1 યોહાન પત્રો 1 - દુબલી નવો કરાર

જીવનુ વચન

¹ આમુહુ ઓ પત્ર તીયા વિશે લેખી રીયાહા જો જીવન આપનારો વચન. તોઅ જગત બોના પેલ્લા આથો, જીયા વિશે આમુહુ ઉનાયા, જીયાલે પોતા ડોંઆકી હેયો, આને જીયાલે આમુહુ ધ્યાનુકી હેયો, આને આથુકી આથલ્યો.

² ઇ જીવન તોરતીપે આલો આને આમુહુ તીયાલે દેખ્યો, આને આમુહુ તીયા સુવાર્તા દેતાહા આને તુમનેહે તીયા અનંત જીવનુ વિશે આખતાહા જો બાહકા પરમેહેરુ આરી આથો, આને આમનેહે દેખાયો.

³ જો કાય આમુહુ હેયો આને ઉનાયાહા તેજ સુવાર્તા તુમનેહે બી ઉનાવતાહા ઈયા ખાતુરે કા તુમુહુ બી આમા આરી ભાગીદાર બોના; આને આમા ભાગીદારી પિતા આને તીયા પોયરો ઇસુ ખ્રિસ્તુ આરી હાય.

⁴ આને આમુહુ એ ગોઠયા ઈયા ખાતુરે લેખતાહા કા તુમા ખુશી પુરી વી જાય.

ઉજવાળામે ચાલુલો

⁵ જે સુવાર્તા આમુહુ ઇસુ ખ્રિસ્તુકી ઉનાયા આને તુમનેહે ઉનાવતાહા તે સુવાર્તા એ હાય; કા પરમેહેર ઉજવાળો હાય આને તીયામે આંદારો નાહ.

⁶ કાદાચ આમુહુ આખજી, આમા ભાગીદારી પરમેહેરુ આરી હાય આને આંદારામે ચાલતાહા તા આમુહુ ઝુટો ગોગતાહા આને હાચાયુપે નાહ ચાલતા.

⁷ પેન કાદાચ પરમેહેરુ ઉજવાળામે હાય, તેહેકીજ આપુહુ ઉજવાળામે ચાલજી, આપુહુ એકબીજા આરી ભાગીદારી રાખતાહા, આને તીયા પોયરા ઇસુ રોગુતુ બલિદાન આપનેહે બાદાહાને બાદા પાપુકી શુદ્ધ કેહે.

⁸ કાદાચ આમુહુ આખજી આમામે કાયજ પાપ નાહ તા પોતાલુજ ધોકો દેતાહા, આને પરમેહેરુ હાચાય આપુમે નાહ.

⁹ પેન કાદાચ આપુહુ આપુ પાપુહુને પરમેહેરુ હુંબુર માની લેતાહા તા તોઅ આપુ પાપુહુને માફ કેરા આને આપુ બાદા ખારાબ કામુકી શુદ્ધ કેરામે વિશ્વાસ યોગ્યો આને ધર્મી હાય.

¹⁰ પેન કાદાચ આપુહુ આખજી કા આપુહુ પાપ નાહ કેયો તા આપુહુ પરમેહેરુ ઝુટો ઠેહરાવેહે આને તીયા વચન આપુમે નાહ.