કલોસ્સીઓ પત્રો 3 - દુબલી નવો કરાર

¹ જેહેકી પરમેહેરુહુ ખ્રિસ્તુલે મોલામેને ફાચે જીવતો કેયો, તેહેકીજ તુમુહુ બી ખ્રિસ્તુ આરી જીવતા કેરામે આલા, તા તીયા ઈચ્છાલે પુરી કેરા જો પરમેહેરુહુ તુમા ખાતુરે હોરગામે થોવ્યોહો, જીહી ખ્રિસ્ત બોઠલો હાય. આને પરમેહેરુ હુદીવેલ બોઠલો હાય.

² તોરતી પેન નાહ પેન હોરગામેને વસ્તુપે ધાય્ન લાગવો.

³ કાહાકા તુમુહુ પોતા પાપી સ્વભાવુ ખાતુરે મોય ગીયાહા આને તુમા જીવન ખ્રિસ્તુ આરી પરમેહેરુ દોબાવી રાખ્યોહો.

⁴ ખ્રિસ્ત જો તુમનેહે નવો જીવન દેહે, જાંહા તોઅ ઈયુ તોરતીપે ફાચો આવી તાંહા તુમુહુ બી તીયા આરી આવાહા આને તીયા મહિમામે ભાગીદાર વેરાહા.

જુનો જીવન આને નવો જીવન

⁵ ઈયા ખાતુરે તીયા ખારાબ કામુહુને કેરા બંદ કી ધ્યા, જે તુમા પાપી સ્વભાવુ આરી જોળાલે હાય, એટલે વ્યેભિચાર, અશુદ્ધતા, ખારાબ વિચાર, ખારાબ લાલચ, આને લાલચી માઅ બોનાહા, ઇ મુર્તિ પુજા બરાબર હાય.

⁶ કાહાકા એહેડે ખારાબ કામ કેતેહે, ઈયા ખાતુરે પરમેહેર તીયાહાને કડક સજા દેહે.

⁷ આને એક સમયુલે તુમુહુ બી ઇયાજ ખારાબ કામુ અનુસાર જીવતલા તા ઇયાજ અનુસાર તુમુહુ ઇંજ કામ કેતલા.

⁸ પેન આમી તુમુહુ ઇયાહાને, એટલે ક્રોધ, ગુસ્સા, દુશ્મની, નિંદા આને બીજાહાને મુયુંકી ગાય દેવુલો છોડી દાંઅ જો.

⁹ એકબીજા આરી ઝુટો માઅ ગોગાહા, કાહાકા તુમુહુ પોતા જુનો પાપી સ્વભાવ આને બાદે ખારાબ કામે છોડી દેદેહે.

¹⁰ આને આમી તુમુહુ એક નવે માંહે બની ગીયેહે, ઈયા ખાતુરે ઓ નવો સ્વભાવ આને વાદારે-વાદારે પોતા બોનાવનારા હોચે નવો બનતો જાહે કા તીયાલે હારકી હોમજી સેકે.

¹¹ ઈયા લીદે નાય તા ગ્રીક રીયો, નાય યહુદી, નાય સુન્નત, નાય સુન્નત વગર્યો, નાય એક વિદેશી, નાય એક જંગલી, નાય દાસ, નાય સ્વતંત્ર ઈયા બાદા વોચ્ચે કેલ્લોજ અંતર નાય રીયો પેન ખ્રિસ્ત બાદોજ હાય આને બાદાજ લોકુમે રેહે.

¹² ઈયા ખાતુર જાંહા પરમેહેરુ તુમનેહે પવિત્ર વેરા ખાતુરે પંસદ કેયાહા આને તુમનેહે પ્રેમ કેહે, તાંહા મોડી કરુણા, આને ભલાય, ગરીબાય, નમ્રતા, આને સહનસીલતા ધારણ કેરા.

