શરીર ખુબ કિંમતી હાય.

²⁴ કાગળાહા વિચાર કેરા, તે નાહ બીયારો પોતા, નાહ વાડતે; તે નાહ મોલીને કોઠીમે થોવતે; તેબી પરમેહેર તીયાહાને ખાંઅ પુરો પાળેહે, કાહાકા તુમુહુ ચીળા કેતા બી કિંમતી હાય.

²⁵ તુમામેને એહેડો કેડો હાય, જો પોતે જીવનુ વિશે ચિંતા કીને પોતે જીવન વાદાવી સેકેહે?

²⁶ ઈયા ખાતુર તુમુહુ બાદા કેતા હાનો કામ બી નાહા કી સેક્તે, તા તુમા જીવનુમે બીજી વસ્તુ વિશે કાહા ચિંતા કેતેહે?

²⁷ “ફુલાં છોડાપે વિચાર કેરા, કા તે કેહકી વાદતેહે; આને તે નાહ મેહેનત કેતે; તેબી આંય તુમનેહે આખુહુ, કા સુલેમાન રાજાપે ખુબ માલ-મિલકત આથી, તેબી તીયા ફુલાં હોચે ખુબ હારે પોતળે તીયાપે નાય આથે.”

²⁸ ઈયા ખાતુર કાદાચ પરમેહેર મેદાનુમેર્યા ચારાલે જો આજ હાય, આને હાકાલ આગીમે બાલી ટાકાય, એહેડો પોવાવેહે; તા ઓ ઓછા વિશ્વાસી લોકુહુ, તા તોઅ તુમનેહે વાદારે હારી રીતે કાહા નાય પોવાવે.

²⁹ “આને તુમુહુ ઈયુ ગોઠી ચિંતા માઅ કેહા કા આમુહુ કાય ખાંહુ, આને કાય પીયુહુ, આને તુમા મનુમે શક માઅ કેહા.”

³⁰ કાહાકા જગતુ માંહે જે પરમેહેરુલે નાહ ઓખુતે તેંજ ઈયુ બાદી ગોઠી ચિંતા કેતેહે, પેન તુમા હોરગામેને બાહકો હાય, તોઅ જાંહે તુમનેહે ઈયુ બાદી વસ્તુ જરુર હાય.

³¹ પેન તુમા જીવનુમે પરમેહેરુ રાજ્યાલે અનુભવ કેરા, તાંહા તે વસ્તુ તુમનેહે મીલી જાંય.

ધનુલે કાંહી એકઠો કેરુલો

³² તુમુહુ ઘેટાંહા હાના ટોલા હોચે હાય, ઈયા ખાતુર કેલ્લી બી ગોઠી વિશે બીયાહા માઅ; કાહાકા તુમા પરમેહેરુ બાહકાલે ઇ પસંદ હાય, કા તુમનેહે રાજ્યો દે.

³³ પોતા માલ-મિલકતુલે વેચીને ગરીબુહુને દાન કી દેઅ; આને તુમા માલ-મિલકત એહેડા જાગામે થોવા જીહી ઘટી નાય જાય, એટલે કા હોરગામે તીહી ચોર પાહી આવી નાય સેકેતો, આને કીડે તીહી નાશ નાય કી સેક્તે.

³⁴ કાહાકા જીહી તુમા માલ-મિલકત હાય, તીહીજ તુમા મન લાગી રી.

જાગતા રેજા

³⁵ “પોતા કમર બાંદીને દીવા સીલગાવીને હમેશા સેવા ખાતુર, આને માઅ આગમનુ ખાતુર તીયાર રેજા.

³⁶ આને તુમુહુ તીયા ચાકરુ હોચ વેરા, જો પોતા માલિક વોરાળુ દાવતુમેને કેહેડી વેલે ફાચો આવી, તીયા વાટ જો વેહે; કા જાંહા તોઅ આવીને બાંણો ઠોકે, તાંહા તોઅ તુરુત બાંણો તીયા ખાતુર ખોલી દે.

³⁷ જો ચાકર માલિક આવે તામ લોગુ વાટ જોવતો વી, તોઅ ચાકર ધન્ય હાય, આંય તુમનેહે ખેરોજ આખુહુ, કા તોઅ એક ચાકરુ હોચે પોતળે પોવીને તીયાલે માંડો ખાંઅ બોહાવી, આને પાહી આવીને તીયા સેવા કેરી.

³⁸ કાદાચ તોઅ આર્દી રાતી આવે, કા વેગીવેલ આવે, આને તીયા ચાકરુલે જાગતો હેઅ, તોઅ ચાકર ધન્ય હાય.

³⁹ પેન તુમુહુ ઇ જાંયલ્યા, કા કાદાચ પોંગા માલિક જાંઅતો કા ચોર કેલ્લા સમયુલ આવી, તા તોઅ જાગતો રેતો, આને તોઅ પોતા પોંગાલે લુટા નાય દેતો.

⁴⁰ પેન તુમુહુ માઅ ફાચો આવુલો ખાતુર તીયાર રેજા, કાહાકા આંય, માંહા પોયરો એહેડા સમયુલે હોરગામેને આવેહે, જો તુમુહુ માંહા પોયરા આવુલો વિચાર બી નાય કી રીયે વેરી.”

વિશ્વાસુ યોગ્યો સેવક કેડો?

⁴¹ તાંહા પિત્તરુહુ ઇસુલે આખ્યો, “ઓ પ્રભુ, તુ ઓ દાખલો આમનેહે ઓતોજ આખોહો, કા બાદાહાને આખોહો?”

