એફેસીઓ પત્રો 3 - દુબલી નવો કરાર

અન્યજાતિ લોકુમે પાઉલુ મારફતે સેવા

¹ ઈયા ખાતુરે આંય પાઉલ અન્યજાતિ લોકુમે ઇસુ ખ્રિસ્તુ કામુલે કેરુલોકી જેલુમે બંદી હાય.

² જરુર તુમુહુ ઉનાયા વેરી કા પરમેહેરુહુ માને હારી સુવાર્તા પ્રચાર કેરા જવાબદારી તીયા કૃપાકી આપીહી.

³ એટલે પરમેહેરુ રહસ્ય જો ખુબુજ સમય પેલ્લા કેડાલે બી માલુમે નાય આથો, તીયાહા માને તીયા ગુપ્ત યોજનાલે જાહેર પ્રગટ કેયી, જીયા વિશે માયુહુ પેલ્લાજ ટુકુમે લેખ્યોહો.

⁴ જીયાકી પત્રમે લેખલી ગોઠીહીને તુમુહુ વાંચીને હોમજી સેકતાહા, કા જીયાલે કેડોજ નાહ જાંતો તીયા ખ્રિસ્તુ યોજના વિશે આંય કોતો જાંહુ.

⁵ ફાચલી પીઢી લોકુહુનને ઈયુ યોજનાલે જાહેર નાહ કેરામે આલી, પેન આમી તીયાહા પવિત્રઆત્મા મારફતે પવિત્ર ચેલો આને ભવિષ્યવક્તામે પ્રગટ કેયોહો.

⁶ પરમેહેરુ યોજના એ હાય, કા ખ્રિસ્ત ઇસુમે હારી સુવાર્તા મારફતે અન્યજાતિ લોકુ વિરાસતુમે ભાગીદાર, આને એકુજ શરીરુ ભાગ આને પરમેહેરુ કેલા વાયદામે ભાગીદાર વેરી.

⁷ પરમેહેરુ કૃપાકી તીયા ચમત્કારી કામે કેરા અનુસાર, જો માને આપવામે આલી, તીયુ હારી સુવાર્તા આંય સેવક બોન્યો.

⁸ આંય જો પરમેહેરુ પસંદ કેલા લોકુમે બાદા કેતા હાનો હાય, તેબી માપે ખ્રિસ્તુ કૃપા વીયો કા આંય અન્યજાતિ લોકુહુને અપાર આશિષુ હારી સુવાર્તા ઉનાવુ.

⁹ આને બાદા લોકુમેને તીયુ ગોઠી રહસ્ય પ્રગટ કીવ્યુ, કા તીયા ભેદુ ઈરાદો કાય હાય, જીયુ ગોઠી રહસ્ય બાદાહાને બોનાવનારા પરમેહેરુ જગત બોનાવા શુરુવાતુમે જાહેર નાહ કેયો.

¹⁰ એટલે આમી મંડળી બાદા લોકુ મારફતે, પરમેહેરુ અલગ-અલગ પ્રકારુ જ્ઞાન, આકાશુમે રાજ્ય કેનારો આત્મિક જાનવર આને અધિકારીપે જાહેર કેયોહો.

¹¹ પરમેહેર અનંત ઇરાદા અનુસાર, આપુ પ્રભુ ઇસુ ખ્રિસ્તુ મારફતે પુરો કેરી.

¹² જીયાકી આપનેહે વિશ્વાસ કેરુલોમે હિંમત આને ભોરોષાકી પરમેહેરુ સંગતી કેરામે અધિકાર મીલ્યોહો.

¹³ ઈયા ખાતુરે આંય વિનંતી કીહુ કા જે તકલીફ તુમા લીદે માને વી રીયીહી, તીયા લીદે હિંમત માઅ હારાહા, કાહાકા ઇ બાદો તુમા ફાયદા માટેજ વી રીયોહો.

ઇસુ ખ્રિસ્તુ પ્રેમ

^14-15 ઇયાજ કારણુકી, આંય જીયા નામુકી હોરગા આને તોરતી દરેક પરિવારુ નામ રાખવામે આવેહે, તીયા પરમેહેરુ હુંબુર ઘુટણે પોળીને પ્રાર્થના કીહુ.

¹⁶ કા તોઅ પોતા મહિમા ધનુંમેને તુમનેહે ઇ વરદાન આપે, કા તીયા આત્મા તુમનેહે તોઅ સામર્થ્ય આપે કા તુમુહુ આત્મામે મજબુત રી સેકા.

¹⁷ આને વિશ્વાસુ મારફતે તુમા રદયુમે ખ્રિસ્ત રીઅ સેકે, કા તુમુહુ પ્રેમુમે મજબુત આને સ્થિર રીને,

¹⁸ આને પરમેહેરુ બાદા લોકુ આરી ઇ હોમજા સામર્થ્ય મિલવા, કા તીયા પ્રેમ પોહળાય, આને લંબાઇ, આને ઉચાઇ આને ઉંડાઈ કોતી હાય.

¹⁹ આંય પ્રાર્થના કીહુ કા તુમુહુ ખ્રિસ્તુ પ્રેમુલે જાંય સેકા જો આપુ હોમજુ બારે હાય, કા પરમેહેરુ બાદી ભરપુરીકી તુમુહુ પરિપુર્ણ વેરા.

²⁰ આમી પરમેહેરુ એહેડો સામર્થ્ય હાય, કા આપુ માગુલો કા વિચાર કેરુલો વાદારે કામ કી સેકેહે, તીયા સામર્થ્ય અનુસાર જો આપુમે કામ કેહે.

²¹ તીયા મહિમા મંડળીમે આને ઇસુ ખ્રિસ્તુમે પીઢી-પીઢીહીને યુગા-યુગ વેતી રેઅ, આમીન.