Matius 25 - ALLAH NEN WENE NGGET MENDE WAROGO WOKNINAKIKE WENE

Wene komagarligi inendainggen werek mende inom, inendainggen dek mende inom, inoba lisogo yogisasike wene

¹ At Yesus nen esigit diluk yogisasikesik, wene omanggi men yogisasike, “Nombae nggok mbogot oba mende apma ʼbiyiligogoma etoma imbisak ndak-ndak, komagarligi inebe 10 paga lampu yibarlogo wolok ap age yikasinem etnogo wagonem elokoma laguka o.

² Elokoma laguka mende, inebe 5 pelakngge, inendainggen werek. Nen, inebe 5 pelakngge, inendainggen dek mende welaguka.

³ It inendainggen dek mende yomenogo lampu wolok laguka mende, minyak dek agonem ake amberek kenago wolok lagidek.

⁴ Nen, it inendainggen werek mende eranogoat, lampu inom, iyak minyak kenago omanggi inom, wolok laguka.

⁵ Mende, ap age yikasi mende eti ebe wagidek mondok erambigat werekma, it yomenogo inebe taʼbokogonat arat noge inilumo agikemo etoma noge mondok yisuka.

⁶ Noge yisi nggorlek kibanggo enggendurlemat, it akoni nen, Ap age yikasi mende etnogo ebe waga eli. Elokoma witni o, yiluk, inane amitmit nggokogo yisukama,

⁷ it komagarligi yomenogo iniluk agukasik nen, lampu kerle kagarogo yibarlik laguka.

⁸ It inendainggen dek mende yomenogo nen, it inendainggen werek mende yomenogo yogisasi dogolik, Lampu nit mende nagularigogo. Minyak kit mende omanggi woknisani o, yiluk, nggino yogisasukama,

⁹ it komagarligi inendainggen werek mende yomenogo nen, Dek o. Amberek minggirlogo kit wokisigik, amberek nit korligik, kagasumo, dek asigin o. Onggo mbaligogoma etoma kit nen amberek onggo mbala lani o, yiluk yogisasukama,

¹⁰ onggo mbala lagukama, at ap age yikasi mende etnogo arat wagikesik, it inendainggen werek mende nggarelogo ʼbakalok welaguka mende yomenogo inom pesta iyago nuwogoluk wogisek uma unggisikesik su lakike.

¹¹ Su larogo unggiluk werekma, it komagarligi pelakngge yomenogo wagukasik nen, Ninombae, su kuwal niyan o, yiluk yogokukama,

¹² at nen, Kit eti sani. Kinebe an nonggodek o, yiluk, eberogonat yokisigi,” yiluk yogisasike.

¹³ Yesus nen esigit diluk yogisasikesik nen, “Eti kak, an wisigin eti, kit nen, O etinem jam eti paga wisigin yiluk, kinonggodek eti paga nanggorlem dogolik kinobabut kwalogo dogoni o,” yiluk yogisasike.

“Ap omanggi nen, uang ininggi paga ʼbiluk lagike,” yiluk, oba lisogo yogisasike wene

¹⁴ At Yesus nen esigit diluk yogisasikesik nen, omanggi men yogisasike, “Nombae nggok mbogot oba mende apma ʼbiyiligogoma etoma, imbisak ndak-ndak, ap omanggi o walegat werlekmangge lagaluk kagako dogolik, at anduwanengge mende waisasikemo wagukama, at amende yi mende ndi mende it anggorlem dogowagaluk ininggimo ʼbiluk lagike o.

¹⁵ It inaren mbalogo inebe dombok wogisausak ndak-ndagat wogisilik lagike. Uang nggok emas mende ap omanggi 5.000 wogokik, nen, ap omanggi 2.000 wogokik, nen, ap omanggi 1.000 wogokik, kagakike. Esigit diluk wogisalok nen, o walegat werlekmangge lagike.

¹⁶ Lagikemo ap 5.000 waganggike mende etnogo uang eti paga yi mende ndi mende onggo mbalogo waganggo dogolik, yabunggane 5.000 omanggi inom lambelogo ʼbisike.

¹⁷ Nen, at omanggi 2.000 waganggike mende etnogo esigit dilugat yabunggane 2.000 omanggi inom lambelogo ʼbisike.

