2 કુરિંથીઓ પત્રો 1 - દુબલી નવો કરાર

નમસ્કાર

¹ પરમેહેરુ ઈચ્છા અનુસાર ઇસુ ખ્રિસ્તુ ચેલો વેરા ખાતુરે પસંદ કેલો આંય પાઉલ આને આપુ વિશ્વાસી પાવુ તિમોથી, ઓ પત્ર કુરિંથી શેહેરુ મંડળી બાદા વિશ્વાસી લોકુ માટે આને આખા અખાયા વિસ્તારુ પરમેહેરુ લોકુ માટે લેખુહુ.

² આપુ બાહકા પરમેહેર આને પ્રભુ ઇસુ ખ્રિસ્તુ વેલેને તુમનેહે કૃપા આને શાંતિ મિલતી રેઅ.

પરમેહેરુ ધન્યવાદ કેરુલો

³ આપુ પ્રભુ ઇસુ ખ્રિસ્તુ આને પરમેહેરુ સ્તૃતિ વેઅ, જો દયાલો બાહકો દરેક પ્રકારુ દિલાસો આપનારો પરમેહેર હાય.

⁴ આપુ બાદા પ્રકારુ દુખુમે પરમેહેર આપનેહે દિલાસો આપેહે, કા આપુહુ બીજાહાને દિલાસો આપજી. જીયુ રીતીકી પરમેહેર આપનેહે દિલાસો આપેહે, તીયુજ રીતીકી આપુહુ જે દુખુમે હાય તીયાહાને દિલાસો આપી સેક્જી.

⁵ કાહાકા જીયુ રીતીકી આપુહુ ખ્રિસ્તુ દુખુમે ભાગીદાર હાય, તેહેકીજ આપનેહે ખ્રિસ્તુ મારફતે ખુબુજ દિલાસો મીલેહે.

⁶ કાદાચ આપુહુ દુઃખ સહન કેતાહા, તા તોઅ તુમા દિલાસા આને ઉદ્ધારુ માટે હાય, આને કાદાચ આપનેહે દિલાસો મીલેહે, તા ઈયા ખાતુરે કા આમુહુ તુમનેહે દિલાસો આપજી, કા તુમુહુ બી તીયાજ દુખુલે ધીરજ રાખીને સહન કી સેકા જો આપુહુ વેઠી રીયાહા.

⁷ તુમા વિશે આમુહુ મજબુત આશા રાખતાહા. કાહાકા આમુહુ જાંતાહા જીયુ રીતીકી તુમુહુ આમા દુખુમે ભાગીદાર હાય, તીયુજ રીતીકી આમનેહે જો દિલાસો મીલેહે, તીયામે તુમુહુ બી ભાગીદાર વેરાહા.

⁸ ઓ માઅ વિશ્વાસી પાવુહુ આને બોયુહુ, આમુહુ એ ઈચ્છા રાખતાહા કા આસિયા વિસ્તારુમે જે તકલીફ આમનેહે વેઠા પોળી તીયા વિશે તુમુહુ જાંણા, કાહાકા આમનેહે ઓતો વોજો લાગ્યો કા આમુહુ તીયાલે વેઠી નાય સેક્યા, ઇહી લોગુ કા આમુહુ જીવા શક્તિ નાહ રીયી.

⁹ આમુહુ તા ઇ વિચારી લેદલો, કા બાસ આમી આમુહુ મોયજ જાનારા હાય, ઇ ઈયા ખાતુરે વીયો કા આમુહુ પોતાપે ભોરોષો નાય રાખી સેક્જી, પેન જો મોલામેને ફાચો જીવતો કેહે, તીયા પરમેહેરુપે વિશ્વાસ કેજી.

¹⁰ તીયાહાજ આમનેહે મોતુ જોખમુમેને વાચાવ્યા આને વાચાવી, આને આમનેહે તીયાપે પુરી આશા હાય કા તોઅ આગલા બી વાચાવી.

¹¹ જીયુ રીતીકી તુમુહુ પ્રાર્થના મારફતે આમા મદદ કેતાહા, કા જે વરદાન ખુબુજ લોકુ મારફતે મીલ્યેહે, તીયુ લીદે ખુબુજ લોક આમા વેલેને પરમેહેરુ ધન્યવાદ કેજા.

