2 પિત્તર પત્રો 1 - દુબલી નવો કરાર

નમસ્કાર

¹ આંય શિમોન પિત્તર, ઇસુ ખ્રિસ્તુ સેવક આને ચેલો હાય, તુમા બાદા માટે ઓ પત્ર લેખી રીયોહો, જીયાહા આપુ હોચે કિંમતી વિશ્વાસ મીલવ્યોહો, તોઅ વિશ્વાસ જો આપુ પરમેહેરુ આને ઉદ્ધારકર્તા ઇસુ ખ્રિસ્તુ મારફતે આપનેહે આપવામે આલોહો, જો આપનેહે પરમેહેરુ આરી ધર્મી ઠેરવેહે.

² આંય પ્રાર્થના કીહુ કા પરમેહેર તુમનેહે વાદારે-વાદારે કૃપા આને શાંતિ આપે જેહેકી-જેહેકી તુમુહુ પરમેહેરુ આને આપુ પ્રભુ ઇસુ ખ્રિસ્તુ જ્ઞાનુ વાદવતાહા.

વિશ્વાસુમે બઢોતરી

³ આપુ પરમેહેરુલે જાંણુલો લીદે તીયાહા આપનેહે તોઅ સામર્થ આપ્યોહો કા જો તીયા પાહી હાય, ઈયા ખાતુરે આપુપે તોઅ બાદો હાય, જીયા આપનેહે એક આત્મિક જીવન જીવુલો વિશે જરુરત હાય. તીયાહા પોતા પાક્કા આને મહિમામય સ્વભાવુ લીદે આપનેહે પોતા લોક વેરા માટે પસંદ કી લેદાહા.

⁴ તીયુજ સામર્થું મારફતે આપુ લોકુ નાશ કેનારા લોકુહુને નાશ કેનારી ઈયા જગતુ ખોટી લાલચુકી વાચાય સેક્તાહા, આને પરમેહેરુ સ્વભાવુ ભાગીદાર વી સેક્તાહા.

⁵ કાહાકા તુમનેહે પરમેહેરુ સ્વભાવુમે ભાગીદાર વેરા જોજે, ઈયા ખાતુરે ખાલી ઇસુ ખ્રિસ્તુપે વિશ્વાસ ઓતોજ નાય કેરા જોજે પેન સાદા તોજ કેરા કોશિશ કેરા જોજે જો બીજા માટે ભલો હાય, આને તુમનેહે ખાલી તોજ કેરા જોજે જો ભલો હાય, પેન તુમનેહે એહેડા લોક બી બોના જોજે જો હોમુજદારીકી વેહવાર કેરા જાંતાહા.

⁶ આને તુમનેહે નાય ખાલી ઇ જાંણા જોજે કા હોમુજદારીકી કેહેકી વેહવાર કેરુલો હાય, પેન તુમનેહે પોતે કાબુમે વેરા જોજે, આને તુમનેહે પોતે કાબુમે રાખા જોજે, આને પોતે કાબુમે રાખુલો ઓતોજ નાહ પેન મુસીબતુમે ધીરજ રાખા જોજે, આને મુસીબતુમે ધીરજ રાખીને ઓતોજ નાય પેન પરમેહેરુલે પસંદ આવે એહેડો જીવન જીવા જોજે.

⁷ આને પરમેહેરુ પસંદ આવે એહેડો જીવનુજ નાય પેન જીયુ રીતીકી તુમુહુ પાવુ-બોયુ આરી પ્રેમ રાખતાહા, તેહેડોજ પ્રેમ રાખનારા બોના. તુમુહુ ખાલી પોતા પાવુ-બોયુ આરી પ્રેમ રાખનારે માંઅ બોનાહા પેન બાદા આરી પ્રેમ કેનારા બોના.

⁸ કાદાચ એ બાદા ગુણ તુમામે હાય, આને આગલા વાદતાહા, તા તુમુહુ આપુ પ્રભુ ઇસુ ખ્રિસ્તુ આરી જીવન જીવી સેકાહા જો તુમનેહે ઉપયોગી આને ફલ આપનારો બોનાવી.

⁹ પેન કાદાચ એગો માંહુ ઈયુ રીતીકી જીવન નાહ જીવતો, તા તોઅ એક એહેડા માંહા હોચે હાય, જો હારી રીતીકી નાહ હીઅ સેકતો કા ફાચે આંદલો હાય. તોઅ વિહરાય ગીયોહો કા પરમેહેરુહુ તીયાં બાદા પાપ માફ કેયાહા, જો તીયાહા ખ્રિસ્તુપે વિશ્વાસ કેરુલો પેલ્લા કેલો.

