2 કુરિંથીઓ પત્રો 2 - દુબલી નવો કરાર

¹ ઈયા ખાતુરે માઅ મનુમે ઇ નક્કી કી લેદલો, કા ફાચો તીહી આવીને તુમનેહે દુઃખી નાય કિવ્યુ.

² કાહાકા તીહી આવીને કાદાચ આંયજ તુમનેહે દુઃખી કેહે, તા ખુશી આપનારો તુમનેહે છોડીને બીજો કેડોજ નાય રેઅ, ખાલી તોજ રીઅ જીયાલે માયુહુ દુઃખી કેયોહો.

³ આને માયુહુ ઈયુ ગોઠીલે લીને ઓ પત્ર લેખ્યોહો, કા કાદાચ એહેકી નાય વેઅ કા જાંહા આંય આવુ તા જીયા લીદે માને ખુશી મીલા જોજે, તીયા લીદે આંય દુઃખી વી જાંઉ, કાહાકા માને તુમા બાદાપે ઈયુ ગોઠી ભોરોષો હાય કા જે માઅ ખુશી હાય તેજ તુમા બી ખુશી હાય.

⁴ ખુબુજ તકલીફ આને મનુમે ખુબુજ દુઃખી વીને રોળી-રોળીને માયુહુ ઓ પત્ર તુમા ખાતુરે લેખલો, ઓ પત્ર વાંચીને તુમુહુ દુઃખી હાય આખીને નાહ, પેન જો પત્ર આંય તુમા આરી કીહુ, તીયાસે મોડો પ્રેમ તા તુમુહુ જાંયલ્યા ઈયા ખાતુરે લેખ્યોહો.

ગુનેહગારુહુને માફી

⁵ કાદાચ એગાહા માને દુઃખી કેયોહો, તા ખાલી માનુજ નાહ પેન તુમનેહે બાદાહાને બી થોડા-થોડા દુઃખી કેયાહા, ઈયા વિશે ઇયાસે વાદારે કાંવીહી વાદારે નાહ આખા માગતો.

⁶ એહેડા માંહાલે જો દંડ તુમામેને થોડાક વિશ્વાસી પાવુહુ આપ્યોહો, તોઅ ખુબ હાય.

⁷ ઈયા ખાતુરે ઇયાસે વાદારે હારો ઇ રીઅ કા તુમુહુ તીયા ગુનો માફ કેરા આને દિલાસો આપા, કાદાચ એહેકી નાય વેઅ કા તોઅ માંહુ દુઃખી વી જાય આને પુરી રીતીકી વિશ્વાસ કેરા છોડી.

⁸ ઈયા લીદે આંય તુમનેહે વિનંતી કીહુ કા તુમુહુ આખા કા ખરેખર તુમુહુ તીયા આરી ખુબુજ પ્રેમ કેતાહા.

⁹ કાહાકા માયુહુ ઈયા ખાતુરે ઓ પત્ર લેખલો, કા નેહે પારખી લીવ્યુ કા તુમુહુ માઅ બાદી ગોઠીહીને માના ખાતુરે તીયાર હાય કા નાહ.

¹⁰ જીયાલે તુમુહુ માફ કેતાહા, તીયાલે આંય બી માફ કીહુ. કાહાકા જીયાલે માફ કેરુલો જરુર હાય, તીયાલે માયુહુ પેલ્લાજ માફ કી દેદોહો, આને માયુહુ તુમા ભલાયુ માટે ખ્રિસ્તુ હુંબુર માફ કી દેદોહો.

¹¹ કા શૈતાન કેલ્લો બી ફાયદો ઉઠાવી નાય સેકે, કાહાકા આમુહુ જાંતાહા તોઅ સાદા આપનેહે પાપુમે ફસાવા યોજના બોનાવતો રેહે.

ત્રોઆસ શેહેરુમે પાઉલુ દુઃખી વેરુલો

¹² જાંહા આંય ખ્રિસ્તુ હારી સુવાર્તા ઉનાવા ખાતુરે ત્રાઓસ શેહેરુમે આલો, આને તીહી પ્રભુહુ માને હારી સુવાર્તા પ્રચાર કેરા ખાતુરે મોકો આપ્યો,

¹³ તાંહા માઅ પાવુહુ તિતસુલે તુમા વેલેને હારી સુવાર્તા ખબર લાવતા, તીહી માને નાય મીલ્યો તા માઅ મનુલે શાંતિ નાય પોળી, ઈયા ખાતુરે આંય ત્રોઆસ શેહેરુમે વિશ્વાસી લોકુપેને રાજા લીને તિતસુલે હોદા માટે મકોદેનિયા વિસ્તારુમે જાતો રીયો.

ખ્રિસ્તુમે વિજય

¹⁴ પેન પરમેહેરુ ધન્યવાદ વેઅ, કાહાકા ખ્રિસ્તુમે રેવુલો લીદે તોઅ સાદા આપનેહે તીયા આરી લીને ચાલેહે, આને વિજય આપેહે, આને આમી આપનેહે જ્ઞાનુલે ફેલાવા ખાતુરે સુગંધિત વસ્તુ હોચે કામુમે લેહે.

¹⁵ કાહાકા જે લોક ઉદ્ધાર પામતેહે આને નાશ વેતેહે, તીયા બાદા વોચ્ચમે આપુ જીવન પરમેહેરુ માટે ખ્રિસ્તુ સુગંધ હાય.

¹⁶ જે નાશ વી રીયેહે, તીયાં માટે તા આમુહુ મૃત્ય ગંધુ હોચે હાય. આને જે ઉદ્ધાર પામી રીયેહે, તીયાં માટે જીવન સુગંધ હાય. ખરેખર કેડો બી પોતે ઈયુ સુગંધુલે ફેલાવા લાયક નાહ.

¹⁷ કાહાકા જો માલ-મિલકતુ માટે પરમેહેરુ વચનુલે પ્રચાર કેતેહે તીયાં હોચે નાહ, પેન આમુહુ પરમેહેરુ વચનુ પ્રચાર હાચાય આને ખ્રિસ્તુ અધિકારુ આરી કેતાહા, ઇ જાંયને બી કા પરમેહેર આમનેહે હેહે.