⁴² પ્રભુહુ આખ્યો, તુમનેહે બી આને બીજાહાને બી આખુહુ, “તોઅ વિશ્વાસ યોગ્યો આને બુદ્ધિ વાલો ચાકર કેડો હાય, જીયા માલિકુહુ તીયાલે નોકરુ આને ચાકરુ ઉપે કારભારી બોનાવ્યોહો, કા તીયાહાને સમયુપે માંડો ખાવુલો સામગ્રી આપે, આને તોઅ માલિક લાંબી મુસાફરીમે જાતો રીયો.

⁴³ આને તોઅ ચાકર માલિક ફાચો આવે, તાંહા તીયાલે માલિકુ હોપલો કામ હારી રીતે કેતા હેઅ, તોઅ ચાકર ધન્ય હાય.”

⁴⁴ આંય તુમનેહે ખેરોજ આખુહુ, કા તોઅ માલિક તીયા ચાકરુલે પોતા બાદીજ માલ-મિલકતુ કારભારી બોનાવી.

⁴⁵ પેન જો તોઅ ચાકર પોતા મનુમે એહકી વિચાર કે, કા માંઅ માલિક આવા ખાતુર વા લાગવી રીયોહો, આને એહકી વિચારીને પોતા આર્યા ચાકરુહુને ઠોકા લાગે, આને ખાય પીને સાકાં લાગે.

⁴⁶ તાંહા તીયાહા વિચાર બી નાય કેયો વેરી, તીયા દિહુલે તીયા માલિક આવી જાંય, આને તીયાલે કડક શિક્ષા આપી, આને તીયાલે વિશ્વાસ ઘાતી લોકુહુને જીહી શિક્ષા મીલેહે, તીયા જાગામે મોકલી દી.

⁴⁷ તાંહા જો ચાકર તીયા માલિકુ ઈચ્છા જાયને, બી તીયા હોપલો કામ નાય પુરો કે, તીયાલે કડક દંડ મીલી.

⁴⁸ પેન જો માલિકુ ઈચ્છા જાંયા વગર દંડ મીલવુંલો કામ કેરી, તીયા ચાકરુલે ઓછો દંડ મીલી. ઈયા ખાતુર જીયાલે પરમેહેરુહુ વાદારે આવુળ દેદીહી, તીયાપે તોઅ વાદારે હિસાબ માગી, આને જીયાલે વાદારામ વાદ આવુળ પરમેહેરુહુ આપીહી, તીયાપેને તોઅ વાદારામ વાદ હિસાબ માગી.

લોકુમે ફાટ-ફુટ પોળી તીયા વિશે

⁴⁹ “આંય તોરતીપે આગ લાગવા આલોહો; તે આગ આમીજ લાગી જાય એહકી માઅ ઈચ્છા હાય!

⁵⁰ માને માહરીજે ભયંકર દુઃખ વેઠુલો હાય; આને જામલુગુ તોઅ દુઃખ નાય આવે તામલુગુ આંય ખુબ વ્યાકુલ રેહે!

⁵¹ ઈયા જગતુ લોક એક-બીજા આરી શાંતિકી રે તીયા લીદે આંય આલોહો, એહકી તુમુહુ હોમજુતાહા કા? પેન આંય તુમનેહે; આખુહુ કા નાહ પેન અલગ કેરા આલોહો.

⁵² કાદાચ આમીને એક કોમે પાંચ માંહે વેરી, તા તે એકબીજા વિરુધ વી જાય, તીયામેને તીન માંહે જે માપે વિશ્વાસ નાહ કેતે તે તીયા બેન માંહા વિરુધુમે વેરી.

⁵³ બાહકો તીયા પોયરા વિરુધ વેરી, આને પોયરો તીયા બાહકા વિરુધ વેરી; યાહકી તીયુ પોયરી વિરુધ વેરી, આને પોયરી તીયુ યાહકી વિરુધ વેરી, આને હાવુળી તીયુ વોવળી વિરુધ વેરી, વોવળીહી તીયુ હાવુળી વિરુધ વેરી, એહકી લોકુમે ફાટ-ફુટ પોળી.”

સમયુ ઓળખ

⁵⁴ આને ઇસુહુ લોકુ ટોલાલે બી આખ્યો, “દિહ બુડતાવેલ કાલા વાદલાહાને ચોળતા હીને, તુમુહુ તુરુતુજ આખતાહા કા પાંય પોળી; આને એહકીજ વેહે.

⁵⁵ આને ઉનો વારો ચાલેહે તાંહા તુમુહુ આખતાહા કા લુ આવી, આને તેહકીજ વેહે.

⁵⁶ ઓ ઢોંગીહી, તુમુહુ તોરતી આને જુગુ દેખાવુપે ભેદ પારખી સેક્તાહા, પેન ઈયા જમાનામે પરમેહેર જો કાય કી રીયોહો, તીયા ભેદ તુમુહુ કાહા નાહા જાંતા.”

તોઅ વિરોધી આરી હોમજણ કીલ્યા

⁵⁷ “તુમુહુ પોતેજ ફેસલો કાહા નાહ કી લેતા, કા ખેરો કાય હાય?

⁵⁸ જાંહા તોઅ વિરુધુ વાલો તુલે કોર્ટુમે લી જાય, તેહેડામે તીયા આરી વાટેજ હોમજી જાંઅ કોશિશ કી લે, નેતા એહકી નાય વે, કા તોઅ તુલે ન્યાયધીશુહી લી જાય, આને ન્યાયધીશ તુલે સિપાયુ આથુમે હોપે, આને સિપાય તુલે જેલુમે પુરી દે.

⁵⁹ આંય તુલે ખેરોજ આખુહુ, તુ જાવ લોગુ પુરા-પુરા પોયસા નાય આપો, તામ લોગુ તુ જેલુમેને નીગી નાય સેકો.”