Matius 2 - ALLAH NEN WENE NGGET MENDE WAROGO WOKNINAKIKE WENE

It ap kusagal inilenggen wolok waguka wene

¹ At Yesus eti, o Yudea etoma o unggul endaga Betlehem endak lagike. Endak lagike eta paga o etoma ap endaganggok Herodes welagike. Werekma, it ap inil enggerlek kusagal mbenako laguka mende yomenogo o mulinggi dagi wirigogoma eloma mot-mot nen o Yerusalem waguka.

² Wagukasik, it nen, men yisuka, “Akoni Yahudi mende inewe Endaganggok endak lagasik werek etnaga, o nggoma endak lagasik werek. Nit o mulinggi dagi wirigogoma eloma werekma, ap nggok eti endak lagama yiluk, kusagal omanggi winam agama nen, at eti ninendainggen at oba panggot diluk pogorasuwogoluk kusagal eti ninilenggen nen wolok kinok wagani wago,” yiluk yisuka.

³ Yisukama, at nggok Herodes etnogo asuk kolkikesik, at inom, akoni o Yerusalem welaguka mende yomenogo inom, inagut mondok lagike.

⁴ Inagut mondok lagikesik nen, at ap nggok Herodes etnogo nen, it ap Allah indewerek ineugi nggokndek yomenogo inom, Allah wene kolal mbalek indewerek mende inom, omanggimo nandorlogo ʼbiyasikesik nen, “At Kristus eti, kit nen, o nggoma endak lasigin yiluk ambaligogi,” yiluk kinok waganggike.

⁵ Kinok waganggikemo, it nen, “O Betlehem o propinsi Yudea etomaat o. Etoma endak lasigin, yiluk, it ap Allah wene yogisasi laguka mende omanggi nen yisi dogolik,

⁶ Kit akoni o Yudea o Betlehem dogoligogi mende yirani! O unggul pelak yoma endaganggok werek nggorlegat, o Betlehem yoma endaga dek, ʼbugurlagat negen, yiluk yusak dek. An naʼburi Israel mende ap nggok mende apma dogogun etnogo, o unggul kit werekma yoma kinanggerleka nenat endak lasigin o, (Mi. 5:2) yiluk kolal mbalogo ʼbisukama werek o,” yisuka.

⁷ Yisukama, at Herodes etnogo nen, it ap inil enggerlek kusagal didiluk inilenggen wolok waguka mende yomenogo waisasikesik nen limago yogisasi dogolik, men yogisasike, “Ngginem kusagal eti duki waga? Dikogo yoknitni,” yiluk kinok inoba yabunggane waganggike.

⁸ Kinok waganggikemo it nen, “Esigit diluk,” yiluk yogokukama, at nen, “Eti kalok, kit o Betlehem etoma lani o. Lalok nen, elege endak lagasik werek eti panorogo kweyatno. Nen, arat kweyatluk kalok, yabunggane an nendainggen at oba panggot diluk pogorasi lak nen yoknisi witno,” yiluk yogisasike.

⁹ Yogisasikemo inasuk kol diluk nen, kusagal o mo dagi wirigogoma etoma winam agikemo inilenggen kasuka mende etnogo alep lago nggorlek, omborlik inilenggen nen wolok laguka. Inilenggen nen wolok wolok laguka, kusagal etnogo elege endak lagikesik werekma ombo paga mot-mot lagikesik nen, arat puk asi lagike.

¹⁰ Esigit diluk puk agikemo it yomenogo kusagal etnogo inilenggen kasukasik, inakla arlenggen mondok aguka.

¹¹ Inakla arlenggen mondok agukasik uma unggisuka mende, elege etnogo agoya Maria agamo werekma inilenggen kalok, inindibagal yunggulogo pogorakuka. Pogorako dogolik, onggo nggok pano mende emas inom, kemenyan nggami obasi salek etnogo inom, o mur ambusu inom, kirlelogo wogokuka.

¹² Wogokukasik noge yisinem at Allah nen, “Kit yabunggane kiniyogoba Herodes oba lagup o,” yiluk kusumbi yogisasikemo inaʼbi kalok, kolak ninggalokmangge nen inaguma laguka.