¹⁰ ઈયા કારણુકી ઓ માઅ વિશ્વાસી પાવુહુ આને બોયુહુ, પોત-પોતાલે આને અન્ય બીજા લોકુહુને ઇ આખા માટે હારો વેહવાર કેરા કોશિશ કેરા, કા પરમેહેરુહુ તુમનેહે ખરેખર પસંદ કેયાહા આને તુમનેહે પોતા લોક વેરા ખાતુરે હાધ્યાહા. કાદાચ તુમુહુ એહેકી કેરાહા તા તુમુહુ ખેરી રીતીકી પરમેહેરુકી અલગ નાહ.

¹¹ આને પરમેહેરુહુ તુમા તીયા રાજ્યમે સ્વાગત કેરી, જીહી ઇસુ ખ્રિસ્ત હાય, જો આપુ પ્રભુ આને આપુ ઉદ્ધારકર્તા હાય, જો સાદા માટે રાજા રુપુમે રાજ કેહે.

પિત્તર આને છેલ્લો સમય

¹² જાંહા તુમુહુ પેલ્લાથીજ ઈયુ ગોઠીહીને જાંતાહા આને ઇસુ ખ્રિસ્તુ વિશે હારી શિક્ષાલે તી રીયાહા, જો તુમુહુ ઉનાયાહા, તીયા વિશે આંય તુમનેહે ઘેડી-ઘેડી યાદ કેરાવતો રેહે.

¹³ આને જાવ લોગુ આંય જીવતો હાય, તાંમ લોગુ તુમનેહે યાદ કેરાવીને તુમનેહે સાવધાન રાખુલો માઅ જવાબદારી હોમજુહુ.

¹⁴ કાહાકા આંય જાંહુ કા આંય માહરીજ મોય જાહે, જેહેકી આપુ પ્રભુ ઇસુ ખ્રિસ્તુ માને સાફ રીતીકી આખ્યોહો.

¹⁵ ઈયા ખાતુરે આંય ઈયુ ગોઠીહીને આમીનેજ લેખુલો માટે કઠીન મેહનત કી રીયોહો, કા માઅ મોરુલો બાદ તુમુહુ સાદા ઇયાલે યાદ કી સેકા.

ઇસુ ખ્રિસ્તુ મહિમા દર્શન

¹⁶ જાંહા આમુહુ તુમનેહે ઇસુ ખ્રિસ્તુ સામર્થું આને તીયા ફાચે આવુલો વિશે આખ્યો, આમુહુ ચતુરાયુકી બોનાવલ્યા ગોઠયા નાહ આખતા, પેન આમુહુ પોતે ઇસુ ખ્રિસ્તુ તેજ આમુહુ ડોંઆકી હેલો.

¹⁷ કાહાકા જાંહા તીયાહા બાહકા પરમેહેરુ આદર આને મહિમા મીલવી આને તીયા તેજવાલી મહિમામેને પરમેહેરુલે ઇ આખતા ઉનાયા, “ઓ માઅ મેરાલો પોયરો હાય, જીયાકી આંય ખુબ ખુશ હાય.”

¹⁸ ઓ આવાજ આમુહુ હોરગામેને આવતા ઉનાયા, તાંહા આમુહુ ઇસુ ખ્રિસ્તુ આરી પવિત્ર ડોગુપે આથા.

¹⁹ આમુહુ બી જાંતાહા કા ખ્રિસ્તુ વિશે ભવિષ્યવક્તાહા જો લેખ્યોહો, તોઅ બિલકુલ હાચો હાય. કાદાચ તુમુહુ પ્રચારુપે ધ્યાન આપાહા, તા તુમુહુ હારો કામ કેરાહા, કાહાકા ઇ એક દીવા હોચે હાય જો આંદારામે ચોમકેહે, જાંહા લોગુ દિહ નાહ ઉગતો આને જીયુ રીતીકી વેગર્યા-વેગર્યા તારા ઉજવાળો કેતાહા, તીયુજ રીતીકી ઇસુ ખ્રિસ્તુ બી ઉજવાળો તુમા રદયુમે ચોમકેહે.

²⁰ પેન તુમનેહે ઈયુ ગોઠીલે હોમજા જરુરી હાય, કા પવિત્રશાસ્ત્ર ભવિષ્યવક્તા મારફતે લેખલો જો વચન તુમુહુ વાચતાહા, તોઅ તીયા મનુ વિચાર નાહ.

²¹ કાહાકા કા કેલ્લો બી ભવિષ્યવાણી કીદીહી બી માંહા મારફતે ઉત્પન્ન નાહ વેયી, પેન પવિત્રઆત્માહા લોકુ મનુમે કાબુ કેયો, તાંહા તીયાહા પરમેહેરુ વેલેને આલ્લા વચનુ પ્રચાર કેયો.