2 કુરિંથીઓ પત્રો 10 - દુબલી નવો કરાર

પાઉલુ અધિકાર

¹ આંય પાઉલ ખ્રિસ્તુ નમ્રતા આને ભલાયુકી તુમનેહે વિનંતી કીહુ, થોડાક લોક માઅ વિશે ઇ આખતાહા કા જાંહા આંય તુમા આરી રેતલો, તા નમ્ર રીહુ, પેન જાંહા દુર રીહું, તા તુમા આરી કઠોર વેહવાર કીહુ.

² આંય એ વિનંતી કીહુ કા તુમા આરી માને કઠોર વેહવાર નાય કેરા પોળે, જેહેકી આંય થોડાક લોકુ આરી કઠોર વેહવાર કેનારો હાય, કાહાકા તે આમનેહે ઇ આખતાહા કા સંસારીરિક લોકુ આરી વેહવાર કેતાહા.

³ આમુહુ ઈયા જગતુમે તા રેતાહા, પેન ઈયા જગતુ લોકુજ હોચે ચુલાયુલો-ઝગળો નાહ કેતા.

⁴ કાહાકા ઝગળામે આમુહુ જે હથિયાર વાપરુતાહા, તે હથિયાર ઈયા જગતુ લોક વાપરુતા તેહેડે નાહ, પેન બાદી જાતિ કીલ્લાહાને તોળી ટાકુલો માટે પરમેહેરુ સામર્થી હથિયાર હાય.

⁵ ઈયા મારફતે આમુહુ દરેક વિરોધુલે, તીયા દરેક ઘમંડ કેનારા, જે પરમેહેરુ જ્ઞાનુ વિરુધ વેતાહા તીયાહાને માય ટાકતાહા, આને દરેક વિચારુહુને કાબુમે કીને ખ્રિસ્તુ આધિનુમે કેતાહા.

⁶ કાદાચ તુમુહુ પુરી રીતીકી ખ્રિસ્તુ આજ્ઞા પાલન કેરાહા, તા આમુહુ જે આજ્ઞા પાલન નાહ કેતા, તીયાહાને દંડ આપા ખાતુરે તીયાર હાય.

⁷ તુમુહુ તા ખાલી બારેને રુપ હેતાહા, કાદાચ કેડો બી એહેકી વિશ્વાસ કેતો વેરી, કા આંય ખ્રિસ્તુ હાય, તા ઇ બી જાંયલ્યા કા જેહેકી તોઅ ખ્રિસ્તુ હાય, તેહેકીજ આમુહુ બી ખ્રિસ્તુ હાય.

⁸ કાહાકા જો અધિકાર પ્રભુહુ માને આપ્યોહો, કાદાચ આંય તીયાપે ઘમંડ કીવ્યુ, તા માને તીયુ ગોઠીમે કાયજ શરમ નાહ આવતી. ઓ અધિકાર તુમા વિશ્વાસુ નાશ કેરુલો માટે નાહ, પેન તીયામે વાદારો કેરા માટે આપનેહે આપવામે આલોહો.

⁹ તુમુહુ ઇ માઅ હોમજાહા કા આંય પત્ર લેખીને તુમનેહે બીયાવા માગુહુ.

¹⁰ કાહાકા તુમામેને થોડાક લોક આખતાહા કા, “તીયા પત્ર તા કઠોર આને ઉંડાયુકી લેખલા હાય, પેન જાંહા તોઅ આમા હુંબુર વેહે, તાંહા એકદમ નિર્બલ માંહુ દેખાહે, આને તીયા ગોગુલોમે બી કાય શક્તિ નાહ.”

¹¹ ઈયા ખાતુરે જો માંહુ આખેહે, તોઅ ઇ હોમજી લેઅ કા આમુહુ તુમાસે દુર રીને પત્રમે જે ગોઠયા, તેજ ગોઠયા જાંહા આમુહુ તુમા હુંબુર હાજર વિહુ તાંહા કીને દેખાવુહુ.

¹² કાહાકા આમુહુ તીયાં આરી ગણતરી કા બરાબરી કેરુલો હિંમત નાહ કેતા, જે પોતા વાહ-વાહી કેતાહા, આને પોતાલે બીજા આરી બરાબરી કીને મુર્ખ ગોણાતાહા.

¹³ આમુહુ તા સીમાકી કીદીહી બી ઘમંડ નાહ કેતા, આને તીયુજ સીમાહી લોગુ રીહુ જે પરમેહેરુહુ આમા માટે નક્કી કી દેદીહી, આને તીયામે તુમુહુ બી આવી ગીયાહા, આને તીયાજ અનુસાર ઘમંડ કેરાહા.

¹⁴ કાહાકા આમુહુ આમા સીમા બારે જાંઅ નાહ માગતા, જેહેકી કા તુમાહી લોગુ નાય પોચુલો દશામે રેતાહા, પેન ખ્રિસ્તુ હારી સુવાર્તા પ્રચાર ઉનાવતા જાયને તુમા પાહી પોચી ગીયાહા.

¹⁵ આમુહુ સીમાસે વાદારે બીજા મેહનતુપે ઘમંડ નાહ કેતા, પેન આમનેહે આશા હાય કા જેહેકી-જેહેકી તુમા વિશ્વાસ વાદતો જાંય, તેહેકી-તેહેકી આમુહુ આમા સીમા અનુસાર તુમા વોચ્ચે વાદારે કામ કી સેકુહુ.

¹⁶ કા આમુહુ તુમા સીમાપે આગલા વાદીને સુવાર્તા ઉનાવુહુ, આને એહેકી નાય કા બીજા વિસ્તારુમે બોનલો-બોનાવલા કામુપે ઘમંડ કેજી.

¹⁷ પેન જેહેકી પવિત્રશાસ્ત્રમે લેખલો હાય, “જો ઘમંડ કે, તોઅ પ્રભુપે ઘમંડ કે.”

¹⁸ કાહાકા જો પોતા વાહ-વાહી કેહે તોઅ નાહ, પેન જીયા વાહ-વાહી પ્રભુ કેહે, તોજ પ્રભુ નજરુમે સ્વીકારુલો યોગ્યો હાય.