1 कुरिन्थियों 15 - डोगरी नवां नियमपौलुस दा शुभ समाचार ते मसीह दा दवारा जिन्दा ओना 1 ए विश्वासी प्राओ, आऊँ तुसेंगी उवै शोभ समाचार सुनानां ऐ, जेड़ा पैलैं सनाई चुके दा ऐं, जिसी तुसें मन्नी बी लेत्ता हा ते जेस च तोस टिके दे बी ओ। 2 उसै थमां थुआड़ा उद्धार बी ओंदा ऐ, जेकर ओस शोभ समाचार गी जेड़ा मैं तुसेंगी सनाया हा याद रखदे ओ; नेई तां थुआड़ा विश्वास करना बेकार ओआ। 3 एस कारन मैं सबनी थमां पैलैं तुसेंगी उवै गल्ल पजाई दित्ती, जेड़ी मिकी पूजी ही, के पवित्र शास्त्र दे वचन दे मताबक यीशु मसीह साड़े पापें आसतै मरी गीया, 4 दबया गीया, ते पवित्र शास्त्र दे मताबक त्रिये देन जिंदा बी ओई गीया। 5 जिंदे ओनें कोलां बाद कैफा गी ते पी बारें चेलें गी लबया। 6 पी ओ पंज सौ थमां मते चेलें गी किट्ठा लबया, जिंदे चा मते सारे अयें तकर जिंदे न लेकन केछ मरी गेदे। 7 पी ओ याकूब गी लबया ओस बेलै प्रेरितें गी लबया। 8 सारें थमां बाद मिगी बी लबया जेड़ा एक बखरे चाली कन्ने प्रेरित बनयां। 9 किके आऊँ प्रेरितें च सबनी थमां कहट कीमत आला ऐं, वरन चेला खुआने दे काबल बी नेई, किके मैं परमेसर दी कलीसिया दे वश्वासीयें गी सताया हा। 10 लेकन आऊँ जे केछ बी ऐं, परमेसर दी क्रपा थमां ऐं। ते ओसदी क्रपा जेड़ी मेरे उपर ओई, ओ बेकार नेई ओई; लेकन मैं उनै सबनी प्रेरितें थमां मती मेंनत बी कित्ती; तां बी ए मेरे थमां नेई ओआ लेकन परमेसर दी क्रपा थमां जेड़ी मेरे उपर ही। 11 एस आसतै पवें आऊँ ऐं, पवें ओ ओंन, अस इयै प्रचार करनयां न, ते इसै उपर तुसें विश्वास बी कित्ता ऐ। मोदें चा दवारा जिन्दा ओना 12 एस आसतै जेसलै के मसीह दा ए प्रचार कित्ता जंदा ऐ, के ओ मरें दे बिचा जिंदा ओया, तां थुआड़े चा किन्नें कि आखदे न, के मरें दे बिचा जिंदा ओना ऐ गै नेई? 13 जेकर मरें दे बिचा जिंदा ओना ऐ गै नेई, तां मसीह बी जिंदा नेई ओया। 14 ते जेकर मसीह जिंदा नेई ओया, तां साड़ा प्रचार करना बी बेकार ऐ, ते थुआड़ा विश्वास करना बी बेकार ऐ। 15 वरन अस परमेसर दे चुठे गवाह बनें; किके असैं परमेसर दे बारै च ए गुआई दित्ती के ओसने मसीह गी जिंदा कित्ता, जेकर जिंदा नेई कित्ता, तां मोड़दे जिन्दे बी नेई ओदे। 16 जेकर मोड़दे जिंदे नेई ओदे, तां मसीह बी नेई जिंदा ओया; 17 ते जेकर मसीह नेई जिंदा ओया, तां थुआड़ा विश्वास बेकार ऐ, ते तोस अयें तकर अपने पापें च फसे दे ओ। 18 वरन जेड़े मसीह च मरी गै उंदा उद्धार नेई ओया, ते ओ परमेसर कोलां मेशा आसतै लग्ग ओई गै। 19 जेकर अस सेर्फ एस जिंदड़ी च मसीह थमां आस रखदे न तां अस सारें मनुक्खें थमां जादै बद नसीब ओं। 