પાઉલુ મારફતે સેવા મુસાફરી યોજ્ના બોદલેહે

¹² કાહાકા આમુહુ આમા વિવેકુ ઈયુ સાક્ષીપે ઘમંડ કેતાહા, કા દુનિયા લોકુમે આને ખાશકીને તુમા વોચ્ચે આમા ગોગુલો-ચાલુલો પરમેહેરુ વેલેને પવિત્ર આને હાચાયુ અનુસાર આથો, જો લોકુ જ્ઞાનુ અનુસાર નાહ, પેન પરમેહેરુ કૃપા આરી આથો.

¹³ આમુહુ સાદા એહેડી ગોઠ લેખતાહા કા તુમુહુ વાચી આને હોમજી સેકા, જેહેકી કા આમી તુમુહુ આમનેહે ખાલી થોડા-ઘોણા હોમજુતાહા, પેન માને આશા હાય કા તુમુહુ આમનેહે પુરી રીતીકી હોમજી સેકાહા.

¹⁴ કા જીયુ રીતીકી આમુહુ તુમા લીદે ઘમંડ કીહુ, તીયુજ રીતીકી તુમુહુ બી પ્રભુ ઇસુ ફાચે આવુલો સમયુપે ઘમંડ કેરાહા.

¹⁵ માને ઈયુ બાદી ગોઠીપે ભોરોષો આથો, ઈયા ખાતુરે માયુહુ પેલ્લાજ તુમનેહે મીલા આયોજન કેલો, કા આંય તુમા પાહી બીજી વાર આવુ આને તુમનેહે બમણો આશીર્વાદ આપી સેકુ.

¹⁶ ઈયા કારણુકી માઅ યોજના એ આથી કા આંય તુમા પાહી રાખીને મકોદેનિયા વિસ્તારુને જાંઉ, આને મકોદેનિયા વિસ્તારુમેને વોલીને ફાચે તુમા પાહી આવુ. આને યહુદીયા વિસ્તારુમે જો ખર્ચો વેરી, તીયા માટે તુમુહુ માઅ મદદ કેરા.

¹⁷ જાંહા માયુહુ ઇ નક્કી કેયો તા આંય ઈયા વિશે ખુબુજ ગંભીર આથો. આંય જો કેરા ઇચ્છુહુ તીયાલે સંસારિક લોકુ હોમુજુ અનુસાર ફેસલો નાહ કેતો, કા દરેક ગોઠીમે હા-હા આને નાહ-નાહ કિવ્યુ.

¹⁸ પરમેહેર હાચો સાક્ષી હાય કા જો વચન આમુહુ તુમનેહે આખલો, તીયામે હા આને નાય બેન ગોઠયા નાહ.

¹⁹ પરમેહેરુ પોયરો ઇસુ ખ્રિસ્ત જીયા પ્રચાર માયુહુ આને સિલાસ આને તિમોથીહી તુમા વોચ્ચે કેયોહો, તીયામે હા આને નાય બેન ગોઠયા પેન ખાલી હોવ હાય.

²⁰ કાહાકા પરમેહેરુહુ જે બી વાયદા કેલા તે બાદા ઇસુ ખ્રિસ્તુમે હાંજ હાય, ઈયા ખાતુરે આમુહુ પરમેહેરુ મહિમા માટે ખ્રિસ્ત ઇસુ આમીન એટલે હાં આખતાહા.

²¹ આને જો આમનેહે તુમા આરી ખ્રિસ્તુમે મજબુત કેહે, આને જીયાહા આમા અભિષેક કેયોહો તોજ પરમેહેર હાય.

²² જીયાહા આમાપે મહોર બી લાગવી દેદીહી, આને સોદા રુપુમે પોતા પવિત્રઆત્માલે આમા હદયુમે આપીહી.

²³ આંય કુરિંથી શેહેરુમે ઈયા ખાતુરે ફાચો નાહ આલો, કા તુમનેહે તકલીફ પોળે, માઅ ઈયુ હાચાયુ પરમેહેર સાક્ષી હાય.

²⁴ આમુહુ એ નાહ ઈચ્છા રાખતા કા તુમા વિશ્વાસુપે આમુહુ અધિકાર ચાલવુજી. પેન આમુહુ તુમા સુખ-શાંતિમે મદદ કેનારા હાય, કાહાકા તુમુહુ તા એહેકી બી વિશ્વાસુમે મજબુત હાય.