1 યોહાન પત્રો 5 - દુબલી નવો કરાર

જગતુપે વિજય મીલવુલો

¹ જો કેડો ઓ વિશ્વાસ કેહે કા ઇસુજ ખ્રિસ્ત હાય તોઅ પરમેહેરુ પોયરો હાય, આને જો કેડો બાહકા આરી પ્રેમ રાખેહે તોઅ તીયા પોયરા આરી બી પ્રેમ કેહે.

² જાંહા આપુહુ પરમેહેરુ આરી પ્રેમ રાખતાહા, આને તીયા આજ્ઞાલે માનતાહા તીયાકીજ આપુહુ ઇ જાય લેતાહા કા આપુહુ પરમેહેરુ પોયરા આરી પ્રેમ રાખતાહા.

³ પરમેહેરુ આરી પ્રેમ રાખુલો ઇ હાય, કા આપુહુ તીયા આજ્ઞાલે માને આને તીયા આજ્ઞા માનુલો કઠીન નાહ.

⁴ કાહાકા જો કેડો પરમેહેરુ પોયરો હાય, તોઅ જગતુપે વિજય મિલવુતેહે, આને તે વિજય આપુ વિશ્વાસ હાય, જીયાકી જગતુપે વિજય મીલવીહી.

⁵ જો કેડો ઇસુજ પરમેહેરુ પોયરો હાય આખીને વિશ્વાસ કેહે, ખાલી તોજ જગતુપે વિજય મીલવેહે.

ખ્રિસ્તુ વિશે સાક્ષી

⁶ ઓ ઇસુ ખ્રિસ્ત હાય જીયાલે પરમેહેરુહુ ઈયા જગતુમે મોકલ્યો, આને તીયાહા પાંયુકી બાપ્તીસ્મો લેદો આને ફાચે જાંહા તોઅ બલિદાન વીયો તાંહા રોગુત વેરાવ્યો. તોઅ ખાલી બાપ્તીસ્મો લાઅ ખાતુરુજ નાહ પેન ક્રુસુપે તીયા રોગુત વેવડાવીને મોરા બી આલો, આને જે ઇસુ સાક્ષી દેતાહા તે પવિત્રઆત્મા હાય,

^7-8 આને સાદા હાચોજ ગોગેહે. સાક્ષી આપનારા તીન હાય પવિત્રઆત્મા, પાંય, આને બલિદાનુ રોગુત આને તીનુ એકુજ સમાન સાક્ષી દેતેહે.

⁹ જાંહા આપુહુ લોકુ સાક્ષી માની લેતાહા, તા પરમેહેરુ સાક્ષી તા તીયાકી વાદીને હાય; આને પરમેહેરુ સાક્ષી એ હાય કા તીયાહા પોતા પોયરાં વિશે સાક્ષી આપીહી.

¹⁰ જે પરમેહેરુ પોયરા ઇસુપે વિશ્વાસ કેહે તોઅ જાંહે કા પરમેહેરુહુ જો કાય આખ્યોહો તોઅ હાચો હાય, જીયાહા પરમેહેરુહુપે વિશ્વાસ નાહ કેયો તીયાહા પરમેહેરુલે ઝુટો માન્યોહો, કાહાકા તીયું સાક્ષીપે વિશ્વાસ નાહ કેયો જે પરમેહેરુહુ પોતા પોયરા ઇસુ વિશે આપીહી.

સાદા માટે જીવન

¹¹ આને તે સાક્ષી એ હાય, કા પરમેહેરુહુ આપનેહે સાદા માટે જીવન આપ્યોહો, આને ઇ અનંત જીવન પરમેહેરુ પોયરાં ઇસુ ખ્રિસ્તુ મારફતે મીલ્યોહો.

¹² જો સાદા પરમેહેરુ પોયરા સંગતીમે રેહે, તીયા પાહી સાદા માટે જીવન હાય; આને જો તીયા સંગતીમે નાહ રેતો તીયા પાહી સાદા માટે જીવન બી નાહ.

¹³ આંય ઓ પત્ર તુમનેહે લેખી રીયોહો, કા જો તુમુહુ પરમેહેરુ પોયરા નાવુપે વિશ્વાસ કેતાહા, કા તુમુહુ જાંય સેકા કા આપુહી અનંત જીવન હાય.

પ્રભાવી પ્રાર્થના

¹⁴ આને આપનેહે પરમેહેરુ હુંબુર જે હિંમત મીલેહે, તે એ હાય; કાદાચ આપુહુ તીયા ઈચ્છા અનુસાર માગતાહા, તા આપુ ઉનાહે.

¹⁵ જાંહા આપુહુ જાંતાહા કા જો કાય પરમેહેરુપે આપુહુ માગતાહા તોઅ ઉનાહે, તા આપુહુ ઇ બી જાંતાહા જો કાય આપુહુ તીયાપે માગતાહા તોઅ મીલવ્યોહો.

¹⁶ કાદાચ કેડો વિશ્વાસી પાવુ-બોયુલે એહેડે કામે કેતાહા તોઅ પરમેહેરુલે તીયા માટે પ્રાર્થના કે, જીયાહા એહેડે પાપ કેયેહે તીયા પરિણામ મોત નાહ, તા પરમેહેર તીયાલે સાદા માટે જીવન આપી. પાપ એહેડો વેહે જીયા પરિણામ મોત હાય,

¹⁷ તીયા વિશે આંય તુમનેહે પ્રાર્થના કેરા ખાતુરે નાહ આખતો, બાદી જાતિ ખોટાય તા પાપ હાય પેન એહેડો પાપ બી હાય જીયા પરિણામ મોત નાહ.

¹⁸ આપુહુ જાંતાહા જો કેડો પરમેહેરુ પોયરો હાય, તોઅ પાપુમે જીવન નાહ વિતાવતો; પેન તીયાહાને પરમેહેરુ પોયરો ઇસુ બોચાવી રાખેહે: આને દુષ્ટ શૈતાન તીયાહાને આથલી બી નાહ સેકતો.

¹⁹ આપુહુ જાંતાહા કા પરમેહેરુહીને હાય, જાંહા કા બાદો જગત શૈતાનુ નિયંત્રણુ મેં હાય.

²⁰ આપુહુ ઇ બી જાંતાહા પરમેહેરુ પોયરો ઇસુ ખ્રિસ્ત આવી ગીયોહો, આને તીયાહા આપનેહે હોમુજ દેદીહી કા આપુહુ તીયા હાચા પરમેહેરુલે ઓખુજી, આને આપુહુ તીયા હાચા પરમેહેરુ સંગતીમે હાય, ઈયા ખાતુરે કા આપુહુ તીયા પોયરા ઇસુ ખ્રિસ્તુ સંગતીમે રેતાહા, ઓજ ખેરો પરમેહેર આને અનંત જીવન હાય.

²¹ ઓ પોયરાંહા તુમુહુ તીયું બાદી મુર્તિ વસ્તુકી દુર રેજા જે તુમા દિલુમે પરમેહેરુ જાગો લેહે.