એફેસીઓ પત્રો 6 - દુબલી નવો કરાર

યાહકી-બાહકો આને પોયરે

¹ ઓ પોયરાંહા, જે તુમુહુ પ્રભુમે વિશ્વાસ કેતાહા, પોતા યાહકી-બાહકા આજ્ઞા પાલન કેરા, કાહાકા તુમનેહે ઇ કેરા હારો હાય.

² જેહેકી પવિત્રશાસ્ત્રમે લેખલો હાય, “પોતા યાહકી-બાહકા આદર કેરા, એ પેલ્લી એહેડી આજ્ઞા હાય જીયા આરી એક વાયદો બી જોળાલો હાય.”

³ કા તોઅ ભલો વેઅ, આને તુ તોરતીપે સુખી રેઅ, આને તોઅ ઉંમર લાંબી વેરી.

⁴ આને ઓ પોયરાં વાલાહા પોયરાહાને રીસ માઅ ચોળવાહા, પેન પ્રભુ શિક્ષા આને ચેતવણી આપતા જાયને, તીયાં હારો પાલન પોષણ કેરા.

માલિક આને ગુલામ માંહુ

⁵ ઓ ગુલામ લોકુહુ જેહેકી તુમુહુ ખ્રિસ્તુ આજ્ઞા માનતાહા, તેહેકીજ જે લોક ઈયા જગતુમે તુમા માલિક હા, તીયા આદર રાખીને તીયાં આજ્ઞા માના.

⁶ આને તુમુહુ દેખાવા ખાતુરે કા લોકુહુને ખુશ કેરા માટે સેવા માઅ કીહા. પેન ખ્રિસ્તુ ગુલામુ હોચે મનુમે પરમેહેરુ ઈચ્છા પુરી કેરા.

⁷ આને તીયુ સેવાલે લોકુહુને નાય, પેન પ્રભુ સેવા હોમજીને પોતા ખુશીકી કેરા.

⁸ કાહાકા તુમુહુ જાંતાહા, કા જો કેડો જેહેકી હારે કામે કેરી, કાદાચ ગુલામ વેરી, કા સ્વતંત્ર માંહુ વેરી, પ્રભુહીને તેહેડોજ ઇનામ મીલવી.

⁹ ઓ માલિકુહુ, તુમુહુ બી ધમકિયા માઅ આપાહા, તીયા આરી હારો વેહવાર કેરા. કાહાકા તુમુહુ જાંતાહા, કા તીયાં આને તુમા માલિક હોરગામે હાય, આને બેનુ એક આરી એક સમાન વેહવાર કેતાહા.

આત્મિક લડાયુ આથ્યાર

¹⁰ છેલ્લે આંય માઅ મેરાલાહા, પ્રભુ સંગતીમે આને તીયા સામર્થ્યમે મજબુત બોના.

¹¹ આને શૈતાનુ ખારાબ યુક્તિ હુંબુર મજબુત રાંઅ ખાતુરે, પરમેહેરુ બાદા આથ્યાર લીને તીયાર રેજા.

¹² કાહાકા આપુ એ મોડી આત્મિક લડાય લોકુ આરી નાહ, પેન વડીલુ આરી, આને અધિકારી આરી, આને ઈયા જગતુ અંધકારુ હાકીમુ આરી આને તીયા દુષ્ટતા આત્મિક સેના આરી હાય જે આકાશુમે હાય.

¹³ ઈયા ખાતુરે પરમેહેરુ બાદા આથ્યાર લીને રેજા, કા જાંહા ખારાબ દિહ આવે, તાંહા તુમુહુ દુશ્મનુ હુમલા વિરુધ લડી સેકા, આને લડાય પુરી કીને સ્થિર રેજા.

¹⁴ આને પરમેહેરુ સત્યલે પોટ્ટા હોચે પોવીને, આને લડાયુમે છાતી ઉપે પોવુલો ઢાંલુ હોચે ધાર્મિકતાલે પોવીને,

¹⁵ પરમેહેરુ શાંતિ હારી સુવાર્તા ઉનાવા ખાતુરે તીયાર રેજા, જેહેકી એક સૈનિક લડાયુ માટે પાગુમે બુટે પોવીને તીયાર રેહે.

¹⁶ આને ઈયા બાદા આરી વિશ્વાસુમે સ્થિર રેજા. જો શૈતાનુ મારફતે મારવામે આલ્લા બોલતા તીરુહુને રોકા ખાતુરે એક ઢાલુ સમાન કામ લાગેહે.

¹⁷ આને ઉદ્ધાર હેલ્મેટ, આને આત્મિક તલવાર, જો પરમેહેરુ વચન હાય, લી લ્યા.

¹⁸ ઇ બાદો પ્રાર્થના આરી કેરા, આને પરમેહેરુ મદદ માગા, આને જેહેકી પવિત્રઆત્મા અગવાય કે તેહેકીજ સાદા પ્રાર્થના કેરા, આને આત્મિક જીવનુમે જાગતા રેજા આને બાદા પરમેહેરુ લોકુ માટે સાદા લગાતાર વિનંતી કેતા રેજા.

¹⁹ આને માઅ માટે બી પ્રાર્થના કેજા કા જાંહા માને પરમેહેરુ વચન ગોગા ખાતુરે સમય રેઅ, તાંહા તોઅ માને એહેડો વચન આપે, કા આંય હિંમતુકી હારી સુવાર્તા ભેદ આખી સેકુ.

²⁰ કાહાકા આંય આમી જેલુમે હાકલી આરી જોકળાલો હાય તેબી હારી સુવાર્તા રાજદુત હાય. માને જીયુ રીતીકી ગોગા જોજે, તીયુ રીતીકી હિંમતુકી ગોગી સેકુ એહેડી પ્રાર્થના કેજા.

છેલ્લો નમસ્કાર

²¹ આપુ મેરાલો વિશ્વાસી પાવુહુ તુખિકસ, આને જો પ્રભુમે વિશ્વાસ યોગ્યો સેવક હાય, તુમનેહે માઅ વિશે બાધ્યા ગોઠયા કાહી. કા તુમુહુ બી જાંય સેકા કા આંય કેહેકી રીહુ.

²² માયુહુ તીયાલે તુમા પાહી ઈયા ખાતુરે મોક્લ્યોહો, કા તુમુહુ આમાં દશા જાંય સેકા. આને તોઅ તુમનેહે પ્રોત્સાહાન આપી સેકે.

²³ પરમેહેર પિતા આને પ્રભુ ઇસુ ખ્રિસ્તુ વેલેને બાદા વિશ્વાસી પાવુ-બોયુહુને શાંતિ આને વિશ્વાસુ આરી પ્રેમ મિલે.

²⁴ પરમેહેરુ કૃપા તીયા બાંદાપે વેઅ, જે આપુ પ્રભુ ઇસુ ખ્રિસ્તુ આરી હાચો પ્રેમ રાખેહે, આમીન.