Titus 3 - ALLAH NEN WENE NGGET MENDE WAROGO WOKNINAKIKE WENE

“Allah aʼburi inobabut motogo kagako dogowagaluk, inasuk wako dogono,” yiluk yogokike wene

¹ Allah aʼburi kat nen pagisek welagan mende etoma nen, ineugi pemerintah mende nggokndek inapma werekma, it nen yi mende ndi mende motogo kagasuwagaluk yisinem, “E o,” yiluk inane kologo kagako dogowagaluk inasuk wako dogono.

² It Allah aʼburi eti nen, akoni amberek inabok weyak mbalkidegat, wenemuk weyak mberesigidegat, it amberek nen inobabut enggagat didiyawagaluk akoni taʼbokogonat inake inobabut enago panorogonat kagako dogowagaluk inasuk wako dogonoat.

³ It esigit diluk kagako dogusak eti, nit alep ninendainggen dek ninobabut nggembu negen, ninasuk warek degat, nil-kiltogo kagako dogolik, akoni ineugi nggokndek inapma werek kak, inoba aganggen dagagik, inakla nen yi mende ndi mende warlok ambigik, kagarigogi eti mende apma negen welagagu. Esigit diluk dogolik, it amberek weyagarinakik, uwa mbalkik, it amberek nit mondok inaʼit niyigik, nit nen it ninaʼit iyigik kagako lagagu.

⁴ Esigit diluk kagako lagagu mende, at Allah ninebe ndil ninabigogo mende etnogo obabut pano nen, nit akoni ninaʼbuwa niyasike mende eti enggagat selekma agikemo ebe didisugu o.

⁵ Esigit diluk selekma agikesik, Allah Agurengge nen ninakla sobalogo ninebe ngget mende endak ninakik, ninobabut ninat kagat ninakik, kagakike eti, nit ninenggaerek nen ninobabut motogo kagako lagagu paga kagat ninakike ʼbuk. At te, ninebe at nenat ninaʼbuwa niyasikesik ndil ninakike o.

⁶ Allah nen Agurengge woknisasike eti ebe, Yesus Kristus ninebe ndil ninabigogo mende etnogo nenat nggokogo ninoba wusa ʼbi wagike o.

⁷ At Yesus obabut pano nen wene ninoba mende nggorogo togot disikesik, Allah ninom suguluk kunogo ʼbinanggikemo, nit ninakla nen, “Niniluk mondok dogogun o,” yiluk ambaligogi eti motogo indewerek asuwagaluk Allah Agurengge woknisasike yiluk,

⁸ yigi eti eberogonat o. Kat nen it amberek inendainggen Allah oba panggot diluk werek mende kalok, akoni amberek inake panorogo yamagiyiligogi eti mende nggogot diluk anggilukogo kagako dogumo, akoni taʼbokogonat inake pano mondok, yiluk, esigit diluk kagako dogowagaluk, inasuk dikogo wako dogonok nen yiluk, an nakla ambigi mende yokigi o.

⁹ Mende, akoni inendainggen dek nen wenemuk abigogi eti inom, inebe endak larik waguka mende erloma nen mbileligogi eti inom, Allah nen ninasuk wakike wene etnogo ake wenemuk abiluk nen akoni inom weyak arigogi eti inom, taʼbokogonat eti paga pano asigin dekma yugunat wirlikogo yiligogi yiluk, kat nen togot diyasi dogono.

¹⁰ It amberek nen, Allah aʼburi mende it-it inom weyak asuwagaluk, kagarigogi mende eti, inasuk alebagik watluk nen yabunggane watnoat o. Esigit dilugat wasigin mende, inasuk kolkidek kalok, kinom kunik dogogup o.

¹¹ It akoni inobabut esigit diluk kagarigogi mende eti, akoni kolak nuk arigogi kak, nuk akalok, inobabut weyak kagarigogi eti paga, kat nen, “Inenggaerek nen wene inoba ʼbakiligogi,” yiluk inaren enggagat mbaligogon o.

Wene ilugun oba, “Esigit diluk kagatno,” yiluk yogisigik, keyagi warinakik, kagakike wene

¹² An o weyak werek nggorlek, o Nikopolis etoma witluk dogogin yiluk, nakla ambigi eti paga, at Artemas a? Tikikus a, koba laʼbiya wago kalok, kat kebe ibat noba wisigiluk kobatnerogo walkasi dogono.

¹³ Nen, at Zenas wene Allah nen ninasuk wakike wene etnogo mondok ilu mende etnogo inom, Apolos inom, imbisak yi mende ndi mende dek agidek erlogat wolok lowak nen, kat nen yamagiyalok laʼbiyano.

¹⁴ Akoni nit Allah aʼburi mende amberek, o enggen pano mende yikidek werek kak, it eti pano mende inde agidek yugunat wirlikogo dogunogo yiluk, it amberek yi mende ndi mende dek nen nuk atluk werekma, it inenggaerek pano kagako dogolik yamagiyasi doguwogoluk, eti mende nggogot diluk yanggulko dogowak o.

¹⁵ It Allah aʼburi an ninom yoma werek mende inebe taʼbokogonat nen keyagi watkaka o. Nen, kat nen, Allah aʼburi inendainggen at oba panggot diluk, ninebe ninaʼbuwa mende etoma, “Paulus nen keyagi watkinake,” yiluk, yogisanoat o. Allah obabut pano etnogo nen kit taʼbokogonat pakisek dogowak o.