20 लेकन सच्चाई ए ऐ के परमेसर ने मसीह गी मोड़दें चा जिंदा कित्ते दा गेदा ऐ, तां पक्का जेड़े मरी दे न ओ उनेंगी बी जिंदा करग। 21 किके जियां आदम दे पाप थमां मौत आई, उयांगै मसीह थमां मरें दें बिचा जिंदा ओना बी आया। 22 ते जियां आदम च सारे मरदे न, उयांगै मसीह च सारे जिंदे कित्ते जागन। 23 लेकन अर एक अपनी-अपनी बारी च जिंदा ओग पैलैं मसीह जिंदा ओग, पी मसीह दे दवारा औने उपर ओदे लोग बी जिंदे ओगन। 24 एस दे बाद दुनिया दा ऐन्त ओग। ओस बेलै ओ सारी प्रधानता, ते सारा अख्त्यार, ते शक्ति दा ऐन्त करियै राज गी पिता परमेसर दे अथ्थ च सौंपी देग। 25 किके जेसलै तकर ओ अपने बैरीयें गी अपने पैरें दे थलै नेई लेई अवै, ओस बेलै तकर मसीह दा राज करना जरुरी ऐ। 26 सारें थमां खीरी बैरी जेड़ा पूरी चाली कन्ने नाश कित्ता जाग, ओ मौत ऐ। 27 पवित्र शास्त्र च लिखे दा ऐ “परमेसर ने सारा केछ ओदे पैरें थलै करी दिता ऐ,” लेकन जेसलै ओ आखदा ऐ के सारा केछ ओदे दीन करी दित्ता ऐ, तां ए साफ़, ऐ के जेस ने सारा केछ ओदे दीन करी दित्ता, ओ अप्पुं एस कम्में छा लग्ग रिया। 28 ते जेसलै सारा केछ मसीह दे दीन ओई जाग, तां पुत्तर अप्पुं बी परमेसर दे दीन ओई जाग, जेस ने सारा केछ मसीह दे दीन करी दित्ता, तां जे सारें च परमेसर सारा केछ उवै। 29 अगर मोड़दे जिंदे नेई कित्ते जागन तां जेड़े लोग मरें दें आसतै पवित्रशनांन लैंदे न, ओ के करगन? जेकर मोड़दे जिंदे ओदे गै नेई तां पी कि उन्दे लेई पवित्रशनांन लैंदे न? 30 ते अस बी कि अर बेलै खतरे च पेदे रौनयां न? 31 ए विश्वासी प्राओ, आऊँ अर देन मारे जाने दे खतरे च रौंना ऐं। आऊँ ए सच्च आखे करना असल च आऊँ खोश ऐं किके तोस यीशु मसीह उपर परोसा करदे ओ। 32 जेकर आऊँ मनुक्ख दी रीति उपर इफिसुस शैर च जंगली पशुयें जिये लोकें कन्ने लड़या, तां मिगी के फायदा ओया? जेकर मोड़दे जिंदे नेई कित्ते जागन जियां कावत ऐ, “तां आओ, खाचै-पीचै, किके कल तां मरी गै जाना।” 33 तोखा नेई खायो, “बुरी संगति अच्छे चाल चलन गी बगाड़ी दिन्दी ऐ।” 34 तार्मिकता आसतै बीजी जाओ ते पाप नेई करो; किके केछ ऐसे न जेड़े परमेसर गी नेई जांनदे। आऊँ तुसेंगी शर्मिंदा करने आसतै ए आखना ऐ। असेंगी के जियां शरीर थोना? 35 ऊँन कोई ए आखघ, “मोड़दे कियां जिंदे ओदे न, ते केड़ी जेंद च औंदे न?” 36 ए निर्बुद्धि! जे केछ तू मिटी च रानां ऐं, जेसलै तकर दबे दा दाना मरे नेई ओ जिंदा नेई कित्ता जंदा। 37 ते जे तू रानां ऐं, ए ओ जेंद नेई जेड़ी पैदा ओनें आली ऐ, लेकन निरा दाना ऐ, पवें कनंक दा, पवें कुसे ओर नाज दा। 38 लेकन परमेसर अपनी मर्जी दे मताबक उसी जेंद दिन्दा ऐ, ते अर एक बी गी ओसदी खास जेंद। 