કલોસ્સીઓ પત્રો 1 - દુબલી નવો કરાર

ધન્યવાદ

¹ આંય પાઉલ, ઓ પત્ર લેખી રીયોહો, આંય પરમેહેરુ ઈચ્છાકી ખ્રિસ્ત ઇસુ પસંદ કેલો ચેલો હાય, આને ભાઈ તિમોથી વેલેને,

² ખ્રિસ્તુમે તીયા પવિત્ર આને હાચા વિશ્વાસી પાવુહુ નામ જે કલોસ્સી શેહેરુમે રેતેહે, આપુ પિતા પરમેહેરુ વેલેને તુમનેહે કૃપા આને શાંતિ મિલતી રેઅ.

ધન્યવાદુ પ્રાર્થના

³ જાંહા આમુહુ તુમા ખાતુરે સાદા પ્રાર્થના કેતેહે, તાંહા આમુહુ પોતા પ્રભુ ઇસુ ખ્રિસ્તુ પિતા એટલે પરમેહેરુ ધન્યવાદ કેતાહા.

⁴ કાહાકા આમુહુ ઉનાયાહા કા ખ્રિસ્ત ઇસુપે તુમા વિશ્વાસ હાય, આને બાદા પવિત્ર લોકુહુને તુમુહુ પ્રેમ કેતાહા.

⁵ તુમુહુ એહેકી તીયુ આશા લીદે કેતાહા જો તુમા ખાતુરે હોરગામે થોવલી હાય, જીયા વિશે તુમુહુ પેલ્લાનેજ ઉનાય ચુક્યાહા, કા જાંહા લોકુ મારફતે ઇસુ ખ્રિસ્તુ વિશે તુમુહુ સુવાર્તા ઉનાલા, જો પરમેહેરુ હાચો સંદેશ હાય.

⁶ જેહેકી એ સુવાર્તા આખા જગતુમે ફેલાય રીયીહી, આને ખુબુજ લોક વિશ્વાસી બોની રીયાહા, તેહેકીજ તુમા વોચ્ચે વેતો આલોહો, જાંહાને તુમુહુ તીયાલે ઉનાયા આને તીયા હાચા સંદેશુલે પુરી રીતીકી હોમજી ગીયા કા પરમેહેર કેતો કૃપાવાલો હાય.

⁷ તેજ શિક્ષા તુમુહુ આમા આરી કામ કેનારા એપાફ્રાસુપેને મીલવીહી, જો આમા ખાતુરે ખ્રિસ્તુ વિશ્વાસ યોગ્યો સેવક હાય.

⁸ ઓ તોજ હાય જીયાહા આમનેહે તીયા પ્રેમુ વિશે બી આખ્યો, જે પવિત્રઆત્માહા તુમનેહે બીજા લોકુ ખાતુરે આપ્યોહો.

⁹ ઈયા ખાતુરે જીયા દિહુલે ઇ ઉનાયોહો, આમુહુ બી તુમા ખાતુરે સાદા પ્રાર્થના આને વિનંતી કેરા નાહ છોડતા, કા પરમેહેરુ આત્મા તુમનેહે જ્ઞાન હોમુજ દેઅ, કા તુમુહુ તીયા ઈચ્છાલે પુરી રીતે હોમજી સેકા.

¹⁰ કા તુમુહુ એહેડો જીવન જીવા જેહેકી પ્રભુ ઈચ્છેહે, આને તુમુહુ દરેક રીતીકી પ્રભુલે પ્રસન્ન કેરા, આને તુમુહુ દરેક પ્રકારુ હારે કામે કેરા, આને તુમુહુ પરમેહેરુ જાંણા માટે હમેશા વાદતા જા.

¹¹ આંય પ્રાર્થના કીહુ કા પરમેહેર પોતા મહિમા સામર્થ મારફતે તુમનેહે વાદારે મજબુત બાનાવે, કા તુમુહુ ધીરજ આને આનંદુકી પોતા દુ:ખુહુને સહન કી સેકા.

¹² આને પિતા પરમેહેરુ ધન્યવાદ કેતા રેજા, જીયાહા તુમનેહે તીયા વારીસદારુ લાયક બોનાવ્યોહા જો તીયાહા પવિત્ર લોકુ ખાતુરે હોરગા રાજ્યામે તીયાર કેયોહો.

¹³ કાહાકા તીયાહાજ આમનેહે આંદારા રાજ્યમેને છોડાવીને પોતા પરમેહેરુ રાજ્યામે પ્રવેશ કેરાવ્યો,

¹⁴ આને જીયા બલિદાનુ મારફતે પરમેહેરુહુ આમનેહે છુટકારો એટલે પાપુ માફી આપીહી.

ખ્રિસ્તુ મહાન કામે

¹⁵ કેડો બી પરમેહેરુલે નાહ હી સેકતો, પેન જાંહા તીયા પોયરો એક માંહુ બન્યો તા તીયાહા લોકુ હુંબુર પરમેહેરુલે પ્રગટ કી દેદો, આને કેલ્લી બી વસ્તુલે બનાવા પેલ્લા તોઅ આથો, આને તોજ આખી તોરતી બાદો અધિકાર હાય.

