1 કુરિંથીઓ પત્રો 16 - દુબલી નવો કરાર

યરુશાલેમુમે મંડળી માટે દાન

¹ આમી યરુશાલેમુ મંડળી માટે દાન એકઠો કેરામે આવેહે, તીયા તુમા સવાલુ જવાબ આંય તુમનેહે આપુહુ. ગલાતિયા વિસ્તારુ મંડળી લોકુહુ જીયુ રીતીકી કેરા આખલો તેહકીજ તુમુહુ બી કેરા.

² તુમુહુ આઠવાળ્યા પેલ્લા દિહુલે, પોતા કમાયુમેને વી સેકે તોતી બચત કીને અલગ થોવી રાખા. કા જાંહા આંય આવુ તાંહા તુમનેહે દાન એકઠો કેરા જરુર નાય પોળે.

³ જાંહા આંય તુમા પાહી આવુ, તા જીયાલે તુમુહુ મોકલા માગતાહા, તીયા મારફતે તુમા દાનુમે પત્ર લેખીને યરુશાલેમુ મંડળીલે મોકલી દેહે.

⁴ કાદાચ યરુશાલેમ શેહેરુ મંડળીમે માને જાવુલો વેરી તા તેબી માઅ આરી આવી.

યાત્રા કેરુલો યોજના

⁵ આંય મકોદેનિયા વિસ્તારુમે જાહે, ફાચે તીહીને વોલીને તુમા પાહી આવેહે, કાહાકા માને તીહી જાવુલો જરુરી હાય.

⁶ પેન ખેરોજ તુમાહી આવેહે, આને વી સેકેહે આંય આખો હિયાલો સીજન તુમાહીજ રેહે, તીયા બાદ માને જીહી જાવુલો વેરી તીહી જાંઅ મદદ કેજા.

⁷ કાહાકા આમી ચાલતા-ચાલતા આંય તુમનેહે મીલા નાહ માગતો, પેન માઅ આશા હાય કા કાદાચ પ્રભુ ઈચ્છા વેતા આંય તુમા આરી થોડોક સમય રેહે.

⁸ પેન આમી તા પચાસમા દિહુ તેહવાર લોગુ એફેસ્સ શેહેરુમે રેહે.

⁹ કાહાકા તીહી માને પ્રભુ સેવા કેરા એક ખાશ મોકો મીલ્યોહો, પેન પરમેહેરુ વચનુ વિરુધ કેનારે બી ખુબ હાય.

¹⁰ કાદાચ તિમોથી તુમાહી આવે, તા તુમુહુ પોતા પાવુ હોચે તીયા સ્વાગત કેજા, કાહાકા તોઅ માઅ હોચે પ્રભુ સેવા કેહે.

¹¹ ઈયા ખાતુરે કેડો બી તીયા અનાદર નાય કે, પેન તીયા મદદ કેજા કા તીયા યાત્રામે કાયજ તકલીફ નાય પોળે આને શાંતિકી માઅ પાહી આવી જાય. કાહાકા તોઅ વિશ્વાસી પાવુ આરી આવી, એહેકી કીને આંય તીયાં વાટ જોવુહુ.

¹² આપુ વિશ્વાસી પાવુહુ અપુલ્લોસુલે માયુહુ ખુબુજ વિનંતી કેયીહી, કા તે બીજા વિશ્વાસી પાવુ આરી, તુમા મુલાકાત કેરા આવે, પેન આમી તીયાહા જાવુલો ઈચ્છા નાહ કેયી. પેન જાંહા તીયાલે મોકો મીલી તા તુમા પાહી આવી.

છેલ્લો આદેશ આને નમસ્કાર

¹³ સાવધાન રેજા, આને વિશ્વાસુમે સ્થિર રેજા, હિંમત રાખા આને વિશ્વાસુમે મજબુત બોના.

¹⁴ તુમુહુ જો કાય કેતાહા તોઅ પ્રેમુકી કેરા.

¹⁵ ઓ મેરાલાહા, તુમુહુ સ્તેફ્નુસ આને તીયા પરિવારુલે જાંતાહા, કા તે અખાયા વિસ્તારુમે પેલ્લા વિશ્વાસી લોક હાય. આને તે સાદા પરમેહેરુ લોકુ મદદ કેરા માટે તીયાર રેતેહે.

¹⁶ ઈયા ખાતુરે આંય તુમનેહે વિનંતી કીહુ, કા તુમુહુ એહેડા દરેક આગેવાનુ આખુલો માના જો પરમેહેરુ સેવામે મદદ કેરા માટે ખુબુજ મેહનત કેતેહે.

¹⁷ સ્તેફ્નસ આને અખિકુસ માહી આવા લીદે ખુબ ખુશ હાય, કાહાકા તુમા જાગાપે તે મદદત કેતાહા.

¹⁸ તીયાહા માનુજ નાહ પેન તુમનેહે બી ખુશ કેયાહા, ઈયા ખાતુરે એહેડા લોકુ તુમુહુ સન્માન કેરા.

¹⁹ આસિયા વિસ્તારુ મંડળી લોક તુમનેહે નમસ્કાર આખતાહા. અકિલા આને તીયા કોઅવાલી પ્રિસ્કીલા આને તીયાં કોમે ચાલનારી મંડળી બાદા લોક તુમનેહે પ્રભુમે ખુબુજ નમસ્કાર આખતાહા.

²⁰ ઇહીને મંડળી બાદા વિશ્વાસી લોક તુમનેહે નમસ્કાર આખતાહા. તુમુહુ એકબીજાલે ગલે મીલીને નમસ્કાર આખજા.

²¹ આંય પાઉલ, માઅ આથુકી તુમનેહે નમસ્કાર લેખુહુ. કાદાચ એગોહો પ્રભુ આરી પ્રેમ નાય રાખે તા શાપિત વેઅ.

²² ઓ આમા પ્રભુ, આવ.

²³ આપુ પ્રભુ ઇસુ ખ્રિસ્તુ કૃપા તુમાપે બોની રેઅ.

²⁴ જો ઇસુપે વિશ્વાસ કેહે, તીયાં બાદાહાને આંય ખુબુજ પ્રેમ કીહુ.