હિબ્રૂઓને પત્રો 2 - દુબલી નવો કરાર

મહાન ઉદ્ધાર

¹ ઈયા ખાતુરે આમુહુ જાંહા ઉનાયાહા, તીયુ હાચાયુકી ભટકી નાય જાજી પેન તીયુપે વાદારે ધ્યાન આપજી.

² કાદાચ પરમેહેર સુવાર્તા જે હોરગાદુતુ મારફતે આપનેહે આપવામે આલી, તે સાદા સત્ય રીયીહી, આને જીયાહા તીયા આજ્ઞા પાલન નાહ કેયો તીયાહાને પરમેહેરુહુ દંડ આપ્યોહો.

³ આમુહુ એહેડા ઉદ્ધારુ વિશે ધ્યાન આપજી તા કેલ્લી રીતીકી વાચાય સેકુહુ? ઈયા ઉદ્ધારુ ગોઠ બાદા પેલ્લા પ્રભુ ઇસુ ખ્રિસ્તુહુ આખલી, આને જે લોક ઉનાયા તીયાહા તે સુવાર્તા હાચી એહેકી સાબિત કેયી.

⁴ તીયા આરી-આરી પરમેહેરુહુ બી ચિન્હ ચમત્કાર આને અલગ-અલગ પ્રકારુ અદભુત કામે કીને આને પોતા ઈચ્છાકી પવિત્રઆત્મા વરદાન આપીને ઇયાલે સાબિત કેતો રીયો.

આમા ઉદ્ધાર કેનારો

⁵ પરમેહેરુહુ તીયા આવનારા યુગુલે જીયા વિશે આપુહુ ગોઠયા કેતાહા, તોઅ હોરગાદુતુ આથુમે નાહ હોપ્યો, પેન પ્રભુ ઇસુ આથુમે હોપ્યોહો.

⁶ પવિત્રશાસ્ત્ર કાંહી બી એહેકી નાહ આખવામે આલો કા, “માંહુ કાય હાય, કા તુ તીયા દેખભાલ કીહો? માંહા પોયરો કેડો હાય કા તુ તીયા ચિંતા કીહો?”

⁷ તુયુહુ તીયાલે હોરગાદુતુ બરાબર આદર આને મહિમા આપી, આને તોઅ બોનાવલી દુનિયાપે તીયાલે અધિકાર આપ્યો.

⁸ કા તોઅ બાદી વસ્તુપે રાજ કે. જાંહા પરમેહેરુહુ બાદોજ તીયા આધિનુમે કી દેદોહો, તા તીયાહા કાય બી એહેડો છોડયો જો તીયા આધિનુમે નાય વેરી, પેન આમી લોગુ આમા નજર ઇ દેખાવેહે કા બાદી વસ્તુ તીયા આધિનુમે નાય વેઅ.

⁹ પેન આમુહુ ઇસુલે હેતાહા કા થોડા સમયુ માટે હોરગાદુતુ કેતા ઓછા સામર્થું કેયો, કા પરમેહેરુ કૃપા માટે તોઅ બાદા લોકુ માટે મોય જાય. તીયાહા ખુબુજ દુઃખ વેઠયો આને મોય ગીયો, ઈયા કારણુકી તીયાલે આદર આને મહિમા મુગુટ પોવાવ્યો.

¹⁰ કાહાકા પરમેહેરુહુ બાદોજ બોનાવ્યોહો આને બાદી વસ્તુલે પોતા માટે હાંબાલી રાખીહી, આને ખુબુજ લોકુહુ પોતા મહિમામે ભાગીદાર કેયા, ઈયા ખાતુરે પરમેહેરુલે ઇંજ હારો લાગ્યો કા ઉદ્ધારુ વેલે લી જાનારો પ્રભુ ઇસુ ખ્રિસ્ત દુઃખ વેઠીને પુરો સિદ્ધ વી જાય.

¹¹ કાહાકા લોકુહુને પવિત્ર કેનારો એટલે ઇસુ ખ્રિસ્ત આને જો પવિત્ર વેહે, બેનુ એકુજ બાહકા પોયરો-પોયરી હાય, એટલે પરમેહેરુ, ઈયા કારણુકી ઇસુ ખ્રિસ્ત તીયાહાને પાવુ-બોંય આખુલોકી નાહ નાજવાતો.

¹² આને ઇસુ ખ્રિસ્ત પરમેહેરુલે ઇ આખેહે કા, “જો કેડો તુયુહુ માઅ ખાતુરે કેયોહો તોઅ પાવુ-બોયુહુને આખેહે, જાંહા લોક તોઅ આરાધના કેરા માટે એકઠા વેરી, તાંહા આંય તોઅ મહિમા કેહે.”

¹³ આને તોઅ ફાચે આખેહે કા, “આંય પરમેહેરુપે ભોરોષો રાખેહે,” આને ફાચે ઇ બી આખતાહા, “ઇહી આંય તીયા લોકુ આરી હાય જીયાહાને પરમેહેરુહુ માને આપ્યાહા, તે માઅ પોયરા હોચે હાય.”

¹⁴ કાહાકા પરમેહેરુહુ પોયરો-પોયરી લોક હાય, જે માહ આને રોગુતુ બોનલા હાય, આને ઇસુ બી એક માંહુ બોની ગીયોહો, કા તીયા મૃત્ય મારફતે શૈતાનુલે નાશ કે, જીયાલે મોતુપે અધિકાર હાય.

¹⁵ ઈયા મારફતે પ્રભુ ઇસુ ખ્રિસ્તુહુ જો પોતા બાદો જીવન મૃત્ય બીખીમે જીવતલા તીયાં ઉદ્ધાર કેયો.

¹⁶ કાહાકા પ્રભુ ઇસુ તા હોરગાદુતુ નાહ પેન ઇબ્રાહીમુ પીઢી લોકુ મદદ કેહે.

¹⁷ ઈયા કારણુકી તીયાલે બાદી ગોઠીમે બાદા લોકુ હોચે વેરા જોજે, કા તોઅ એક દયાલુ આને ઈમાનદાર મહાયાજકુ રુપુમે પરમેહેરુ સેવા કી સેકે આને આપુ પાપુ માફી માટે પોતે બલિદાન વી સેકે.

¹⁸ કાહાકા જાંહા તીયા પરીક્ષા વેયી તા તીયાહા દુઃખ વેઠયો, ઈયા ખાતુરે તોઅ પરિક્ષામે પોળલા લોકુ મદદ કી સેકેહે.