¹³ કાદાચ કેડાલે કેડાપે બી દોષ લાગવા કારણ વેઅ, તા એક-બીજા વેઠીલ્યા આને એકબીજા અપરાધ માફ કેરા: જેહેકી પ્રભુહુ તુમા ગુનાહ હાને માફ કેયા તેહેકીજ તુમુહુ બી કેરા.

¹⁴ ઈયા બાદા ઉપે બાદા કેતા જરુરી કામ જો તુમનેહે કેરા જોજે, તોઅ ઇ હાય કા એકબીજાલે પ્રેમ કેરા, એહેકી કીને તુમુહુ પુરી રીતીકી એક મનુ વી જાહા.

¹⁵ તે શાંતિ જે પ્રભુ ખ્રિસ્ત આપેહે તીયુલે તુમા રદયુમે રાજ કેરા ધ્યા, કાહાકા તુમુહુ બાદે એકુજ શરીરુ અંગ હાય આને ઈયા ખાતુરે એકબીજા આરી શાંતિકી રાં ખાતુરે હાદવામે આલાહા આને તુમુહુ ધન્યવાદ આપનારા બોની રેજા.

¹⁶ દરેક સમય ખ્રિસ્તુ સંદેશુ વિશે વિચારતા રેજા, આને પુરા જ્ઞાનુ આરી એકબીજાલે હિક્વા આને ચેતવણી ધ્યા. આને પોત પોતા મનુંમે ધન્યવાદુ આરી પરમેહેરુ આરી પરમેહેરુ ભજન આને સ્તુતિ ગીતે આને આત્મિક ગીતે આખા.

¹⁷ જો કાય તુમુહુ આખાહા કા કામ કેતાહા, આખો પ્રભુ ઇસુ ખ્રિસ્તુ નાવુકી કેરા આને તીયા મારફતે પરમેહેર પિતા ધન્યવાદ કેરા.

નવા જીવનુ પરિવારુ માટે નિયમ

¹⁸ ઓ કોઅવાલીહી, તુમુહુ પોત-પોતા કોઅવાલા આધિનુમે રેજા, કાહાકા પ્રભુ લોકુહુને એહકી કેરુલો હારો હાય.

¹⁹ ઓ કોઅવાલાહા, પોત-પોતા કોઅવાલા આરી પ્રેમ રાખા આને તીયા આરી નમ્રતાકી રેજા.

²⁰ ઓ પોયરાંહા, જો કાય બી તુમા યાહકી-બાહકો તુમનેહે કેરા આખે, તીયાલે કેરા કાહાકા પ્રભુ ઇયાકી ખુશ વેહે.

²¹ તુમુહુ જે બાહકા હાય પોત-પોતા પોયરાહાને પરેશાન નાય કે, એહેકી નાય વેઅ કા તે નિરાશ વી જાય.

²² ઓ ચાકરુહુ, જો ઈયા જગતુમે તુમા માલિક હાય, બાદી ગોઠીમે તીયાં આજ્ઞા પાલન કેરા, માહાલે ખુશ કેનારા લોકુ સમાન દેખાયા ખાતુર નાય, પેન હાચાયુકી આને પ્રભુ બીખુ કી.

²³ જો કાય તુમુહુ કેતાહા પુરા મનુકી કેરા, ઇ હોમજીને કા માહા ખાતુરે નાહ પેન પ્રભુ ખાતુરે કેતાહા.

²⁴ કાહાકા તુમુહુ જાંતાહા કા પ્રભુ ઈયા બદલામે ઇનામ આપી, આને તીયા આશીર્વાદુ મેને તુમા હીચો આપી, જો તીયાહા પોતા લોકુ ખાતુરે તીયાર કેયોહો. ઈયા ખાતુર તુમુહુ પ્રભુ ખ્રિસ્તુ સેવા કેતાહા.

²⁵ કાહાકા જો ખારાબ કેહે, તીયા ખોટાયુ બદલે પરમેહેર તીયાલે દંડ દી, કાહાકા પરમેહેર કેડાજ પક્ષપાત નાય કેરી.