2Timotius 2 - ALLAH NEN WENE NGGET MENDE WAROGO WOKNINAKIKE WENE

Timotius ebe Yesus oba dombokogo dogowagaluk, asuk wakike wene

¹ Timotius naʼbut o. Nit Kristus Yesus ninom kunik werekma, Allah obabut pano nen woknisiligogo mende eti paga kendainggen korlerogo dogono o.

² An nen wene akoni dogalegat inil oba yanggul kikigimo waganggigin mende etnogo, kat nen it akoni amberek inobabut dombokogo yanggul isasi dogusak mende nen it amberek yanggul isasi dogowagaluk, inoba ʼbin o.

³ Ap inobabut nggaʼberek mende ineugi inane kologo wim ako dogolik, yi aik ndi aik kilik-kilik abigogi kak, kat nen Yesus Kristus ane kologo, yi aik ndi aik kasi dogolik, kobakanini kambuk yiluk kagako dogono o.

⁴ It ap inobabut nggaʼberek mende eti ineugi nggokndek inakla arlenggen kowagaluk, wim ako dogolik, yi mende ndi mende uma werek mende oba ebekidegat abigogi o.

⁵ Nen omanggi, ta ae aʼbusuk ta ae aʼbusuk mbirirli lago dogolik, ap inayonggo ʼbiyiligogo mende nen, “Yigit diluk lausak,” yiluk yiligogo mende ane kologo lagidek kalok, “Ae aʼbusuk aga mende, ap yiat,” yiluk, onggo nggare-nggare negen yiʼbiyiligogi mende eti, yiʼbiyausak erlok dek o. Ane kologo lago kalogat yiʼbiyausak o.

⁶ Nen omanggi, akoni amberek ineyabu sereyak-moreyak korlalok nen, ai yaʼbumo ebe korle agonem, inenggaerek nen ndak niligogi o.

⁷ Wene an nen yokigi mende eti kakla eberek dogumo, ninewe Endaganggok nen taʼbokogonat dikogo yokisusak werek eti paga, oba ebeko dogono o.

⁸ An pano wene yogisilik noko dogoligogo eti, Yesus Kristus, at Daud omba endago mendeat ebe wakukama, Allah nen ilugut disike wene eti kakla eberek mondok dogono o.

⁹ An pano wene esigit diluk yogisilik nokonem, it akoni amberek nen, it amberek weyak kagarigogi mende kagarinabu kak, an yi aik ndi aik kagat nakik, ninggi kerle wakik, kagarigogi mende, Allah wene eti kerle wasusak erlok dek o. Kerle piyalegat werek o.

¹⁰ Eti paga, it akoni amberek Allah nen miginakike mende Kristus Yesus inom kunumo, inebe ndil inakik, iniluk pano mondok dogowagaluk, panorinakik, kagasuwagaluk, an esigit diluk weyagat nako nggorlegat, nobakanini kambuk yiluk werek o.

¹¹ Wene men yiluk yiligogi yi eberogonat o, Nit at ninom watlago mende kalok, at ninom niniluk mondok dogogunat o.

¹² Nit ninobakanini kambuk yiluk dogogun kalok, akoni at apma unggiluk dogogun mende eti, nit ninom nenat pagisek dogogun o. Nit nen, “Yesus ninewe dek o,” yiluk, at ebe mondok togot diyasi kalok, at nen, “It an nagoromi degat o,” yiluk, togot dinaniginat o.

¹³ Mende, at enggaerek nen, “An nobabut alep welagi mende eti dek o, yiluk ninat kagat larigogo dek eti paga, nit at oba dombokogo dogogun dek kalok, at nen nit ninoba dombokogo mondogat werek o,” yiluk, yiligogi eti eberogonat o.

“Wene we negenat mende togot diyalok, ebe wene etiat inasuk wako dogono o,” yiluk, yogokike wene

¹⁴ Wene yokigi mende eti taʼbokogonat it amberek inakla eberogo yogisasi dogono o. Yogisasi dogolik, weat, inane mende pasigat wenemuk abigogi eti, Allah il oba inasuk panorogo wako dogono o. Esigit diluk wenemuk abigogi eti paga, pano kagat lasigin dek o. It amberek inasuk kol diluk, weyak asugunat o.

