2 કુરિંથીઓ પત્રો 7 - દુબલી નવો કરાર

¹ ઓ મેરાલાહા, જાંહા આંય ઓ વાયદો તુમનેહે આપવામે આલો, તા આમુહુ પોતે શરીરુ આને આત્મા બાધ્યા ખારાબ કામુહુને કેરા બંદ કી ધ્યા, આને પરમેહેરુ બીખ રાખીને પુરી પવિત્રતાકી જીવન જીવા.

પાઉલુ ખુશી

² તુમુહુ આમનેહે પ્રેમ કેરા, આમુહુ કેડા બી કાયજ ખોટો નાહ કેયો, આને કેડા બી કાયજ નાહ બીગાળ્યો, આને નાહ એગાલે ઠોગી લેદો.

³ આંય તુમનેહે દોષી બોનાવા ખાતુરે તુમનેહે એ ગોઠયા નાહ આખતો. કાહાકા આંય પેલ્લાથીજ આખી ચુક્યોહો કા આમુહુ તુમા આરી ખુબુજ પ્રેમ કેતાહા, આમુહુ તુમા આરી જીવા આને મોરા બી તીયાર હાય.

⁴ આંય તુમનેહે હિંમતુકી આખુહુ, માને તુમા વોચ્ચે ખુબુજ ઘમંડ હાય, આને માને ખુબુજ શાંતિ મીલીહી. માઅ બાદે દુખુમે બી આંય ખુશ વિહુ.

⁵ કાહાકા જાંહા આમુહુ મકોદેનિયા વિસ્તારુમે આલા, તાંહા બી આમનેહે આરામ નાહ મીલ્યો, પેન આમનેહે ચારુવેલે તકલીફ આથી, બારે લડાય ચાલતલી આને આમા રદયુમે બીખ આથી.

⁶ તેબી દુઃખી લોકુહુને દિલાસો આપા પરમેહેરુહુ, તિતસુ આવુલોકી આમનેહે દિલાસો મીલ્યો.

⁷ આને નાય ખાલી તીયા આવુલોકી પેન તિતસુલે તુમા વેલેને દિલાસો મીલ્લો તીયાકી બી, તીયાહા આપનેહે આખ્યો કા તુમુહુ માને કોતા હેરા માગતલા, આને જો બી તુમુહુ કેયો તીયાં વિશે તુમનેહે દુ:ખ આને તુમુહુ કેહેકી માઅ વિશે ચિંતા કેતાહા. જીયાકી આંય ખુબ ખુશ વીયો.

⁸ કાહાકા કાદાચ માયુહુ તુમનેહે પત્ર લેખીને દુઃખી કેયોહો, તેબી આંય તીયાકી દુઃખી નાહ વેતો, જેહેકી પેલ્લા દુઃખી વેતલો, કાહાકા આંય જાંહુ કા તોઅ પત્ર વાચા ખાતુરે તુમનેહે દુઃખ તા વીયો પેન તોઅ દુઃખ થોડીકુજ વાઅ માટે આથો.

⁹ આમી આંય ખુશ હાય પેન ઈયા ખાતુરે નાહ કા તુમુહુ દુઃખી વીયા, પેન ઈયા ખાતુરે કા તુમુહુ તીયા દુઃખુ લીદે પાપ કેરા બંદ કી દેદો, કાહાકા તુમા દુઃખ પરમેહેરુ ઈચ્છા અનુસાર આથો, કા આપુ વેલેને તુમનેહે કેલ્લીજ ગોઠી નુકશાન નાય વેઅ.

¹⁰ કાહાકા કાદાચ એગો માંહુ પરમેહેરુ ઈચ્છાકી દુઃખી વેહે, તા તોઅ પાસ્તાવો કેહે આને ઉદ્ધાર પામેહે. ઇયામે દુઃખ નાહ. પેન જગતુ દુ:ખુમે મૃત્ય જન્મેહે.

¹¹ તીયા મારફતે તુમામે કોતો બદલાવ આલોહો, તીયા વિશે આંય આને તુમુહુ વિચાર કેરા, પરમેહેરુ ભક્તિ કેરુલો કોતો ઉત્સાહ આલોહો, વિરોધ કેનારાલે જવાબ આપુલો, ગલત કેનારાકી ચીળવાય જાવુલો, પરમેહેરુ બીખ, માને મીલુલો ઈચ્છા, સેવા કેરુલો ઉત્સાહ, આને ખોટાયુ બદલો લેવુલો, ઇ બાદો કીને સાબિત કી દેદો કા તુમુહુ ઈયુ ગોઠી દોહી નાહ.

¹² માયુહુ તુમનેહે જો પત્ર લેખલો, તોઅ અન્યાય કેનારા ખાતુરે નાહ લેખ્યો આને નાહ તે જીયાપે અન્યાય વીયો તીયા માટે, પેન ઈયા ખાતુરે લેખ્યોહો કા આમા સાથ તુમા માટે લગન, તોઅ પરમેહેરુ હાજરીમે તુમનેહે માલુમ પોળે.

¹³ ઈયા ખાતુરે આમનેહે ખુબુજ પ્રોત્સાહાન મીલ્યો, આને તુમુહુ તિતસુ મદદ કીને તીયાલે ખુશ કી દેદો, ઈયા ખાતુરે આમનેહે વાદારે ખુશી વેયી.

¹⁴ કાહાકા કાદાચ માયુહુ તિતસુ આગલા તુમા વિશે વાહ-વાહી કેયી તા આંય નાજવાયો નાહ. પેન જેહેકી આમુહુ તુમનેહે બાધ્યા ગોઠયા હાચ્યા આખી દેધ્યાહા, તેહેકીજ તિતસુ આગલા આપુ વાહ-વાહી કેરુલો હાચો પોળ્યો.

¹⁵ તુમુહુ બાદા તીયા આધિનુમે વેરા ખાતુરે કોતા તીયાર રેતલા, આને તીયા બીખુકી કાપતા જાંયને તીયાલે સ્વીકાર કેયો, તોઅ બાદો તોઅ યાદ કેહે, તા તુમા આરી જો તીયા પ્રેમ હાય તોઅ વાદારે વાદી જાહે,

¹⁶ આંય ખુશ હાય, કાહાકા માને દરેક ગોઠીમે તોપે ભોરોષો હાય.