39 सारीयां जिंदु एक जेईयां नेई; लेकन मनुक्खें दी जेंद बखरी ऐ, डंगरें दी जेंद बखरी ऐ; पैंछीयें दी जेंद बखरी ऐ; मछीयें दी जेंद बखरी ऐ। 40 सोर्गीय जेंद ऐ, ते तरती दी जेंद बी ऐ। लेकन सोर्गीय जिंदु दी मैमा बखरी ऐ, ते तरती दी जिंदु दी मैमा बखरी। 41 सूरज दी मैमा बखरी ऐ, चण दी मैमा बखरी ऐ, ते तारें दी मैमा बखरी ऐ, किके एक तारे थमां दुए तारे दी मैमा च फर्क ऐ। 42 मोड़दें दा जिंदा ओना बी ऐसा गै। जेंद नाशवान आलत च राई जन्दी ऐ, ते अविनाशी आलत च जींदी ओई जन्दी ऐ। 43 ओ बे आदर कन्ने राई जन्दी ऐ, ते मैमा दे कन्ने जींदी ओई जन्दी ऐ; कमजोरी दे कन्ने राई जन्दी ऐ, ते शक्ति दे कन्ने जींदी ओई जन्दी ऐ। 44 मिट्टी आली जेंद राई जन्दी ऐ, ते आत्मिक जेंद जींदी ओई जन्दी ऐ; जेलै के मिट्टी आली जेंद ऐ, तां आत्मिक जेंद बी ऐ। 45 ऐसा गै पवित्र शास्त्र च बी लिखे दा ऐ, “पैला मनुक्ख, मतलब आदम, जिंदा प्राणी बनया” ते खीरी आदम, मसीह मेशा दी जिंदड़ी देने आला बनया। 46 ऊन साड़े कोल मिट्टी आली जेंद ऐ, एस दे बाद असेंगी आत्मिक जेंद दिती जाग। 47 पैला मनुक्ख तरती थमां मतलब मिट्टी दा हा; दुआ मनुक्ख सोर्ग दा ऐ। 48 जियां ओ मिट्टी दा हा, उयांगै ओ बी ऐ न जेड़े मिट्टी दे न; ते जियां ओ सोर्ग आली जिंदु दा हा, उयांगै ओ बी सोर्ग दे न। 49 ते जियां असैं ओसदा रूप जेड़ा मिट्टी दा हा तारण कित्ता उयांगै ओस सोर्ग दी जेंद दा रूप बी तारण करगे। 50 ए विश्वासी प्राओ, आऊँ ए आखना ऐं के मास ते खून परमेसर दे राज दे अक्कदार नेई ओई सकदे, ते नेई नाशवान अविनाशी दा अक्कदार ओई सकदा ऐ। 51 दिखो, आऊँ थुआड़े कन्ने पेद दी गल्ल आखना ऐं; के अस सारे ते नेई मरगे, लेकन सारे बदली जागे, 52 ते ए पल पर च, अख चमकदै गै खीरी तुतडी बजदे गै ओग किके तुतडी बजाई जाग ते मोड़दे अविनाशी आलत च जिन्दे कित्ते जागन, ते अस बदली जागे। 53 किके जरुरी ऐ, के ए नाशवान जेंद अविनाशी जेंद गी पाई लै, ते ए मरने आली जेंद अमर जेंद गी पाई लै। 54 ते जेसलै ए नाशवान जेंद अविनाशी जेंद गी पाई लैग, ते ए मरने आली अमर जेंद गी पाई लैग, ओस बेलै ओ वचन जेड़ा पवित्र शास्त्र च लिखे दा ऐ, पूरा ओई जाग। “जै ने मौत गी निंगली लेता। 55 ए मौत, तेरी जै कुत्थें रेई? ए मौत, तेरा डंग कुत्थें रिया?” 56 मौत दा डंग पाप ऐ, ते पाप दा जोर कनून ऐ। 57 लेकन परमेसर दा शुक्र उवै, जेड़ा असेंगी साड़े प्रभु यीशु थमां जीत दिन्दा ऐ। 58 एस आसतै ए मेरे प्यारे विश्वासी प्राओ, पक्के ते टिके दे रवो, ते प्रभु दे कम च मेशा जोश कन्ने बददे जाओ, किके ए जांनदे ओई, के थुआड़ी मेंनत प्रभु च बेकार नेई ऐ। |
This work is licensed under Creative Commons Attribution-ShareAlike 4.0 License.