लूका 13 - डोगरी नवां नियम

मन फेरो जां नाश उयो

¹ ओस बेलै केछ लोक आई पूजे, ते यीशु कन्ने ओ गलीलियें दे बारै च चर्चा करन लगी पे, जेड़े यरूशलेम चा आए दे हे, जिंदा खून पिलातुस ने उन्दी गै बलि कन्ने मलाई ओडया हा।

² ए गल्ल सुनीयै ओनें जबाब च आखया, “के तोस समझदे ओ के ए गलीली बाकी गलीलियें कोलां पापी हे के उन्दे उपर ऐसा दोख आया?”

³ आऊँ थुआड़े कन्ने आखना ऐ के नेई; लेकन जेकर तोस मन नेई फेरगे तां तोस बी सारे इसै चाली नाश ओई जागे।

⁴ जां, के तोस समझदे ओ के ओ ठारां जन जिन्दे उपर शीलोह दा गोम्मट कीरया, ते ओ दबोईयै मरी गै, यरूशलेम दे ते सारें रौनें आलें कोलां जादै पापी हे?

⁵ आऊँ थुआड़े कन्ने आखना ऐं के नेई, लेकन जेकर तोस मन नेई फेरगे ओ तां तोस बी सारे इसै चाली नाश ओई जागे।

बगैर फल आला अंजीर दा बूट्टा

⁶ “पी ओसने ए मसाल बी बोली, कुसे दे अंगुर दे बाग च अंजीर दा बूट्टा लगे दा हा: ते ओ ओदे च फल दिखने दी आस च आया, लेकन केछ बी नेई थुआ।

⁷ पी ओनें बगीचे दे माली गी आखया, देख्ख, त्रैं बरें कोलां लेईयै आऊँ एस अंजीर दे बूट्टे च फल तुपने गी आया, लेकन केछ नेई थोया। इसी बडी सोट्ट के एनें जमीन गी ईयां रोकी रखा?

⁸ ओनें उसी जबाब दिता, ए माल्क, एस साल बी रौना दे, के आऊँ एदे चौनी पासें गुढीयै ऐल पागा।

⁹ जेकर ए अगें गी फलग तां खरा, नेई तां इसी बडी सुटना।”

कुबी जनांनी गी चंगा करना

¹⁰ यहूदीयें दे बसां दे धयाड़ै यीशु एक प्रार्थनाकार च प्रचार करा दा हा।

¹¹ दिख्खो, उत्थें एक जनानी ही जिसी ठारें बरें थमां एक दोष्टआत्मा ने जकड़ीयै रखे दा हा ते ओ कुबी ओई गेदी ही ते कुसे चाली बी सीधी नेई ओई सकदी ही।

¹² यीशु ने उसी दिखियै बलाया ते आखया, “ए नारी, तू अपने रोग थमां मोक्त ओंई गेई ऐं।

¹³ पी ओनें ओस उपर अथ्थ रखे; ते ओ फोरन सीधी ओई गेई ते परमेसर दी मैमा करन लगी।

¹⁴ एसकरी के यीशु ने उसी यहूदीयें दे बसां दे देन ठीक कित्ता हा, प्रार्थनाकार दा प्रधान गुस्सै च ओईयै लोकें गी बोलन लगया, छें; देन न जिन्दे च कम्म करना चाईदा, मतलब ओनें धयाडें गै आईयै चंगे यो लेकन सब्त दे देन च नेई।”

¹⁵ ए सुनीयै प्रभु ने जबाब दिता, “ए कपटीयों, के बसां दे धयाडै थुआड़े चा अर मनुक्ख अपने बैल या गदहे गी खड्डे चा खोलियै पानी पलाने नेई लेई जन्दा?

¹⁶ ते के बाजब नेई हा, के ए जनानी जेड़ी अब्राहम दी बेटी ऐ, जिसी शतान ने ठारें बरें थमां बनियै रखे दा हा, एस बंधन कोलां बसां दे धयाडे़ इसी छोड़कना जरुरी नेई?”

¹⁷ जेलै ओनें ए सारीयां गल्लां बोलियां, तां ओदे सारे वरोधी शरमिन्दा ओई गै, ते सारी पीड उनै मैमा दे कम्में कोलां जेड़े ओ करदा हां, खोश ओए।

सरयें दे दाने ते खमीर दी मसाल

¹⁸ पी ओनें आखया, “परमेसर दा राज कुदै आला लेखा ऐ? ते आऊँ ओदा मलाप कुदै कन्ने करां?

