1 કુરિંથીઓ પત્રો 2 - દુબલી નવો કરાર

ઇસુ મોતુ પ્રચાર

¹ ઓ વિશ્વાસી પાવુહુ, જાહાં આંય પરમેહેરુ સુવાર્તા પ્રચાર કેરા માટે તુમા પાહી આલો, તાંહા માયુહુ તુમા આરી મોડા-મોડા શોબ્દા ઉપયોગ નાહ કેયો આને જ્ઞાનુ ગોઠયા નાહ કેયા.

² કાહાકા માયુહુ ઇ નક્કી કેલો કા આંય ઇસુ ખ્રિસ્તુ આને તીયા ક્રુસુપેને મૃત્યલે છોડીને બીજો કેહડાજ વિશે તુમા આરી ગોઠયા કિવ્યુ.

³ આંય જાંહા તુમા આરી આથો તા ખુબુજ કમજોર આને બીખુમે આને ખુબુજ કાપતો રેતલો.

⁴ માયુહુ માઅ શિક્ષણ, આને પ્રચારુમે લોકુહુને જ્ઞાનુ લોભુવાલી ભાષા ઉપયોગ નાહ કેયો, પેન પવિત્રઆત્મા સામર્થ્ય આગેવાનીકી તુમનેહે આખ્યોહો.

⁵ કા તુમા વિશ્વાસુ આધાર લોકુ જ્ઞાનુપે નાય, પેન પરમેહેરુ સામર્થ્ય પે રેઅ.

પરમેહેરુ જ્ઞાન

⁶ તેબી જે લોક આત્મિક રીતીકી મજબુત હાય, તીયામે આમુહુ જ્ઞાનુ ગોઠયા કેતાહા, પેન ઈયા જગતુ અધિકારી નાશ વેરુલો ગોઠયા નાહ કેતા.

⁷ પેન આપુહુ પરમેહેરુ તીયા જ્ઞાનુ ભેદુલે આખતાહા, જો જગતુ બોના પેલ્લા તીયાહા નક્કીજ કી લેદલો કા તીયા જ્ઞાન આને મહિમા આમનેહે આપે.

⁸ આને પરમેહેરુ યોજના ઈયા જગતુ કેલ્લા બી અધિકારીહી નાહ જાંયો, કાહાકા કાદાચે તે જાંતે તા મહિમામય પ્રભુ ક્રુસુપે નાય ચોળતો.

⁹ પેન જેહેકી પવિત્રશાસ્ત્રમે લેખલો હાય, “જે ગોઠયા કીદીહીજ નાહ હેયા તીયા વિશે કીદીહીજ નાહ ઉનાયા, આને જે લોકુ દીમાકુમે બી નાહ આલ્યા, એ ગોઠયા પરમેહેરુહુ જો તીયા આરી પ્રેમ કેતેહે તીયાં માટે તીયાર કેયીહી.”

¹⁰ પેન પરમેહેરુહુ તીયુ ગોઠી વિશે આમનેહે પ્રેરિતુપે પવિત્રશાસ્ત્ર મારફતે જાહેર કેયા, કાહાકા પવિત્રઆત્મા બાદી ગોઠી, એટલે પરમેહેરુ ગુપ્ત ગોઠયા બી જાંહે.

¹¹ તુમા મનુ ગોઠયા ખાલી તુમુહુજ જાંય સેક્તાહા, બીજો કેડોજ નાહ જાંય સેકતો, તીયુજ રીતે પરમેહેરુ ગોઠ ખાલી પવિત્રઆત્મા જાંહે.

¹² આમુહુ ઈયા જગતુ આત્મા નાહ પેન પરમેહેરુ મોક્લુલો આત્મા મીલવ્યોહો, કા પરમેહેરુ આપલા વરદાનુ ગોઠી વિશે આમુહુ જાંય સેક્જી.

¹³ ઈયા ખાતુરે આમુહુ પ્રેરિત ઈયુ ગોઠીહીને લોકુ જ્ઞાનુ મારફતે હિક્વુલા શોબ્દાકી બીજા લોકુહુને નાહ આખતા, પેન આત્મિક રીતીકી મજબુત હાય તીયાહાને પવિત્રઆત્મા મારફતે આપવામે આલ્લી ગોઠીકી આખતાહા, એટલે આત્મિક જ્ઞાન આત્મિક ગોઠયા કેતાહા.

¹⁴ પેન શારીરિક માંહુ પરમેહેરુ આત્મા ગોઠયા ગ્રહણ નાહ કેતો, કાહાકા તીયા નજરીમે તોઅ મુર્ખતા હાય. આને તોઅ તીયુ ગોઠીહીને નાહ જાંય સેકતો કાહાકા તીયાલે આત્મિક રીતીકી જાંય સેક્તાહા.

¹⁵ જીયાહા પવિત્રઆત્મા મીલવ્યોહો તે તીયુ ગોઠીહીને જાંય સેક્તેહે જે પવિત્રઆત્મા હિક્વુતેહે, પેન જીયાહા પવિત્રઆત્મા નાહ મીલવી, તે પવિત્રઆત્મા મીલવુલો લોકુ વિચાર નાહ જાંય સેક્તા.

¹⁶ જેહેકી પવિત્રશાસ્ત્રમે લેખલો હાય, “કેડો બી ઇ નાહ જાંય સેકતો કા પ્રભુ મનુમે કાય હાય આને તીયાલે હિકવી નાહ સેકતો,” પેન આમુહુ વિશ્વાસ કેનારા જાંય સેક્તાહા કા ઇસુ ખ્રિસ્તુ મનુમે કાય હાય.