કલોસ્સીઓ પત્રો 4 - દુબલી નવો કરાર

¹ ઓ માલિકુહુ, પોતા ચાકરુ આરી ન્યાય આને એક સમાન વેહવાર કેરા, ઇ હોમજીને કા હોરગામે તુમા બી એક માલિક હાય.

થોડીક વેહવારિક સલાહ

² ધન્યવાદુ આરી જાગૃત વીને દરેક સમય પ્રાર્થના મેં લાગલા રેજા.

³ આને તીયા આરી-આરીજ આમા માટે બો પ્રાર્થના કેતા રેજા, કા પરમેહેર આમા ખાતુરે વચન પ્રચાર કેરા એહેડો મોકો આપે, કા આમુહુ ખ્રિસ્તુ તીયા ભેદુલે જાહેર કી સેકે, જીયા ખાતુરે આંય આમી જેલુમે હાય.

⁴ આને પ્રાર્થના કેરા કા આંય ખ્રિસ્તુ ભેદુલે હારકી આને ખુલ્લી રીતીકી પ્રચાર કી સેકુ.

⁵ જો પ્રભુ ઇસુ ખ્રિસ્તુપે વિશ્વાસ નાહ કેતે તીયા આરી ગોઠયા કેરા ખાતુરે મીલનારા દરેક મોકાલે હારકી કામુમે લાવા, આને તીયાં આરી બુદ્ધિકી વેહવાર કે.

⁶ તીયાં આરી સાદા નમ્રતા આરી ગોઠયા કેરા, આને એહેડયા ગોઠયા આખા જે મનુલે ફાવે એહેડયા વેઅ, કા તુમનેહે દરેક માંહાલે હારકી જવાબ દેતા આવળી જાય.

છેલ્લો નમસ્કાર

⁷ મેરાલા વિશ્વાસી પાવુ આને વિશ્વાસ યોગ્યો સેવક, તુખિકસ જો પ્રભુમે માઅ આરી કામ કેનારો હાય, માઅ બાધ્યા ગોઠયા તુમનેહે આખી દી.

⁸ તીયાલે માયુહુ ઈયા ખાતુરે તુમા પાહી મોક્લ્યોહો, કા તુમનેહે ખબર પોળી જાય કા આમા દશા કેહેડી હાય, આને તોઅ તુમનેહે વિશ્વાસુમે મજબુત કેરી.

⁹ તીયા આરી ઓનેસિમસુલે બી મોક્લ્યોહો, જો વિશ્વાસ યોગ્યો આને મેરાલો વિશ્વાસી પાવુહુ હાય, આને તોઅ તુમા શહેરુમેને હાય, ઓ તુમનેહે ઇહીને બાધ્યા ગોઠયા આખી દી.

¹⁰ અરીસ્તાખર્સ જો માઅ આરી જેલુમે હાય, આને માર્ક જો બર્નાબાસુ પાવુહુ લાગેહે, આંય જાંહુ કા તુમનેહે પેલ્લા માર્કું વિશે આખવામે આલોહો, કાદાચ તોઅ તુમા પાહી આવે તા તીયા આરી હારકી વેહવાર કેરુલો.

¹¹ આને ઇસુ, જીયાલે લોક યુસ્તુસ આખતેહે તુમનેહે નમસ્કાર આખેહે કાહાકા યહુદી વિશ્વાસી લોકુમેને સુન્નત કેરાવલા ખાલી એ તીન આદમીજ પરમેહેરુ રાજ્યા ખાતુરે માઅ આરી કામ કી રીયાહા, આને ઇયાહા માને ખુબુજ ઉત્સાહ આપ્યોહો.

¹² એપાફ્રાસ, જો તુમા શેહેરુમેને હાય આને ખ્રિસ્ત ઇસુ સેવક હાય, તુમનેહે નમસ્કાર આખેહે, આને તોઅ સાદા તુમા માટે રદયુકી પ્રાર્થના કેહે, કા તુમુહુ પુરી રીતીકી પુરા વિશ્વાસુ આરી પરમેહેરુ ઈચ્છાપે સ્થિર રે.

¹³ આંય તીયા સાક્ષી હાય, કા તોઅ તુમા ખાતુરે લાઓદોકિયા શેહેરુ આને હિયરાપોલીસ શેહેરુ લોકુ માટે મોડા રદયુકી પ્રાર્થના કેહે.

¹⁴ મેરાલો વૈદ લુક આને દેમાસ તુમનેહે નમસ્કાર કેહે.

¹⁵ લાઓદોકિયા શેહેરુ વિશ્વાસી પાવુહુ આને બોયુહુને આને નુમ્ફા આને તીયા કોઅ મંડળીલે નમસ્કાર આખજા.

¹⁶ જાંહા ઓ પત્ર તુમાહી વાચી લેવામે આવે, તાંહા એહેકી કેજા કા લાઓદોકિયા શેહેરુ મંડળીમે બી વાંચવામે આવે, આને તોઅ જો લોઓદોકિયા શેહેરુ મંડળીમેને આવે, તીયાલે તુમુહુ બી વાચજા.

¹⁷ આર્ખિપસુલે આખજા જો સેવા પ્રભુમે આપવામે આલ્લી હાય, તીયુલે સાવધાની કી પુરી કેજે.

¹⁸ આંય પાઉલ પોતાજ આથુકી ઇયામે પત્ર નમસ્કાર લેખી રીયોહો, યાદ રાખા આંય જેલુમે હાય આને માઅ ખાતુરે પ્રાર્થના કેરા, તુમાપે પરમેહેરુ કૃપા વેતી રે આમીન.