ગલાતિઓ પત્રો 3 - દુબલી નવો કરાર

મુસા નિયમુ વિશ્વાસ

¹ ઓ ગલાતિયા વિસ્તારુ લોકુહુ, તુમા દિમાગ ખારાબ વી ગીયોહો, તુમુહુ ભરમાવનારો કેડો હાય? તુમનેહે તા ઇસુ ખ્રિસ્ત ક્રુસુપે ચોળવુલો વિશે હારી સુવાર્તા આખલી.

² આંય તુમનેહે એક ગોઠ ફુચા માગુહુ, તુમુહુ કાય હોમજુતાહા કા પવિત્રઆત્મા તુમનેહે મુસા નિયમ પાલન કેરા કી મીલ્યો? નાહ બિલકુલ નાહ, પેન હારી સુવાર્તાલે ઉનાયને ખ્રિસ્તુપે વિશ્વાસ કેરા લીદે મીલીહી.

³ તુમા દિમાગ ઓતો ખારાબ વી ગીયોહો, કા તુમુહુ પવિત્રઆત્મા મારફતે પોતા નવો જીવન શુરુ કેયોહો, આને આમી તુમુહુ પોતા રીતીકી પુરો કેરા માગતાહા.

⁴ તુમુહુ વિશ્વાસ કેરા બાદ નક્કામો દુઃખ નાહ વેઠયો, પેન ખરેખર આમી આંય આશા રાખુહુ કા તોઅ નક્કામો આથો.

⁵ પરમેહેરુહુ, જે પવિત્રઆત્મા આપેહે આને તુમામે ચમત્કાર કેહે, તોઅ મુસા નિયમ પાલન કેરા લીદે નાહ, પેન હારી સુવાર્તાપે વિશ્વાસ કેરા લીદે વેહે.

⁶ ઇબ્રાહીમુ વિશે વિચાર કેરા, તીયાહા પરમેહેરુપે વિશ્વાસ કેયો આને તીયા લીદે પરમેહેરુહુ તીયાલે ધર્મી ઠેરવ્યો.

⁷ ઈયા ખાતુરે તુમનેહે હોમજા જોજે કા જે લોક ઇબ્રાહીમુ સમાન પરમેહેરુપે વિશ્વાસ કેતાહા તે ઇબ્રાહીમુ ખેરી પીઢી નાહ.

⁸ પવિત્રશાસ્ત્રમે ખુબુજ સમય પેલ્લા ઇ લેખવામે આલ્લો, કા પરમેહેર અન્યજાતિ લોકુહુને વિશ્વાસુ મારફતે ધર્મી ઠેરવી, ઈયા ખાતુરે પરમેહેરુહુ પેલ્લાનેજ એ હારી સુવાર્તા ઇબ્રાહીમુલે ઉનાવી દેદલી, કા “તોઅ મારફતે ઈયા જગતુ બાદા લોકુહુને આશીર્વાદ આપેહે.”

⁹ ઈયા ખાતુરે જે લોક ઇબ્રાહીમુ હોચે પરમેહેરુહુપે વિશ્વાસ કેતાહા તે તીયા હોચે આશીર્વાદ મીલવી.

¹⁰ જોતા લોક મુસા નિયમુપે ભોરોષો રાખતાહા, તે પરમેહેરુ શ્રાપુ આધિનુમે હાય, કાહાકા પવિત્રશાસ્ત્રમે લેખલો હાય, “જો કેડો મુસા બાદા નિયમુ પાલન નાહ કેતો તોઅ પરમેહેરુ શ્રાપુ આધિન હાય.”

¹¹ પેન એ ગોઠ સાફ હાય કા કેલ્લો બી માંહુ મુસા નિયમુ પાલન કેરા લીદે પરમેહેરુ નજરીમે ધર્મી નાહ ઠેરતો, કાહાકા પવિત્રશાસ્ત્રમે લેખલો હાય કા, “ધર્મી માંહુ પરમેહેરુપે વિશ્વાસ કેરા લીદે જીવતો રીઅ.”

¹² મુસા નિયમુ પાલન કેરુલો આને પરમેહેરુપે વિશ્વાસ કીને જીવા એક સમાન નાહ, પેન જેહેકી પવિત્રશાસ્ત્રમે લેખલો હાય, “જો કેડો મુસા નિયમુ બાધ્યા ગોઠયા માની તોઅ તીયુ મારફતે જીવતો રીઅ.”

¹³ ઇસુ ખ્રિસ્ત આપુ શ્રાપુલે લીને ક્રુસુપે મોય ગીયો, આને આપુહુ મુસા નિયમુકી આવનારા શ્રાપુકી છોડાવી લેદા, કાહાકા પવિત્રશાસ્ત્રમે લેખલો હાય કા, “જો કેડો ક્રુસુપે લટકુલો હાય તોઅ શાપિત હાય.”

¹⁴ ઇસુ ખ્રિસ્તુ એહેકી ઈયા ખાતુરે કેયો કા, તીયા મારફતે અન્યજાતિ લોકુહુને બી તોઅ આશીર્વાદ મીલે, જો આશીર્વાદ વાયદા અનુસાર ઇબ્રાહીમુલે મીલ્લો. આને ખ્રિસ્તુપે વિશ્વાસ કેરુલોકી પવિત્રઆત્મા મીલવી જીયુલે પરમેહેરુહુ આપનેહે આપુલો વાયદો કેલો.