¹⁶ કાહાકા ઓ તોજ આથો, જીયાહા પરમેહેરુ આરી મીલીને બાદોજ બોનાવ્યોહો, હોરગા વેઅ કા તોરતી, હેઅલી કા નાય દેખલી, કાય સિંહાસન, કાય પ્રભુતા, કાય પ્રધાનતા, કાય અધિકાર, બાદોજ તીયા મારફતે આને તીયાજ માટે બોનાવામે આલોહો.

¹⁷ આને કાય બી બોનાવા પેલ્લા ખ્રિસ્ત તીહી હાજર આથો, આને બાદી વસ્તુ તીયામુજ એક આરી કામ કેહે.

¹⁸ ઓ તોજ હાય જો મંડળીલે ચાલવેહે, જો કા તીયા શરીર હાય; તોજ આદિ હાય, આને મોતુમેને ફાચે જીવી ઉઠનારા લોકુમે પેલ્લો હાય, કી બાદી ગોઠીમે તોજ પ્રધાન વેઅ.

¹⁹ કાહાકા પિતા પરમેહેરુ પ્રસન્નતા તીયામુજ હાય, કા પરમેહેરુ આખો સ્વભાવ ખ્રિસ્તુમે રેઅ.

²⁰ પરમેહેરુહુ પોતા પોયરાલે બલિદાન કેરુલો નિર્ણય કેયો, જીયાહા ક્રુસુપે પોતા રોગુત વેવડાવ્યો આને મોય ગીયો, પરમેહેરુહુ પોતા આને બાદા વોચ્ચે મધ્યસ્થી બોનાવા ખાતુર કેયો. ઈયુ રીતીકી તીયાહા પોતા આને બાદા વોચ્ચે મેલ-મિલાપ કેરાવ્યો, કાદાચ જો હોરગામે વેઅ કા જો તોરતીપે વેઅ.

²¹ તુમુહુ જે પરમેહેરુકી દુર આથા ખારાબ કામુકી લીદે મનુકી દુશ્મન આથા,

²² પેન પરમેહેરુ પોતા પોયરાલે માંહુ બોનાવીને આને તીયા ક્રુસુપે મોરુલો મારફતે તુમા બી મેલ-મિલાપ કેરાવી લેદો, કા તુમનેહે પોતા આગલા પવિત્ર આને કલંક વોગર્યા, નિર્દોષ બોનાવીને હાજર કે.

²³ પેન તુમા વિશ્વાસ ખ્રિસ્તુપે એક પાયા સમાન મજબુત આને પાક્કો વેરા જોજે, આને તે આશા જે સુવાર્તાપે વિશ્વાસ કેરા લીદે આમાપે હાય તીયુલે માઅ છોડાહા, જીયા પ્રચાર આખાં જુગુમે બાદા લોકુહુને કેરામે આલો, આને જીયુ સુવાર્તા જાહેર કેરા ખાતુરે આંય, પાઉલ, સેવક બન્યો.

મંડળી સેવક પાઉલ

²⁴ આમી આંય દુઃખ વેઠા લીદે ખુશ વિહુ, જો તુમા ખાતુરે વેઠુહુ આને આંય સાદા પોતા શરીરુમે દુખુહુને વેઠુહુ જેહેકી ખ્રિસ્તુહુ તીયા શરીરુ ખાતુરે, એટલે મંડળી ખાતુરે વેઠયો.

²⁵ પરમેહેરુહુ તીયા સંદેશ, તુમનેહે પુરી રીતી હોમજાવા ખાતુરે માને પસંદ કેયોહો, આને ઈયા લીદે આંય મંડળી સેવક બની ગીયોહો.

²⁶ એટલે તીયા રહસ્યલે તીયા બાદા લોકુહુકી જો પેલ્લા જમાનામે રેતલા ગુપ્ત રાખ્યો, પેન આમી પરમેહેર તીયા પવિત્ર લોકુહુપે જાહેર વીયોહો.

²⁷ કાહાકા પરમેહેર ઈચ્છા રાખતલો કા તીયા લોક ઇ જાંય લેઅ કા ખ્રિસ્તુ ધન આને મહિમા તુમા અન્યજાતિ લોકુ માટે બી હાય, આને તોઅ રહસ્ય ઓ હાય કા ખ્રિસ્ત તુમામે રેહે, જો તુમનેહે તીયા મહિમા ભાગીદાર વેરા આશા દેહે.

²⁸ ખ્રિસ્તુ વિશે પ્રચાર કીને આપુહુ દરેક માંહાને ચેતવણી દેતાહા, આને તીયા પુરા જ્ઞાનુ આરી જો પરમેહેરુહુ આપનેહે દેદીહી બાદાહાને શિક્ષણ દેતાહા, કા આમુહુ એ ખાતુરી કી સેક્જી, જાંહા તે પરમેહેરુ હુંબુર ઉબી રીઅ તા દરેક ખ્રિસ્તુમે એક મજબુત વિશ્વાસી વેરી.

²⁹ ઇયાજ ખાતુરે આંય તીયા તીયુ શક્તિ અનુસાર જે મામે સમાર્થું આરી કામ કેહે, તન-મન લાગવીને પરિશ્રમ બી કીહુ.