¹⁵ Allah nen, “Kat an nake pano kagako lagan,” yiluk, yokisuwak nen, kobatnerogonat kagako dogono o. It amberek yi mende ndi mende kagasuwagaluk inayonggo ʼbisinem, panorogo kagako dogolik, inenggarli dekogonat kagarigogi eti kak, kat nen ebe wene etiat motogo yanggul isasi dogono o.

¹⁶ Mende, it akoni amberek nen ebe wene eti dekma, yugunat, dek asigin mende yiligogi eti, togot diyalok mirlokogo lago dogono o. It eti esigit dilugat yisi dogolik, Allah ebe togot diyalok ndiyo kilik ndiyo kilik korla dukiligogi o.

¹⁷ Wene ebe wene dekmaat yanggul isiligogi mende eti, akoni inagalumo aikarlu mbalinakonem, ebengganggal nggok arigogo kak, it eti inane esigit dilugat yiligogi eti paga, it amberek nggogat weyagarinabigogi o. Ap Himeneus Filetus imbisak esigit diluk kagako dogolik,

¹⁸ ebe wene togot diyalok mirlokogo dukisukasik, it nen, “Allah nen akoni warek mende inilugurinabigin yiluk abok yisike etnogo arat kagat lagama yi,” yiluk, it amberek yogisasinem, inendainggen Allah oba panggot diluk werek mende weyagarinabigogi o.

¹⁹ Mende, Allah nen o kerlaga negen ʼbisike mende obatneyak mondogat dogogin eti paga kolal men yiluk mbalek werek o, “Ninewe Endaganggok enggaerek aʼburi miginakike mende eti inebe ilu o.” (Bil. 16:5) Nen wene omanggi, “It amberek nen, An nebe ninewe Endaganggok aʼburat o, yiluk, yiligogi mende, Weyak kagasusak ninaʼit o, yiluk togot diyalok mirlokogo lo lago dogowak o,” yiluk, yisikemo kolal mbalek werek o.

²⁰ O nggok palekma akla, yi mende ndi mende emas mende inom, perak mende inom, kagarek mende onggo nggok eti mende arlek werek ʼbuk o. O mende inom, agat mende inom, kagarek mende weregat o. Pano mende kagasuwogoluk kalok, pano mendeat waganggik, yugunat mende kagasuwogoluk kalok, yugunat mende waganggik, kagarigogi o.

²¹ Eti kak, ta nen enggaerek nen weyak kagarigogo mende eti, korogo togot diyalok, ebe Allah ake ʼbiyalok werekma, at Allah nenat yi mende ndi mende pano mende kagasigiluk. “Arat pano,” yiluk, ayonggo ʼbigin o.

²² Eti paga, kat, it ap elege mende nen inoba aganggen dagaluk weyak kagarigogi mende eti togot diyalok, lo lago dogono o. It akoni amberek inendainggen pano omanggiat dogolik ninewe Endaganggok nen yamagiyawagaluk ayonggo ʼbiligogi mende eti kinom dambukogo dogono o. Kinomat motogo kagakik, Allah oba dombokogo welagik, akoni inebe inaʼbuwarogo welagik, akoni inom panorogo welagik, kagarigogi eti mendeat mutluk lago dogono o.

²³ Esigit diluk kagako dogolik, it akoni amberek inendainggen abit mende nen wene inonggodek dogoligat, wenemuk abigogi eti ilugun oba, it-it inom wim negen abigogi eti kinom kagakidek togot diyasi dogono o.

²⁴ At ta nen ninewe Endaganggok anduwanengge kagako dogolik, esigit diluk kagasusak dek. Akoni taʼbokogonat inobabut liyokogo panorogo inom dogusak o. Obabut obakanini kambuk yiluk dogolik, akoni wene panorogo yanggul isasi dogusak o.

²⁵ Esigit diluk yanggul isasinem, it akoni amberek nen at ane sagaluwogoluk kagakonem, at nen ane liyokogonat inasuk wako dogusak o. Esigit dilugat inasuk wakonem, it weyak kagarigogi mende togot diyalok, ebe wene eti waganuwagaluk, Allah nen inakla nggagaliginat a? yiluk inasuk wako dogusak.

²⁶ Esigit diluk inasuk wakonem, it inobabut kwalatluk, at Iblis akla ambaligogo mende kagako dogowagaluk inebe ʼbagi kerle paga nen paginabigogo kak paginake mende, Allah nen kerle etnogo piyalogo togot diyalok wula diyaginat o.