¹⁹ ओ सरयां दे दाने दे बराबर ऐ, जिसी कुसे मनुक्ख लेईयै अपने खेत्र च राया; ते ओ वदियै बूट्टा बनी गीया; ते अम्बर दे पैंछीयें ओदी डालीयें उपर अलड़े बनाए।

²⁰ ओनें पी आखया, आऊँ परमेसर दे राज गी कोदे साईं दसां?

²¹ ओ खमीर आला लेखा ऐ, जिसी कुसे जनांनी ने लेईयै त्रै पसेरी आटे च मिलाया, ते सारा आटा खमीर ओई गीया।”

तंग दरबाजा

²² यीशु शैर, शैर, ते ग्रां ग्रां च जाईयै शिखया दिन्दा यरूशलेम आली बखी जा दा हा।

²³ ते कुसे उसी पूछया, “ए प्रभु, के मुक्ति पाने आले थुड़े न?” ओनें उसी जबाब दिता,

²⁴ “तंग रास्ते थमां लंगने दी कोष्ट करो, किके आऊँ तुसेंगी आखना ऐं, के मते सारे जेड़े लंगना चांदे न, ते नेई लंगी सकगन।

²⁵ जेलै कर दा मालक उठीयै दरबाजा बंद करी दा उवै, ते तोस बार खडोईयै दरबाजा ठोरो ते आखो, ए प्रभु, साड़े लेई दरबाजा खोली दे, ते ओ जबाब दे, के आऊँ तुसेंगी नेई जांनदा, तोस कुथूऐं दे ओ?

²⁶ ओलै तोस बोलगे, असैं तेरे कन्ने खादा-पीता ते तोस साड़ी गलीयें च प्रचार कित्ता।

²⁷ लेकन ओ बोलग, आऊँ नेई जानदा के तोस कुथूऐं दे ओ। ए गन्दे कम करने आलयो, तोस मेरे थमां दूर ओई जाओ!

²⁸ उत्थें रोना ते दंद केलढ़नां ओग; जेलै तोस अब्राहम, ते इसहाक ते याकूब ते सारे पविखवक्तें गी परमेसर दे राज च बैठे दे, ते अपने आप गी बार कढे दे दिखगे;

²⁹ ते चडदी ते करोंदी बखी; ते उतर ते दक्षिण थमां लोक आईयै परमेसर दे राज बेच पोजन च शामल ओगन।

³⁰ ते दिख्खो, जेड़े पिछें न ओ पैले ओगन, ते जेड़े पैले न ओ पिछले ओगन।”

हेरोदेस दी दुश्मनी

³¹ उसै बेलै, केछ फरीसियें आईयै उसी आखया, “इत्थूं दा निकलिऐ चली जा, किके हेरोदेस राजा तुगी मारना चांदा ऐ।”

³² ओनें उनेंगी आखया, “जाईयै ओस लुम्बी गी बोली के देखमै अज्ज ते कल दोष्टआत्मायें गी कढीयै ते रोगियें गी चंगा करियै ते तरें धयाडें अपना कम्म पूरा करगा।

³³ तां बी मिगी अजकल ते परसों यरूशलेम गी जाना जरुरी ऐ, किके ओई नेई सकदा के कोई पविखवक्ता यरूशलेम दे बार मारया जा।”

यरूशलेम लेई वलाव

³⁴ “ए यरूशलेम! ए यरूशलेम दे लोकों! तोस जेड़ा पविखवक्तें गी मारी ओड़ना ऐं, ते जेड़े तेरे कोल पेजे गै उन्दे उपर पत्थर मारना ऐं। किनी बार मैं ए चाया, के जियां मुर्गी अपने बच्चें गी अपने पंखें च साम्बीयै रखदी ऐ, इसै चाली आऊँ बी तेरे बच्चें गी किट्ठा करां लेकन तो ए नेई चाया

³⁵ दिखो थुआड़ा कर थुआड़े लेई जुआडीयै छुडया जंदा ऐ, ते आऊँ तुसेंगी आखना ऐ के जेलै तकर तोस नेई आखगे, तन्न ऐ ओ, जेड़ा प्रभु दे नां कन्ने ओंदा ऐ ओस बेलै तकर तोस मिकी पी कदें बी नेई दिखगे।”