યાકુબુ પત્રો 2 - દુબલી નવો કરાર

ભેદભાવુ વિરુધ ચેતવણી

¹ ઓ માઅ મેરાલાહા તુ આમા મહિમાવાન પ્રભુ ઇસુ ખ્રિસ્તુ ચેલા હાય, ઈયા ખાતુરે તુમામે ભેદભાવુ વર્તન નાય વેઅ.

² માનીલ્યા કાદાચ એક આદમી આથુમે હોના મુંદી આને હારે પોતળે પોવીને તુમા સભા મેં આવે આને કે ગરીબ બી મોલવાલે પોતળે પોવીને આવે,

³ આને તુ તીયા હારે પોતળે પોવનારાલે વાદારે માન આપીને આખો, “તુ તીહી હારા જાગામે બોહે,” આને તીયા ગરીબુલે આખો, “તુ ઇહી ઉબી રે,” નેતા “ઇહી માઅ પાગુ પાહી નીચે બોહ.”

⁴ તા કાય તુમુહુ ઇયામે ભેદભાવ નાહ કેયો, આને કાય તુમુહુ ખારાબ વિચારુકી ન્યાય કેનારા નાહ વીયા?

⁵ ઓ માઅ મેરાલા પાવુહુ આને બોયુહુ ઉનાયા કાય પરમેહેરુહુ ઈયા જગતુ ગરીબ લોકુહુને નાહ પસંદ કેયા, કા વિશ્વાસુમે માલદાર, આને હોરગા રાજ્યા અધિકારી વેઅ, જીયા વાયદો તીયાહા તીયાહાને કેયોહો, જે તીયાલે પ્રેમ કેતેહે?

⁶ પેન તુમુહુ તીયા ગરીબુ અપમાન કેયો, તુમુહુ જાંતાહા એ ધનવાન લોકુજ હાય, જે તુમાપે જુલુમ કેતાહા, આને તેજ હાય જે તુમનેહે ન્યાયસભામે લી જાતાહા.

⁷ તે તેજ હાય, જે ઇસુ ખ્રિસ્તુ ઉત્તમ નાવુ વિરુધ ખારાબ ગોઠયા ગોગતાહા, જીયા નામુકી તુમુહુ ઓખાતાહા.

⁸ તેબી કાદાચ તુમુહુ પવિત્રશાસ્ત્ર ઈયા વચનુ અનુસાર, કા “તુ પોતા પડોશી આરી પોતા સમાન પ્રેમ કે,” તા ખરેખર તીયા રાજય નિયમુ પુરો કેતાહા, તા હારોજ કેતાહા.

⁹ પેન કાદાચ તુમુહુ પક્ષપાત કેતાહા તા પાપ કેતાહા, આને નિયમશાસ્ત્ર તુમનેહે અપરાધી ઠેરવેહે.

¹⁰ કાહાકા જો કેડો બાદા નિયમશાસ્ત્ર પાલન કેહે, પેન કાદાચ એક આજ્ઞાલે બી તોળેહે તા તોઅ બાદી ગોઠી ગુનેહગાર ગોણવામે આવેહે.

¹¹ કાહાકા જીયાહા આખ્યો વ્યેભિચાર નાય કેરુલો તીયાહા એ બી આખ્યો, “ખુન માઅ કીહા,” ઈયા ખાતુરે જાંહા તુમુહુ વ્યેભિચાર નાહ કેતા આને ખુન કેતાહા તેબી તુમુહુ નિયમશાસ્ત્રલે તોળનારા ઠેર્યા.

¹² તીયા લોકુ સમાન ગોગા આને વ્યેવહાર કેરા, જીયા ન્યાય સ્વતંત્રતા નિયમુ અનુસાર કેરામે આવી.

¹³ કાહાકા જીયાહા દાયા નાહ કેયી, તીયા ન્યાય બી વગર દાયા વેરી, દયા ન્યાયુપે વિજય કેરી.

વિશ્વાસ આને કાર્ય

¹⁴ ઓ માઅ મેરાલાહા કાદાચ એગોહો આખે કા આંય ઇસુ ખ્રિસ્તુપે વિશ્વાસ કીહુ, પેન ભલે કામે નાય કેતા ઇયાકી કાય લાભ? કાય એહેડો વિશ્વાસ કીદીહી તીયા ઉદ્ધાર કી સેકેહે?

¹⁵ કાદાચ એગોહો વિશ્વાસી પાવુહુ બોયુલે પોતળા જરુર વેરી આને તીયા પાહી દરેક દિહી ખાંઅ ખાતુરે માંડો નાય વેઅ,

¹⁶ આને તુમામેને એગુહુ તીયુલે આખે, “પરમેહેર તુલે આશીર્વાદ દેઅ, શાંતિકી જો તુ ગરમ રેઅ આને તૃપ્ત રેજે,” પેન જે વસ્તુ શરીરુ ખાતુરે જરુરી હાય કાદાચ તુમુહુ તે વસ્તુ નાય ધ્યા કાય લાભ?

¹⁷ તેહેકીજે વિશ્વાસ બી હારા કામુ નાય વેઅ તા પોતા સ્વભાવુમે મોલો હાય.

¹⁸ પેન કેડો આખી સેકેહે, “તુલે વિશ્વાસ હાય આને આંય ભલે કામે કેતોહો.” પેન આંય આખુહુ કા તુ પોતા વિશ્વાસ માને ભલા કામુ વગર આખ, આને આંય પોતા વિશ્વાસ પોતા ભલા કામુ મારફતે તુલે આખેહે.

¹⁹ માને વિશ્વાસ હાય કા એકુજ પરમેહેર હાય, તુ હારો કીહો; પુથ બી વિશ્વાસ કેતા આને કાપતાહા.

²⁰ પેન મુર્ખ માહા કાય તુ ઇ બી નાહ જાંતો હારા કામુ વગર વિશ્વાસ બેકાર હાય?

²¹ જાંહા આપુ બાહકા ઇબ્રાહીમુહુ પોતા પોયરા ઇસાકુલે વેદીપે ચોળવ્યો તા કાય તોઅ ભલા કામુકી ધાર્મિક નાહ બન્યો?

²² હેરા, ઇબ્રાહીમુહુ નાય ખાલી પરમેહેરુ વિશ્વાસ કેલો, પેન તીયાહા તોઅ બી કેલો જો કાય પરમેહેરુહુ તીયાલે આખલો આને તીયા વિશ્વાસ તીયા કામુ મારફતે પુરો વીયો.

²³ આને પવિત્રશાસ્ત્ર ઇ વચન પુરો વીયો, “ઇબ્રાહીમુહુ પરમેહેરુપે વિશ્વાસ કેયો આને તીયા વિશ્વાસુ લીદે તીયાલે એક ધર્મી માંહા રુપુમે ગોણવામે આલો,” આને તોઅ પરમેહેરુ દોસ્દાર આખાયો,

²⁴ ઈયુ રીતીકી તુમુહુ હીઅ લેદો કા માંહા ખાલી વિશ્વાસુકીજ નાય, પોતા કામુ મારફતે ધર્મી ગોણવામે આવેહે.

²⁵ તેહેકીજ રાહાબ વેશ્યા બી જાંહા તીયુહુ ખબર આપનારાહાને પોતા કોમે રાંઅ ખાતુરે જાગા દેદી આને તીયાહાને બીજી વાટીપે રાખીને વિદા કેયા, કામુ મારફતે ધર્મી ગોણવામે આલી.

²⁶ જેહેકી શરીર શ્વાસ વગર મોલો હાય તેહેકીજ વિશ્વાસ બી ભલા કામુ વગર મોલો હાય.