2 થેસ્સલોનિકા પત્રો 3 - દુબલી નવો કરાર

આમા માટે પ્રાર્થના કેરા

¹ છેલ્લે, ઓ માઅ વિશ્વાસી પાવુહુ, આમા માટે પ્રાર્થના કેતા રેજા, કા પ્રભુ વચન બાદી જાગે માહરી ફેલાય આને તીયાલે મહિમા મીલે, જેહેકી તુમામે વીયો.

² આને એહેકી બી પ્રાર્થના કેરા પરમેહેર આપનેહે ખોટા આને દુષ્ટ લોકુકી ઉદ્ધાર પામી સેકેહે, કાહાકા બાદા લોક બાદા લોક પરમેહેરુ ગોઠીપે વિશ્વાસ નાહ કેતા

³ પેન તુમુહુ પ્રભુપે પુરો રીતીકી વિશ્વાસ રાખી સેક્તાહા, તોઅ તુમનેહે આત્મિક રુપુકી મજબુત કેરી, આને શૈતાનુકી વાચાવી રાખી.

⁴ આને આપનેહે પ્રભુમે તુમાપે ભોરોષો હાય, કા આમુહુ તુમનેહે જો કાય કેરા આખલો, તુમુહુ તેહેકીજ કી રીયાહા આને કેતા રીહા.

⁵ પ્રભુ તુમનેહે ઇ હોમજા મદદ કે કા પરમેહેર તુમનેહે કોતો પ્રેમ કેહે, આને ઇસુ ખ્રિસ્તુ હોચે ધીરજ રાખા.

કામ કેરા આલ્યાહા માઅ બોનાહા

⁶ ઓ મેરાલાહા, આમુહુ તુમનેહે પ્રભુ ઇસુ ખ્રિસ્તુ નામુકી આજ્ઞા આપતાહા, કા તુમુહુ એહેડા વિશ્વાસી પાવુ-બોયુકી દુર રેજા, જે કામ કેરામે આલ્યાહા, આને જે આમુહુ હિક્વ્યોહો તીયા અનુસાર નાહ ચાલતા.

⁷ તુમુહુ પોતે જાંતાહા કા તુમનેહે કેલ્લી રીતીકી આમા હોચે જીવન જીવા જોજે, કાહાકા આમુહુ તુમા આરી રીને કામ કેરામે આલાહ નાહ કેયી.

⁸ આમુહુ કેડા બી ફોકટુ મે માંડો નાહ ખાદો, પેન તુમનેહે યાદ આમા જરુરતુ માટે ધ્યાન નાય રાખા પોળે ઈયા ખાતુરે રાત-દિહી તકલીફ વેઠીને કામ ધંધો કેતલા.

⁹ ઈયા ખાતુરે નાહ કા આમુહુ તુમાપેને મદદ મિલવા અધિકાર નાય આથો, પેન ઈયા ખાતુરે કા આમુહુ તુમા હુંબુર નમુના બોનજી, કા તુમુહુ બી આમા હોચે જીવન જીવા.

¹⁰ જાંહા આમુહુ તુમા આરી રેતલા, તાંહા બી આમુહુ તુમનેહે આખ્યા કેતલા, કા કાદાચ એગો માંહુ કામ કેરા નાય માગે, તા તીયાલે ખાવુલો નાય ખાંઅ જોજે.

¹¹ કાહાકા આમુહુ ઉનાય રીયાહા કા તુમા કેતા વાદારે થોડાક લોક આલ્યોહો જીવન જીવી રીયાહા, પોતે તા કાયજ કામ નાહ કેતા પેન બીજા કામુમે રુકાવટ ટાકતાહા.

¹² એહેડા લોકુહુને આમુહુ પ્રભુ ઇસુ ખ્રિસ્તુ નાવુકી આજ્ઞા દેતાહા આને હોમજાવતાહા, કા શાંતિકી પોતે મેહનત કીને, પોતા કામાયુમેને ખાંઅ જોજે.

¹³ ઓ માઅ વિશ્વાસી પાવુહુ, તુમુહુ ભલાય કેરામે હિંમત માઅ છોડાહા.

¹⁴ કાદાચ એગોહો આમા ઈયા પત્રમે લેખલી ગોઠીહીને નાય માને, તા તીયાપે ધ્યાન રાખા, આને તીયા સંગતી માઅ કેહા, જીયાકી તીયાલે પોતે નાજવાયા પોળે.

¹⁵ તેબી તીયા આરી દુશ્મનુ હોચે નાય વેહવાર માઅ કેહા, પેન પોતા પાવુ-બોંય હોમજીને ચેતવણી આપા.

છેલ્લો નમસ્કાર

¹⁶ આમી પ્રભુ જો શાંતિ આપનારો હાય, પોતે તુમનેહે સાદા આને દરેક પ્રકારુકી શાંતિ આપે, આને પ્રભુ સાદા તુમા બાદા આરી રેઅ.

¹⁷ આંય પાઉલ પોતા આથુકી ઈયુ પત્રીમે નમસ્કાર લેખી રીયોહો. દરેક પત્રીમે આંય ઇયુજ રીતી લેખુહુ, એ માઅ લેખુલો નિશાણી હાય.

¹⁸ આંય પ્રાર્થના કીહુ કા આપુ પ્રભુ ઇસુ ખ્રિસ્તુ કૃપા તુમા બાદાપે વેતી રેઅ.