1 થેસ્સલોનિકીઓ પત્રો 4 - દુબલી નવો કરાર

પરમેહેરુલે ખુશ કેનારો જીવન જીવા

¹ ઓ વિશ્વાસી પાવુહુ, તુમા પોતા જીવન જીવુલુકી પરમેહેરુલે કેહેકી ખુશ કેરુલો તોઅ તુમુહુ આમા પેને હિક્યાહા, આને તેહેકીજ તુમુહુ બી જાંતાહા. ઈયા ખાતુરે આમુહુ પ્રભુ ઇસુ ખ્રિસ્તુ નાવુકી તુમનેહે વિનંતી કેતાહા, આને હોમજાવતાહા બી, કા તુમુહુ તીયામે વાદતા જાઅ.

² કાહાકા તુમુહુ જાંતાહા, કા જે શિક્ષા આમુહુ તુમનેહે દેદીહી તે તીયા અધિકારુકી હાય જે પ્રભુ ઇસુ ખ્રિસ્તુહુ આમનેહે દેદીહી.

³ પરમેહેરુ ઈચ્છા એ હાય, કા તુમુહુ પવિત્ર બોના એટલે વ્યેભિચાર નાય કેરુલો.

⁴ આને તુમામેને દરેક માંહુ પવિત્રતાકી આને સન્માનુકી પોતા કોઅવાલી આરી વેહવાર કેરા જાંય લેઅ.

⁵ આને તીયા લોકુ સામાન નાય કેરુલો જે પરમેહેરુલે નાહ જાંતા. કાહાકા તે ભોગવિલાસ હોમજીને ઇ કામે કેતાહા.

⁶ આને ઈયુ ગોઠીપે પાપ કીને કેડો બી એગા પાવુલે ધોકો નાય દેઅ, ઇ આમુહુ તુમનેહે પેલ્લાનેજ આખલો આને ચેતવણી બી આપલી, કાહાકા પ્રભુ ઈયુ ગોઠી દંડ આપી.

⁷ કાહાકા પરમેહેરુહુ આમનેહે અશુદ્ધ જીવન જીવા ખાતુરે નાહ, પેન પવિત્ર જીવન જીવા ખાતુરે હાધ્યાહા.

⁸ ઈયા ખાતુરે જે નિયમુલે નાહ જાંતા તોઅ કેલ્લા બી માંહા નાહ પેન પરમેહેરુ નિયમુલે નાહ માનતો, જો પોતા પવિત્રઆત્મા તુમનેહે આપેહે.

⁹ એકબીજા આરી પ્રેમ રાખુલો તુમુહુ પોતે પરમેહેરુપેને હિક્યાહા, ઈયા ખાતુરે તુમુહુ વિશ્વાસી પાવુ-બોયુ આરી પ્રેમ રાખુલો વિશે હિકુલો જરુરત નાહ.

¹⁰ આને મકોદેનિયા વિસ્તારુ વિશ્વાસી પાવુ-બોયુ આરી એહેડો પ્રેમ રાખતાહા બી. પેન ઓ મેરાલાહા, આમુહુ તુમનેહે વિનંતી કેતાહા કા આજી બી વાદારે એકબીજા આરી પ્રેમુમે રેજા.

¹¹ આને જેહેકી આમુહુ તુમનેહે હોમજાવલો તેહેકીજ શાંતિકી રેજા, આને પોત-પોતા કામ કેતા રેવુલો, આને પોતે કામાવીને પોતા પાલન પોષણ કેરુલો.

¹² કા અવિશ્વાસી લોક તુમા વેહવાર હીને તુમા આદર કે, આને તુમનેહે પોતા જરુરત પુરી કેરા ખાતુરે કેડાપે બી નિર્ભર નાય રાંઅ પોળે.

ઇસુ ફાચે આવુલો

¹³ ઓ માઅ વિશ્વાસી પાવુહુ, આમુહુ ઈચ્છા રાખતાહા જે મોય ગીયાહા તીયાં વિશે તુમુહુ જાંણા, એહેકી નાય વેઅ કા તુમુહુ એકબીજા લોકુ હોચે દુઃખી વેરા, જીયાહાને એ આશા નાહ કા મોરુલો બાદ ફાચા જીવતા વી જાંય.

¹⁴ કાહાકા કાદાચ આપુહુ વિશ્વાસ કેતાહા, કા ઇસુ મોય ગીયો આને ફાચે જીવતો વી ગીયો, તેહેકીજ જે ઇસુ ખ્રિસ્તુમે વિશ્વાસ કીને મોય ગીયાહા, તીયાહાને પરમેહેર ઇસુ ખ્રિસ્તુ મારફતે ફાચો લાવી.

¹⁵ આપુહુ પ્રભુ ઇસુ ખ્રિસ્તુ વચનુ અનુસાર તુમનેહે ઇ આખતાહા, જે લોક વિશ્વાસુમે મોય ગીયાહા, તે પ્રભુ ઇસુ ખ્રિસ્તુ આરી મુલાકાત કેરી, તીયાં બાદ આપુહુ જે જીવતા હાય આને પ્રભુ ઇસુ ખ્રિસ્તુ આવુલો લોગુ જીવતા રીઅ, તે પ્રભુ આરી મુલાકાત કેરી.

¹⁶ કાહાકા પ્રભુ ઇસુ પોતે હોરગામેને આવી, તાંહા આદેશ આપવામે આવી, આને મોડા દુતુ આવાજ ઉનાહુ આને પરમેહેરુ તુરી આવાજ ઉનાહુ, તાંહા જે ખ્રિસ્તુમે વિશ્વાસ કીને મોય ગીયાહા, તે પેલ્લા જીવતા વી જાંય.

¹⁷ તીયા બાદ જે આપુહુ જીવતા હાય આને વાચાય રીહુ, તીયાં આરી જુગુમે પ્રભુલે મીલા ખાતુરે વાદલામે ઉઠાવી લેવામે આવુહુ, આને તીયા સમયુલેને આપુહુ સાદા પ્રભુ ઇસુ ખ્રિસ્તુ આરી રીહુ.

¹⁸ ઈયા ખાતુરે ઈયુ ગોઠીકી એકબીજા આરી સાંત્વના આપ્યા કેરા.