Yesus endago wolok lo o Mesir laguka wene

¹³ It ap kusagal inilenggen nen wolok waguka mende yomenogo arat lagukama, kibanggo Yusuf noge yisinem malaikat mbogot oba Allah nen laʼbi wagikesik, aʼbi paga men yogokike, “Yusuf. Kat elege endago eti agoya imbisagat wogisek, o Mesir etoma lo lan o. Lalok nen, etomaat dogono o. Etoma werekma an nen yokogo kalogat witno. At ap nggok Herodes etnogo nen elege endago eti wasigiluk kagarigogo o,” yiluk yogokonem aʼbi kasike.

¹⁴ Aʼbi kalok iluk agikesik nen, kibanggoneat elege endago etnogo agoya imbisak wogisek o Mesir lagike.

¹⁵ Lagikesik, o etoma mondok welagike. Werek nggorlek, at nggok Herodes etnogo ebe watlagikemo nen wagike. Eti kagakike paga, it ap Allah wene yogisasi laguka mende omanggi nen, “An naʼbut o Mesir etoma nen wisuwagaluk waisigin o,” (Hos. 11:1) yiluk Allah nen yisikemo kolal mbalogo ʼbisike etnogo ndak-ndagat kagat lasuwagaluk kagakike o.

O Betlehem elege ʼbugurlakndek mende inakuka wene

¹⁶ Ap nggok Herodes etnogo nen it ap wene yogisasike mende etnogo, “Wisugun a? Dek a,” yiluk, inanggorlem welagike welagike, inebe degat agikemo, “Nuket dangga kigi,” yiluk akla agaga ambik dagasike. Akla agaga ambik dagisikesik nen, “Elege ʼbugurlakndek mende o Betlehem etoma mende inom, o werlekmangge etoma mende inom, kurli ap kusagal inilenggen nen wolok wagakasik, Eti kurli paga kogo, yiluk dikogo yokneka kurli nen, umur 2 tahun mende inom, yabunggane endak larik wagaka mende inom, elege taʼbokogonat mondok inatno,” yiluk, agoromi laʼbiyasike.

¹⁷ Esigit diluk kagat lagike paga, at Yeremia Allah wene yogisasi lagike mende nen yisi dogolik,

¹⁸ “O Rama nen denggu makonem ninasuk kolkik, inane naik-waik yisinem ninasuk kolkik, kagako. At kwe Rahel eyagi inebe dek nen inarle nggogat ako dogolik, Nendainggen sebelusak dek. Naʼit. De ako mondok dogogin,” (Yer. 31:15) yiluk yisikemo kolal mbalogo ʼbisike mende etnogo ndak-ndagat kagat lasuwagaluk kagakuka o.

Yesus endago wolok o Nazaret wagike wene

¹⁹ At ap nggok Herodes etnogo arat watlagikemo, malaikat Allah nen laʼbi wagikemo wagikesik, Yusuf o Mesir etoma dogolik noge yisinem kibanggo aʼbi paga men yogokike,

²⁰ “Yusuf. Kiluk asin o. Melatluk, elege endago eti agoya imbisak wogisek o akoni Israel mende werekma lan o. Elege endago eti wasuwogoluk kagako lagaka etnogo, ebe arat watlaga o,” yiluk yogokike.

²¹ Yogokikemo, Yusuf nen elege endago etnogo agoya imbisak wogisek, akoni Israel mende werekma waguka.

²² Wagukama it akoni nen, “O Yudea etoma yabunggane ap nggok endaga Arkelaus eti ombae Herodes obalikmo mendegama werek o,” yiluk yisukama, Yusuf asuk kolkikesik nen, o etoma lausak ayuk agikesik werekma, at Allah nen, “O Yudea etoma lagup o,” yiluk, aʼbi paga kusumbi yogokikemo, o Galilea etomaat wagike.

²³ Wagikesik nen, o unggul endaga Nazaret unggi wagikesik, etomaat puk agike. Esigit diluk kagakike eti, it ap Allah wene yogisasi laguka mende nen yisi dogolik, “At ap etnogo ago Nazaret mende yugun o,” yiluk yisuka ndak-ndagat kagat lagike o.