1 થેસ્સલોનિકીઓ પત્રો 2 - દુબલી નવો કરાર

પાઉલુ પ્રચાર

¹ ઓ પાવુહુ, તુમુહુ પોતે બી જાંતાહા કા આમા તુમા પાહી આવુલો ફાયદાકારક રીયોહો.

² આને તુમુહુ પોતે બી જાંતાહા, કા આમુહુ ઇહી આવા પેલ્લા ફિલિપ્પી શેહેરુમે દુઃખ આને અપમાન વેઠયોહો, તેબી પરમેહેરુહુ આમનેહે એહેડી હિંમત દેદીહી, કા ખુબુજ વિરોધ વેયો તેબી પરમેહેરુ હારી સુવાર્તા તુમનેહે ઉનાવજી.

³ કાહાકા જે સુવાર્તા આમુહુ તુમનેહે ઉનાવીહી, તીયામે ભરમાવનારી ગોઠ નેતા નૈતિક અશુદ્ધતાકી ધોકો દેવુલો એહેડો કાયજ નાય આથો.

⁴ પરમેહેરુહુ આમનેહે યોગ્યો હોમજીને હારી સુવાર્તા હોપીહી. ઈયા ખાતુર આમુહુ માંહાને ખુશ કેરા ખાતુરે નાહ, પેન આમા રદયુલે ખુશ કેરા માટે ઉપદેશ દેતાહા.

⁵ કાહાકા આમુહુ કીદીહી બી ખુશ કેરા ખાતુરે તુમા વિશે હાર્યા ગોઠયા નાહ આખ્યા, ઇ તુમનેહે માલુમ વેરી, આને ધનુ લાલચુ માટે એહેકી કાયજ નાય કેતલા, તીયા પરમેહેર સાક્ષી હાય.

⁶ આમુહુ ખ્રિસ્તુ ચેલા વેરા લીદે તુમાપેને મદદ મિલવા આમા અધિકાર આથો, પેન આમુહુ નાય તા તુમાપે નાય તા બીજા લોકુપેને સન્માન મિલવા કોશિશ કેયીહી.

⁷ પેન જેહેકી યાહકી પોતા પોયરાં પાલન-પોષણ કેહે, તેહેકીજ આમુહુ ખ્રિસ્તુ ચેલાહા તુમા આરી રીને નમ્રતાકી વેહવાર કેયોહો.

⁸ આમુહુ તુમનેહે ઓતો પ્રેમ કેતાહા કા ખાલી પરમેહેરુ હારી સુવાર્તા ઉનાવા ખાતુરુજ નાહ પેન તુમા માટે પોતા જીવ દાંઅ માટે બી તીયાર આથા, ઈયા ખાતુરે કા આમુહુ તુમનેહે ખુબુજ પ્રેમ કેતાહા.

⁹ ઓ પાવુહુ, તુમુહુ આમા કઠીન મેહેનતુલે યાદ રાખતાહા, કા તુમનેહે આમા જરુરતુહુને ધ્યાનુમે નાય રાખા પોળે ઈયા ખાતુરે આમુહુ રાત-દિહી કામ ધંધો કેતા જાયને તુમા વોચ્ચે પરમેહેરુ હારી સુવાર્તા પ્રચાર કેયો.

¹⁰ તુમા બાદા વિશ્વાસ કેનારા આરી આમા વેહવાર કેહેડો પવિત્ર આને ધાર્મિક આને ભુલ વગર્યો રીયો, તીયા તુમુ બાદા સાક્ષી હાય, આને પરમેહેર સાક્ષી હાય.

¹¹ તુમુહુ જાંતાહા કા જેહેકી બાહકો પોતા પોયરાં આરી વેહવાર કેહે, તેહેકીજ આમુહુ બી તુમામેને દરેકુલે ઉપદેશ દેતાહા, આને ઉત્સાહિત કેતાહા આને હોમજાવતલા.

¹² કા તુમુહુ એહે જીવન જીવા જીયાપે પરમેહેર ખુશ વેઅ, જો તુમનેહે પરમેહેરુ રાજ્યામે પોતા મહિમા ખાતુરે ભાગીદાર વેરા ખાતુરે હાદેહે.

¹³ ઈયા ખાતુરે આમુહુ બી સાદા પરમેહેરુ ધન્યવાદ કેતાહા, કા જાંહા તુમુહુ પરમેહેર હારી સુવાર્તા ઉનાયા જે આમુહુ તુમા વોચ્ચે પ્રચાર કેયી. તા તુમુહુ તીયા માંહા નાહ, પેન પરમેહેરુ વચન હોમજીને સ્વીકાર કેયોહો. આને આમી પરમેહેર હારી સુવાર્તા તુમામે કામ કી રીયીહી જો ઇસુ ખ્રિસ્તુપે વિશ્વાસ કેતાહા.

¹⁴ ઓ પાવુહુ, તુમુહુ પરમેહેરુ તીયુ મંડળી હોચે ચાલ્યાહા જે યહુદીયા વિસ્તારુમે ઇસુ ખ્રિસ્તુમે હાય કાહાકા જેહેકી તીયાહા યહુદીયા જીલ્લા લોકુ ખાતુરે દુઃખ વેઠયોહો, તેહેકીજ તુમુહુ બી પોતા જાતિ લોકુકી દુઃખ ઉઠાવ્યોહો.

¹⁵ જીયાહા ઇસુ ખ્રિસ્તુલે આને ભવિષ્યવક્તાહાને બી માય ટાક્યા આને આપનેહે સતાવ્યા, આને પરમેહેર તી લોકુ વિરોધ કેતાહા.

¹⁶ આને તે અન્યજાતિ તીયાં ઉદ્ધારુ માટે ગોઠયા કેરા આપનેહે રોકતાહા, તે સાદા પાપ કેતાજ જાતાહા, પેન આમી છેલ્લે આંય પરમેહેર નક્કીજ તીયાહાને દંડ દેહે.

મંડળીલે મીલા ઈચ્છા

¹⁷ ઓ પાવુહુ, જાંહા આમુહુ થોડા સમયુ માટે મનુકી નાહ પેન શારીરક રુપે તુમા આરી નાય આથા, તાંહા આમુહુ ખુબુજ આશાકી તુમનેહે હેરા ખાતુરે આજી બી વાદારે કોશિશ કેલી.

¹⁸ ઈયા ખાતુરે આમુહુ એટલે પાઉલુહુ એક વાર નાહ ખુબુજ વાર કોશિશ કેલી, પેન આમુહુ તુમા પાહી આવા ખાતુરે શૈતાનુહુ રુકાવટ કેલી.

¹⁹ આમા આશા નેતા આનંદુ નેતા વાહ-વાહી મુગુટ કેડો હાય? તોઅ તુમુહુજ વેરાહા જાંહા આપુ પ્રભુ ઇસુ ખ્રિસ્ત ફાચો આવી.

²⁰ આમા ગર્વ આને આનંદ તુમુહુજ હાય.