¹⁸ Mende, at ap omanggi 1.000 waganggike mende etnogo wolok lagikesik nen, uang ewe nggok wogokike mende eti agat kulelogo salogo lima ʼbi lagike.

¹⁹ Esigit diluk agatma sal disikesikmo inewe etnogo welagikesik nen yabunggane wagikesik, Uang wogisasigi yomenogo it nen yabunggane meren sabuka yiluk, waisasikemo wagukama,

²⁰ ap uang 5.000 waganggike mende etnogo yabunggane 5.000 lambelogo ʼbisike mende wolok wagikesik nen, Newe. Kat nen 5.000 woknikigin etnogo, lakan. An nen yabunggane 5.000 omanggi inomat oba lambelogo ʼbigima yi o, yiluk yogokikemo,

²¹ at ewe etnogo nen, Nagot wa! Kat pano mondok. Kobabut kumbulik pano mondok kagako laganma kigi o. Mbererlagat wokigi mende, kobabut kumbulik pago welagan eti paga, yabunggane mondok dogalegat pago dogonok nen yiluk, mendagaluk wokisigin o. An kewe nakla arlenggen kiligogo kak, nimbisagat ninakla arlenggen kawok nen, unggi me o, yiluk yogokike.

²² Esigit diluk yogokikesik werekma, yabunggane at uang 2.000 waganggike mende etnogo oba wagikesik nen, Newe. Kat nen 2.000 woknikigin etnogo, lakan. An nen yabunggane 2.000 omanggi inomat lambelogo ʼbigima yi o, yiluk yogokikemo,

²³ at ewe etnogo nen, Nagot wa! Pano mondok. Kat kobabut kumbulik pano kagako laganma kigi o. Mbererlagat wokigi mende, kobabut kumbulik pago welagan eti paga, yabunggane mondok dogalegat pago dogonok nen yiluk, mendagaluk wokisigin o. An kewe nakla arlenggen kiligogo eti kak, nimbisagat ninakla arlenggen kawok nen, unggi me o, yiluk yogokike.

²⁴ Esigit diluk yogisasikesik werekma, at omanggi uang 1.000 paga waganggike mende etnogo oba wagikesik nen, Newe. Kat kobabut mondok weyak etnogo nen, it amberek nen ai pilogo laʼbiligogo mende, kinggi abusagat enggen mbaligik, it amberek ai yarigogi mende, kinggi abusagat enggen mbaligik, kagarigogon etnogo, kobabut an nilu o.

²⁵ Esigit diluk kagarigogon eti paga, an nayuk nen uang kat mende 1.000 etnogo agat kulelogo lima ʼbi lagi o. Woknikigin mende etnogo ebe yi! Korlan o, yiluk yogokikemo,

²⁶ at ewe etnogo nen, Kat kobabut mondok weyak kinggi waganu weyak mende yi! An nen it amberek ai pilogo laʼbiligogo mende enggen mbaligik, it amberek yarigogi mende enggen korligik, kagarigogo mende nobabut eti kat kilu dogoligat yiligogon?

²⁷ Esigit diluk kilu kalok, an nauang eti it akoni amberek uang pago dogolik, omanggi inom oba lambelogo ʼbiligogi mende wogiselepma, an niyogoba witluk, nauang ebe mende inom, oba lambelogo ʼbiligogi mende inom, korla wisuwagaluk wogisaem kagaken, yiluk yogokikesik,

^28-29 at agoromi amberek men yogisasike, It akoni amberek ininggiwerek mende eti, yabunggane amberek inom oba lambelogo wogisasinem it mende dogalegat kagat lasigin o. Nen, it amberek ininggimo dek mende mbererlagat dogogin mende eti ininggimo nen ndilogo korlagin eti paga, ap eti esigit diluk kagakesikmo eti, uang 1.000 eti inggimo nen ndilogo ap omanggi 10.000 wagangge mende eti wogotni o.

³⁰ At ebe an nanduwanengge dogusak dek mende yi, sikmangge o mondok amummo inaik nggirlim mak-mak kagako dogolik di ako de ako kagarigogoma etoma wula ʼbiyani o, yiluk yogisasike,” yiluk Yesus nen yogisasike.

