હિબ્રૂઓને પત્રો 8 - દુબલી નવો કરાર

ઇસુ આપુ મહાયાજક

¹ આમી તા ગોઠયા કેતાહા, તીયામેને મોડી ગોઠ ઇ હાય, કા આમાપે એહેડો મહાયાજક વેઅ જો હોરગામે મહિમામય પરમેહેરુ રાજગાદી હુદીવેલ બોઠલો હાય.

² આપુ મહાયાજક હોરગા મહા પવિત્રસ્થાનુપે આને તીયા હાચા મંડપુમે સેવા કેહે, જો લોકુહુને નાહ પેન પ્રભુહુ બોનાવીહી.

³ કાહાકા દરેક મહાયાજક અર્પણ આને બલિદાન ચોળવા માટે ઠેરવામે આલોહો, ઈયા ખાતુરે ઇ જરુરી હાય કા તીયા પાહી ચોળવા માટે કાંવીહી રેઅ.

⁴ કાદાચ ઇસુ ખ્રિસ્ત ઈયા જગતુમે રેતો તા કીદીહી બી યાજક નાહ બોનતો, કાહાકા જગતુમે મુસા નિયમ અનુસાર અર્પણ ચોળવુનારો માટે પેલ્લાનેજ ખુબ હાય.

⁵ જો યાજક એ સેવા કી રીયોહો, તોઅ પવિત્રસ્થાનુ ભવન હોરગામે ખાલી એક નકલ આને નમુનો હાય, પેન જેહેકી હોરગામે હાય તીયા હોચે નાય. કાહાકા જાંહા મુસા મંડપ બોનાવા ખાતુરે તીયાર વેતલો, તાંહા પરમેહેરુહુ તીયાલે એ ચેતવણી આપી, “હેઅ, ડોગુપે જો નમુનો માયુહુ તુલે આપલો, તીયા અનુસારુજ તુલે બાદો કામ કેરુલો હાય.”

⁶ પેન જો યાજકુ સેવા આપુ પ્રભુ ઇસુ ખ્રિસ્તુલે હોપી દેવામે આલીહી, તોઅ બીજા યાજકુ કેતા ખુબુજ ઉત્તમ હાય. કાહાકા તોઅ જીયુ વાચા મેલ-મિલાપ હાય તે જુની વાચા હાય, આને ઉત્તમ વસ્તું વાયદા આધારુપે હાય.

⁷ કાહાકા કાદાચ પેલ્લા વાયદામે કેલ્લોજ દોષ નાહ રેતો, તા બીજી વાચા જરુરત નાહ પોળતી.

⁸ પેન પરમેહેરુહુ લોકુપે દોષ લાગવીને આખેહે, “પ્રભુ આખેહે કા હેરા તે દિહ આવી રીયાહા, આંય ઇસ્રાએલુ પીઢી લોકુ આરી, આને યહુદા પીઢી આરી નવા વાયદાલે બાંદેહે.”

⁹ એ વાચા, મિસર દેશુમેને તીયા આગલા ડાયાહાને કાડી લાવુલો સમયુલે કેલી, તીયા હોચે કેડોજ નાય વેઅ. કાહાકા પ્રભુ આખેહે કા તે માઅ બાંદલા વાયદા અનુસાર નાહ ચાલ્યા, ઈયા ખાતુરે માયુહુ તીયાં સુદ્ધિ નાય લેદી.

¹⁰ ઈયા ખાતુરે પ્રભુ આખેહે, કા જે વાયદાલે આવનારા દિહુમે આંય ઇસ્રાએલ દેશુ લોકુ આરી કેહે, તે એ હાય કા આંય માઅ નિયમ તીયાં મનુમે ટાકેહે, આને તીયાલે તીયા રદયુમે લેખેહે, આને આંય તીયાહાને પરમેહેર આખાહે આને તે માઅ લોક આખાય.

¹¹ “આને કેલ્લો બી માંહાલે પોતા દેશુ, કા પોતા યહુદીહીને ઇ આખા જરુર પોળે, કા તુમુહુ પ્રભુલે ઓખા, કાહાકા હાના પોયરાહાને લીને ડાયા માંહાહી લોગુ બાદા લો જાંય લી કા આંય તીયાં પરમેહેર હાય.

¹² કાહાકા આંય તીયાં પાપ માફ કેહે, આને તીયાં એક બી પાપ યાદ નાય કિવ્યુ.”

¹³ પરમેહેરુહુ ઈયુ વાચાલે નવી વાયદો આખી, ઈયા કારણુકી જે પેલ્લો વાયદો આથો તોઅ આમી જુની વાચા બોની ગીયીહી, આને જો કાય જુનો વગર કામુ હાય તોઅ થોડા સમયુમે પારવાય જાય.