1 થેસ્સલોનિકીઓ પત્રો 1 - દુબલી નવો કરાર

આભાર

¹ પિતા પરમેહેરુ આને પ્રભુ ઇસુ ખ્રિસ્તુમે થેસ્લોનિકા શેહેરુ મંડળી વિશ્વાસી લોકુ માટે પાઉલ સિલાસ આને તિમોથી વેલેને ઓ પત્ર લેખવામ આલોહો. પરમેહેર તીયાહાને કૃપા આને શાંતિ આપે.

થેસ્લોનિકા શેહેરુ લોકુ વિશ્વાસ

² જાંહા બી આમુહુ પ્રાર્થના કેતાહા તાંહા તુમનેહે યાદ કેતાહા, આને સાદા તુમા બાદા માટે પરમેહેરુ ધન્યવાદ કેતાહા.

³ આને જો કામ તુમુહુ વિશ્વાસુ લીદે કેતાહા, આને વિશ્વાસી લોકુ મદદ કેરા ખાતુરે ખુબુજ મેહનત કેતાહા કાહાકા તુમુહુ તીયાહાને પ્રેમ કેતાહા, આને તુમુહુ પ્રભુ ઇસુ ખ્રિસ્તુ ફાચો આવુલો આશા રાખતા જાયને તુમુહુ દુઃખ સહન કેતાહા. ઇ બાદો આપુહુ આપુ પરમેહેર બાહકાલે પ્રાર્થના કેતા સમયુલે યાદ કેતાહા.

⁴ ઓ પાવુહુ આમુહુ જાંતાહા કા પરમેહેર બાહકો તુમનેહે પ્રેમ કેહે આને તીયાહા તુમનેહે પોતા લોક વેરા ખાતુરે પસંદ કેયાહા.

⁵ કાહાકા આમુહુ પ્રભુ ઇસુ ખ્રિસ્તુ વિશે હારી સુવાર્તા ખાલી આખુલોકીજ નાહ પેન પવિત્રઆત્મા સામર્થ્યકી, આને પુરી ખાતરી કી તુમા પાહી પોચવુતાહા; આને તુમુહુ જાંતાહા કા જાંહા આમુહુ તુમા આરી આથા તાંહા તુમા ભલાયુ ખાતુરે કેહેકી કી રેહલા.

⁶ તુમુહુ ખુબુજ દુ:ખુમે બી આને આમા આરી આને પ્રભુ ઇસુ ખ્રિસ્તુ હોચે જીવન જીવ્યા, આને તુમુહુ પવિત્રઆત્મા મારફતે આપવામ આલ્લા સમાચારુલે આનંદુકી માની લેદલો.

⁷ ઇહી લોગુ કા મકોદેનિયા વિસ્તારુ આને અખાયા વિસ્તારુ બાદા વિશ્વાસી લોકુ માટે નમુના રુપ બોની ગીયા.

⁸ કાહાકા તુમા ઇહીને નાય ખાલી મકોદેનિયા વિસ્તારુ આને અખાયા વિસ્તારુમે પ્રભુ ઇસુ ખ્રિસ્તુ વચન ઉનાવામે આલો, પેન તુમા વિશ્વાસુ વિશે જો પરમેહેરુપે હાય, દરેક જાગે એહેડી ચર્ચા ફેલાય ગીયી કા આમેનેહે તુમા વિશ્વાસુ વિશે કાયજ આખુલો જરુરત નાહ.

⁹ કાહાકા તે લોક પોતેજ આમા વિશે આખતાજ તુમા પાહી આમા સ્વાગત કેહેકી વીયો, આને તુમુહુ મુર્તિહીને છોડીને પરમેહેરુ વેલે ફીર્યા, કા જીવતા આને હાચા પરમેહેરુ સેવા કેરા.

¹⁰ આને પરમેહેરુ પોયરા ઇસુ ખ્રિસ્તુ હોરગામેને ફાચે આવુલો વાટ જોવતા રેજા, જીયાલે તીયાહા મોલામેને ફાચે જીવતો કી દેદો, આને ન્યાયુ દિહી ઇસુ આવનારા ક્રોધુકી વાચાવી.