1 થેસ્સલોનિકીઓ પત્રો 3 - દુબલી નવો કરાર

તિમોથીલે મોક્લુલો

¹ ઈયા ખાતુરે જાંહા આમુહુ તુમનેહે હેયા વગર રી નાહ સેકતા, તા માયુહુ પાઉલુહુ આને સિલાસુહુ એથેન્સ શેહેરુમે રેવુલો નક્કી કેયો.

² આને આમુહુ તિમોથીલે જો ખ્રિસ્તુ હારી સુવાર્તા ઉનાવામે આમી આર્યો પાવુહુ, આને પરમેહેરુ સેવક હાય, તીયાલે તુમા પાહી મોક્લ્યો, કા તોઅ તુમનેહે મજબુત કે, આને તુમનેહે વિશ્વાસુમે મજબુત કેરામે મદદ કે.

³ કા ઈયા સતાવુ લીદે વિશ્વાસ નાય છોડી દેઅ, કાહાકા તુમુહુ જાંતાહા કા આપનેહે દુઃખ વેઠા પોળી.

⁴ કાહાકા પેલ્લાનેજ જાંહા આમુહુ તુમા આરી આથા, તાંહા આમુહુ તુમનેહે આખ્યા કેતલા, કા આપનેહે સતાવ વેઠા પોળી, આને એહેકીજ વીયો, આને તુમુહુ બી જાંતાહા.

⁵ ઈયા કારણુકી જાંહા માને ઇ જાંયા વગર રેવાયો નાહ કા તુમુહુ કેહેડા હાય, તા માયુહુ તુમા વિશ્વાસુ વિશે જાંણા ખાતુરે માયુહુ તિમોથીલે તુમા પાહી મોકલ્યો, કાહાકા માને બીખ આથી કા પરીક્ષા કેનારા શૈતાનુહુ તુમા પરીક્ષા કેયી વેરી, આને આમા મેહનત નક્કામી ગીયી વેરી.

⁶ પેન આમી તિમોથીહી તુમાહીને આમા પાહી ફાચે આવીને તુમા વિશ્વાસ આને પ્રેમુ હારી સુવાર્તા ઉનાવીહી, આને ઇ ગોઠ બી આખી કા તુમુહુ સાદા પ્રેમુમે આમનેહે યાદ કેતાહા, આને આમનેહે હેરા ઈચ્છા રાખતાહા, જેહેકી આમુહુ બી તુમનેહે હેરા ઈચ્છા રાખતાહા.

⁷ ઈયા ખાતુરે ઓ મેરાલાહા, આમા બાદા દુખુહુને આને સતાવુમ બી તુમા વિશ્વાસુ વિશે ઉનાયને આમનેહે દિલાસો મીલ્યો.

⁸ કાહાકા કાદાચ તુમુહુ પ્રભુમે સ્થિર હાય, તા આમા ખાતુરે એક નોવા જીવનુ સમાન હાય.

⁹ તુમા લીદે, પરમેહેરુ હુંબુર જે ખુશી હાય, તીયા બદલામે તુમા વિશે આંય, આમુહુ કેલ્લી રીતી પરમેહેરુ ધન્યવાદ કેજી?

¹⁰ આમુહુ તુમનેહે ફાચે મીલા રાત-દિહ લગાતાર પ્રાર્થના કેતાહા, કા આમુહુ તુમા વિશ્વાસુલે મજબુત કેરામે મદદ કી સેક્જી.

¹¹ આમુહુ પ્રાર્થના કેતાહા કા માઅ પરમેહેર બાહકો આને આમા પ્રભુ ઇસુ ખ્રિસ્ત, આમનેહે તુમા પાહી આવીને મીલા મોકો આપે.

¹² આને આમુહુ એ બી પ્રાર્થના કેતાહા કા પ્રભુ એહેકી કે જેહેકી આમુહુ તુમનેહે પ્રેમ કેતાહા, તેહેકીજ તુમુહુ બી આપસુમે આને બાદા લોકુ આરી પ્રેમ કેરુલોમે આજી વાદતા જાઅ.

¹³ આને પ્રભુ ઇસુ ખ્રિસ્ત તુમા મનુહુને એહેકી મજબુત કે કા જાંહા તોઅ પોતા પવિત્ર લોકુ આરી ફાચો આવી, તા તે પોતા પરમેહેર બાહકા હુંબુર પવિત્રતા મે નિર્દોષ રેઅ.