યાકુબુ પત્રો 4 - દુબલી નવો કરાર

જગતુ આરી દોસ્તી

¹ તુમામે લડાય આને ઝગળા કાહીને આવતાહા, ઇ તા તીયુ સ્વાર્થી ઈચ્છાકી આવેહે જો તુમા શરીરુ અંગુ આરી લડાય કેતે રેતેહે.

² તુમુહુ લાલચ રાખતાહા, પેન તુમનેહે મીલતો નાહ, ઈયા ખાતુરે તુમુહુ ખુન કેરા તીયાર વેતાહા, તુમુહુ ડાંહુ કી તીયુ વસ્તુ લાલચ કેતાહા જે બીજા પાહી હાય, પેન તુમુહુ કાયજ નાહ મીલવુતા, ઈયા ખાતુરે તુમુહુ ચુલાતાહા આને ઝગળો કેતાહા; કાહાકા તુમનેહે ઈયા ખાતુરે નાહ મીલતો કા તુમુહુ પરમેહેરુપે ઇયાલે નાહ માગતા.

³ તુમુહુ માગતાહા તેબી તુમનેહે નાહ મીલતો કાહાકા કા તુમુહુ ખારાબ ઈચ્છાકી માગતાહા, કા પોતા મોજ-મોજામે ઉડવી ટાકા માગતાહા ઓ વ્યેભીચારીહી, કાય તુમુહુ ઇ નાહ જાંતા કા જગતુ વસ્તુકી દોસ્તી કેરુલો મતલબ હાય પરમેહેરુ આરી દુશ્મની રાખુલો?

⁴ ઈયા ખાતુરે જો જગતુ દોસ્દાર વેરા માગેહે, તોઅ પોતાલે પરમેહેરુહુ દુશ્મન બોનાવેહે.

⁵ કાય તુમુહુ ઇ હોમજુતાહા, કા પવિત્રશાસ્ત્ર ઇ આખુલો નક્કામો હાય, “જીયુ પવિત્રઆત્માલે તીયાહા આપુ વોચ્ચે વસાવીહી, મોડા લાલસા કી આપુ ખાતુરે ઈચ્છા રાખેહે?”

⁶ પેન તે કૃપા જે પરમેહેર દેહે, ખુબુજ તાકતવર હાય, ઈયા કારણુકી પવિત્રશાસ્ત્રમે ઇ લેખલો હાય, “પરમેહેર ઘમંડી લોકુ વિરુધ કેહે, પેન નમ્ર લોકુપે કૃપા કેહે.”

⁷ ઈયા ખાતુરે પરમેહેર બી આધિન વી જાઅ આને તોઅ કેરા માટે ઇનકાર કી ધ્યા જો શૈતાન ઈચ્છા રાખેહે કા તુમુહુ કેરા, તા તોઅ તુમા પાહીને નાહી જાય.

⁸ પરમેહેરુ પાહી આવા તા તોઅ બી તુમા પાહી આવી, ઓ પાપીહી, પોતા જીવનુમેને દરેક પાપુલે દુર કેરા, આને ઓ બેન મનુ વાલા લોકુહુ, પોતા રદયુલે પવિત્ર કેરા.

⁹ પોતા પાપુ ખાતુરે ઉદાસ વેરા, આને દુખુમે રોળા તુમા દુખુમે આને તુમા ખુશી ઉદાસીમે બોદલી જાય.

¹⁰ પ્રભુ હુંબુર નમ્ર બોનાવા તોઅ તુમનેહે ઉચ્ચે ઉઠાવી.

પાવુહુપે દોષ લાગવુલો

¹¹ ઓ મેરાલાહા, એકબીજા વિરુધ ખોટયા ગોઠયા માઅ કેરાહા, જો પોતા પાવુ બદનામી કેહે નેતા પાવુપે દોષ લાગવેહે, તોઅ નિયમુ બદનામી કેહે આને નિયમુપે દોષ લાગવેહે, કાદાચ તુ નિયમ પે દોષ લાગવે તા તુ નિયમુપે ચાલનારો નાહ, પેન તીયાપે દોષ એહેકી દોષ લાગવોહો જેહેકી કા તુ મુસા નિયમુ ન્યાય કેનારો હાય.

¹² નિયમ આપનારો આને ન્યાય કેનારો પરમેહેરુજ હાય જીયામે વાચાવુલો આને નાશ કેરુલો સામર્થ હાય, તા તુમુહુ કેડા હાય કા તુમા આર્યા પે દોષ લાગવુતાહા.

ઘમંડુ વિરુધ ચેતવણી

¹³ તુમુહુ જે ઇ આખાતાહા, આજ નાય નેતા હાકલ આપુહુ એગા બીજા શેહેરુમે જાયને એક વોર્ષે લોગો તીહી રીને વેપાર કીહુ આને ધન કામાવુહુ,

¹⁴ પેન તુમુહુ ઇ નાહ જાંતા કા હાકાલ કાય વેરી તુમા જીવન તા તુવારા હોચે હાય જો થોડીક વા દેખાહે આને ફાચે જાતો રેહે.

¹⁵ ઈયા લીદે તુમુનેહે ઇ આખા જોજે, “કાદાચ પ્રભુ ઈચ્છે તા આપુહુ જીવતા રીહુ, આને ઇ નેતા તોઅ કામ બી કીહુ.”

¹⁶ પેન આમી તુમુહુ પોતા અભિમાનુ યોજના વિશે ઘમંડ કેતાહા, યા પ્રકારુ બાદો ઘમંડ ખારાબ રેહે.

¹⁷ ઈયા ખાતુરે જો કેડો ભલાય કેરા જાહે આને નાહ કેતો, તીયા માટે ઓ પાપ હાય.