Akoni inunggulowak endaga dombok wene inoba ʼbigik, nggokik, kagasigin wene

³¹ At Yesus nen esigit diluk yogisasikesik, wene omanggi men yogisasike, “An abat endak lasi wagagi etnogo, akoni nen pogot nako nggorlek it malaikat Allah mbogot oba nen yonggo wusa ʼbiya wirigogo mende yomenogo taʼbokogonat ninom witluk nen, an pogot nako nggorlek Nendaga Nggok dogoligogoma dogolik,

³² ap omanggi anggo indewerek mende nen, domba kalok asokneat pulogo ʼbiyigik, kambing kalok asokneat pulogo ʼbiyigik, pulogo ʼbiyiligogo, eti kak, it malaikat eti nen akoni inunggulowak endaga dombok an nil oba nandorlogo ʼbiya wagonem, an nen esigit dilugat pulogo ʼbiyagin.

³³ Pulogo ʼbiyasi dogolik, it akoni domba negen mende kalok, ninggi ebengge ʼbiyigik, nen, kambing negen mende kalok, ninggi mbaikngge ʼbiyigik, kagasigin o.

^34-36 Esigit diluk pulogo ʼbiyalok nen, an nebe Nendaganggok etnogo nen, it ininggi ebengge ʼbiyagin mende eti, wene men yogisagin, An nombae nen panot kinakemo werek. Witni o. An kimbiri abu werekma kit nen melak nikik, i abu werekma kit nen woknikik, an ap kusoat werekma kit nen woknakik, niyom yugu dek werekma kit nen yiʼbanggik, u warek werekma kit nen ʼbitniya wagik, ninggi kerle warek werekma ʼbitniya wagik, kagakigip eti paga, an nombae nen mbogot agat awan walkigidek dogolik, kit kinendaganggok dogobagik nen yiluk, mikogo ʼbinagisike mende yi korla witni o, yiluk yogokonem,

³⁷ it Allah wene kologo kagako dogogun mende eti nen, Iya! Newe! Nit nen kat kimbiri abu werekma melakigik, i abu werekma wokigik, kagakugu eti, ngginem nen kagakugu nogo?

³⁸ Nen, kat ap kusoat werekma wokakik, kiyom yugu dekma yiʼbagagik, kagakugu eti, ngginem nen kagakugu nogo?

³⁹ Nen, kat u warek werekma, ʼbikiya lagik, kinggi kerle warek werekma, ʼbikiya lagik kagakugu eti ngginem nen kagakugu nogo? yiluk yoknokonem,

⁴⁰ an ap Nendaganggok nogo nen, it akoni yomenogo men yogisagin, Kit nen an nagoromi inendaga dek mende omanggi werekma esigit diluk kagarinako lagagip eti, anat kagat nako lagagip o, yiluk, eberogonat yokisigi, yiluk yogisagin.

^41-43 Nen, it ninggi mbaikngge ʼbiyagin mende eti men yogisagin, An nombae nen kit kinalem ʼbinageke mende yirani! An kimbiri abu werekma, kit nen melaknikidek, i abu werekma, kit nen woknikidek, ap kuso werekma kit nen woknakidek, su yugu dek werekma kit nen omanggi yiʼbanggidek, u warek werekma inom, ninggi kerle warek werekma inom, ʼbitniya lagidek kagako lagagip o. Eti paga, an nombae nen, at Iblis agoromi inebe dogalegat inom, kindu nagulasusak dekma dogowagaluk inobalik ʼbiyasikemo etoma korla lani o, yiluk yogisagin.

⁴⁴ Esigit diluk yogisasinem, it nen, Iya! Newe! Kat kimbiri abu werekma, i abu werekma, ap kuso werekma, kiyom yugu dek werekma, u warek werekma, kinggi kerle warek werekma, o ngginem yamak kiyigidek togot dagasugu nogo, yiluk yoknokonem,

⁴⁵ an nen, Dek o. Kit nen akoni omanggi inendaga dek mende werekma kinobakanini togot diyasi lagagip eti, anat togot danggo lagagip o, yiluk yogisalok nen,

⁴⁶ it akoni eti yi aik ndi aik kasi dogogun oba mondok dogowagaluk laʼbiyagin o. Mende, it Allah wene koluwogoluk kagako dogogun mende eti iniluk mondok dogogunmo etoma ʼbiyagin o,” yiluk yogisasike.