મુસા નિયમ આને વાચા

¹⁵ ઓ વિશ્વાસી પાવુહુ, આંય વેહવારિક દાખલો આપુહુ, એગા બેન માંહે વોચ્ચે વસિયત નામુ વેયો આને તીયાપે સહી રેહે, તા કેડો તીયુલે બદલી નાગ સેકતો આને નાય તીયામે કાંવીહી જોડી નેતા ઓછો કી સેકેહે.

¹⁶ પરમેહેરુહુ ઇબ્રાહીમુ આરી વાયદો કેલો કા, “તોઅ પીઢી એક માંહા મારફતે બાદા લોક આશીર્વાદ પામી,” પરમેહેરુહુ ઇ નાહ આખ્યો કા તોઅ પીઢી ખુબુજ લોકુ મારફતે પેન તોઅ પીઢી એક માંહા મારફતે આને તોઅ ખ્રિસ્ત હાય.

¹⁷ આંય તુમનેહે આખા માગુહુ કા જે વાચા પરમેહેરુહુ ઇબ્રાહીમુ આરી કેલી, તીયાલે મોયને ચારસો તીસ વોર્ષા બાદ આપવામે આલો મુસા નિયમ, તીયુ વાયદાલે બદલી નાહ સેકતા આને નાહ તોળી સેકતા.

¹⁸ કાહાકા કાદાચ મુસા નિયમુ પાલન કેરા લીદે આશીર્વાદ મીલેહે, તા ફાચે તોઅ આશીર્વાદ વાયદા કારણ હાય આમનેહે નાય મિલતા, પેન પરમેહેરુહુ ઇબ્રાહીમુ વાયદા મારફતે કૃપા આપીહી.

¹⁹ ફાચે મુસા નિયમ કાહા આપ્યો? મુસા નિયમ તા લોક જો કેતાહા તોઅ પાપ હાય, ઇ આખા ખાતુરે વાયદા બાદમે આપ્યો. મુસા નિયમ તાંવ લોગુ નાય આથો જાંવ લોગુ ઇબ્રાહીમુ પીઢીમેને તોઅ માંહુ નાય આલો, જીયા વિશે પરમેહેરુહુ વાયદો કેલો. આને તોઅ નિયમુ હોરગાદુતુ મારફતે પરમેહેરુહુ મુસાલે આપ્યો, જો પરમેહેરુ લોકુ વોચ્ચે મેલ-મિલાપ આથો.

²⁰ કાદાચ બેન લોકુ વોચ્ચે વાયદો કેતાહા, તા મધ્યસ્થી જરુરત રેહે પેન પરમેહેર જો એકુજ હાય, તીયાહા મેલ-મિલાપુ વગર ઇબ્રાહીમુ આરી વાયદો કેયો.

નિયમુ ઉદેશ્ય

²¹ ઈયા મતલબ ઓ નાહ કા મુસા નિયમ પરમેહેરુ વાયદા વિરુધુમે હાય. કાહાકા કાદાચ નિયમ લોકુહુને પરમેહેરુ નજરીમે ધર્મી બોનાવી સેકે, તા મુસા નિયમુ પાલન કીને અનંત જીવન મિલવા સેક્તેલે.

²² પેન પવિત્રશાસ્ત્ર આખેહે, “ઈયા જગતુમે બાદા લોક પાપુ ગુલામીમે હાય,” કા જો વાયદો પરમેહેરુહુ કેલો, તોઅ ઇસુ ખ્રિસ્તુપે વિશ્વાસ લીદે મીલેહે.

²³ પેન ઇસુ ખ્રિસ્ત આલો આને આપુહુ બાદે તીયાપે વિશ્વાસ કેજી, તીયા પેલ્લા આપનેહે મુસા નિયમુ આધિનુમે રાખલા, આને મુસા નિયમુહુ આપુ રાખવાલી કેતલો.

²⁴ આને મુસા નિયમ આપનેહે માગદર્શન કેરા ખાતુરે આપુ દેખભાલ કેરા માટે આપલો, કા આપુહુ ખ્રિસ્તુપે વિશ્વાસ કીને પરમેહેરુ નજરીમે ધર્મી ઠેરજી.

²⁵ પેન આમી ઇસુ ખ્રિસ્ત આવી ચુક્યોહો આને આપુહુ તીયાપે વિશ્વાસ કી સેક્તેહે, ઈયા ખાતુરે આમી મુસા નિયમુલે આપુ આગેવાની કેરુલો જરુર નાહ.

²⁶ કાહાકા તુમુહુ બાદા જોતાહા બી બાપ્તીસ્મો લેદોહો, ઇસુ ખ્રિસ્તુપે તુમુહુ વિશ્વાસ કેયોહો, પરમેહેરુ પોયરો-પોયરી હાય.

²⁷ આને તુમુહુ બાદાહા જોતાહા બી બાપ્તીસ્મો લેદોહો ઇસુ ખ્રિસ્તુમે જોળાય ગીયેહે, આને જીયુ રીતીકી એક માંહુ નોવે પોતળે પોવેહે તેહેકીજ તુમુહુ બી નવો જીવન પોવી લેદોહો.

²⁸ આમી તુમામેને એગો ભેદભાવ નાહ રીયો, નાય યહુદી, નાય અન્યજાતિ, નાય એગોહો ગુલામ, નાય સ્વતંત્ર, નાય આદમી, નાય બાય, કાહાકા તુમુહુ બાદા ઇસુ ખ્રિસ્તુમે એક હાય.

²⁹ આને કાદાચ તુમુહુ ઇસુ ખ્રિસ્તુ પોયરી-પોયરો હાય તા ઇબ્રાહીમુ પીઢી આને વાયદા અનુસાર વારીસદાર બી હાય.