मत्ती 1 - डोगरी नवां नियम

यीशु दी पीढ़ी

¹ अब्राहम दी औलाद, दाऊद दी औलाद, यीशु मसीह दा खानदान

² अब्राहम थमां इसहाक, इसहाक थमां याकूब, याकूब थमां यहूदा ते ओसदे प्रा पैदा ओए,

³ यहूदा ते तामार थमां पेरेस ते जोरह पैदा ओए, पेरेस थमां हिस्रोन ते हिस्रोन थमां एराम,

⁴ एराम थमां अम्मीनादाब, अम्मीनादाब थमां नहशोन ते नहशोन थमां सलमोन।

⁵ सलमोन ते राहब थमां बोआज, बोआज ते रुत थमां ओबेद, ते ओबेद थमां यिशै,

⁶ ते यिशै थमां दाऊद राजा। ते दाऊद थमां सुलैमान ओस जनानी थमां जमया जेड़ी पैलैं उरिय्याह दी करेआली ही।

⁷ सुलैमान थमां रहबाम, रहबाम थमां अबिय्याह, ते अबिय्याह थमां आसा जमया,

⁸ आसा थमां यहोशाफात, यहोशाफात थमां योराम, ते योराम थमां उज्जियाह,

⁹ उज्जियाह थमां योताम, योताम थमां आहाज, ते आहाज थमां हिजकिय्याह,

¹⁰ हिजकिय्याह थमां मनश्शे, मनश्शे थमां आमोन, ते आमोन थमां योशिय्याह;

¹¹ ते बंधी ओईयै बेबीलोन जाने दे बेलै कोलां पैलैं योशिय्याह थमां यकुन्याह, ते ओसदे प्रा पैदा ओए।

¹² बंधी ओईयै बेबीलोन पूजी जाने दे बाद यकुन्याह थमां शालतिएल, ते शालतिएल थमां जरुब्बाबेल,

¹³ जरुब्बाबेल थमां अबीहूद, अबीहूद थमां इल्याकीम ते इल्याकीम थमां अजोर,

¹⁴ अजोर थमां सदोक, सदोक थमां अखीम, ते अखीम थमां इलीहूद,

¹⁵ इलीहूद थमां इलियाजर, इलियाजर थमां मत्तान, ते मत्तान थमां याकूब,

¹⁶ याकूब थमां युसूफ, जेड़ा मरियम दा करेआला हा, ते मरियम थमां यीशु जिसी मसीह आखया जंदा ऐ, जमया।

¹⁷ एस चाली अब्राहम थमां दाऊद तकर चौदां पीडीयां ओईयां, ते दाऊद थमां बेबीलोन गी बंधी ओईयै पज्जाए जाने तकर चौदां पीडीयां, ते बंधी ओईयै बाबुल गी पज्जाए जाने दे बेलै थमां मसीह तकर चौदां पीडीयां ओईयां।

यीशु दा जन्म

¹⁸ यीशु मसीह दा जन्म एस चाली ओया, के जेसलै ओसदी मां मरियम दी कड़माई युसूफ कन्ने ओई, तां उंदे किट्ठे ओंने थमां पैलैं ओ पवित्र आत्मा दी सामर्थ कन्ने गर्भवती ओई गेई।

¹⁹ पर ओसदा करेआला युसूफ जेड़ा तरमी हा ते उसी बदनाम करना नेई चांदा हा, उसी ओनें चोप्प-चाप शुड़ने दा वचार कित्ता।

²⁰ जेसलै ओ इनें गल्लें दे बारै सोचें च गै हा तां प्रभु दा सोर्गदूत उसी सुखनें च लबया ते उसी आखन लगया, “ए युसूफ! दाऊद दी औलाद, तू अपनी करेआली मरियम गी अपने इत्थैं आनने आसतै मत डर, किके जेड़ा ओदे गर्भ च ऐ, ओ पवित्र आत्मा थमां ऐ।”

²¹ ओ पुत्तर जमग, ते तू ओसदा नां यीशु रखयां, किके ओ अपने लोकें गी उन्दे पापें थमां उद्धार देग।

²² ए सब केछ एस आसतै ओया के जेड़ा वचन प्रभु ने पविखवक्ता थमां आखे दा हा, ओ पूरा ओई जा;

²³ “दिखो एक कुंआरी गर्भवती ओग ते एक जागत जमग, ते ओसदा नां इम्मानुएल रखया जाग, जेसदा मतबल ऐ परमेसर साड़े कन्ने।”

²⁴ ओस बेलै युसूफ निंद्रे थमां बिजियै प्रभु दे सोर्गदूत दे आखने थमां अपनी करेआली गी अपने इत्थैं लेई आया;

²⁵ ते जेलै तकर ओ जागत नेई जमी ओलै तकर ओ ओदे कोल नेई गीया ते ओसदा नां यीशु रखया।